Read Tzeltal 1 Corintios 2 Bible Online

1 Corintios 2 - Tzeltal bible

1 Corintios 2

¹Ha yu'un, quermanotac, te c'alal c'oht calbeyex awa'iyic te bin halbil yu'un Dios, ma ba c'oht cal t'ujbil c'opetic o p'ijil c'opetic,

²como la jnop te mayuc yan bin ay ta co'tan c'alal ayon ta awohlilic a, ha nax te Jesucristo te laj ta cruz.

³Te c'alal ayon ta awohlilic mayuc quip soc bayel ayon ta xiwel soc nihc co'tan yu'un.

⁴Ma ba la jc'oponex soc ma ba la jcalbe sc'oblal Cristo ta scuenta sp'ijil-c'op ants-winiquetic soc tsaltamba-c'op, pero ha ta scuenta yaq'uel ta ilel te yu'el te Espíritu,

⁵scuenta yu'un ma ha'uc ta scuenta sp'ijil-c'op winiquetic te ipajem te sch'uhunel awo'tanic, ha ta scuenta yu'el te Diose.

⁶Pero ya calcotic p'ijil-c'op ta yohlil te mach'atic muq'uiquix, ma ha'uc te p'ijil-o'tanil yu'un te bahlumlal o yu'un te mach'atic ay ya'telic ta bahlumilal, te ya xlaj sc'oblale.

⁷Ha ya xc'opojotic te ta sp'ijil yo'tan Dios te muquen ay, ha te p'ijil-c'op te muquen ay, te ta shahchibal to tal chapal yu'un Dios te ha cutsilaltic ya xc'oht.

⁸Ma ba la sna'beyic scuentahil jtuhluc te mach'atic ay ya'telic ta bahlumilal, como te lajuc sna'beyic scuentahil, ma ba la yaq'uic ta milel ta cruz te Cajwaltic te ay yutsilal te hichuque.

⁹Hich te bin ut'il ts'ihbabil: Mayuc sitil yiloj, mayuc chiquinil ya'iyej, mayuc mach'a sna'oj ta yo'tan te bintic chahpambil yu'un Dios te ya ya'be te mach'atic c'ux ta yo'tanic te Diose, xchi.

¹⁰Pero Dios la ya'botiquix jna'tic ta scuenta te Espíritu, como te Espíritu ya stsahtay spisil, ha nix hich te bin muquen ay yu'un Dios.

¹¹Como ¿mach'a ya xhu' ya sna'be yo'tan te winique? pues ha nix te sch'uhlel te winique. Ha nix hich mayuc mach'a ya sna'be sba te bintic ay yu'un Dios, ha nax te Espíritu yu'un Dios.

¹²Te ho'otic ma ha'uc quich'ojtic te espíritu yu'un bahlumilal, ha quich'ojtic te Espíritu te talem ta stojol Dios, scuenta yu'un hich ya jna'tic a te bin ya'beyejotic te Diose.

¹³Ha ya calbecotic sc'oblal ini, ma ha'uc ta scuenta sp'ijil-c'op ants-winiquetic, pero ha te c'opiletic ya yac' ta nopel te Espíritu, te ha ya ca'becotic snopic te mach'atic ayic ta scuenta te Espíritu.

¹⁴Te mach'a ma ba yich'oj te Espíritu, ma xc'oht ta yo'tan te bintic scuenta te Espíritu yu'un Dios, como scuyoj ta howilc'op, ma xhu' ya sna'be scuentahil, como ha ya sc'an tsahtayel ta scuenta te Espíritu.

¹⁵Yan te mach'a yich'oj te Espíritu, ya sna' stsahtayel spisil bintic ay, pero mayuc ta tsahtayel yu'un yantic stuquel.

¹⁶¿Mach'a ya c'an sna' te bin snopoj te Cajwaltique? ¿Mach'a ay bin ya ya'be snop? Yan te ho'otique quich'beyejtic sp'ijil yo'tan te Cristo.