Read Tzeltal 1 Corintios 5 Bible Online

1 Corintios 5 - Tzeltal bible

1 Corintios 5

¹Chican ac'oblalic te ay ta awohlilic mach'a yac ta antsiwej, ha antsiwej te ni mayuc hich ay ta pasel ta yohlil jyanlumetic; ay mach'atic yic'ojbe yihnam stat.

²Soc te ha'exe atoyoj abahic yu'un. ¿Ma bal ha'uc ya sc'an te lajuc amel awo'tanic yu'un soc te lajuc aloq'uesic ta awohlilic te winic te hich la spase?

³Aunque ma ba joquex, pero joquinejex ta co'tan ya ca'iy, sjel ta joquinejex, chahpambilix cu'un te mach'a hich spasoje.

⁴C'alal atsoboj abahic ta scuenta sbihil Cajwaltic Jesucristo soc tey ay a te espíritu cu'un, ta scuenta yu'el te Cajwaltic Jesucristo,

⁵ac'a yich' aq'uel ta sc'ab Satanás te winic scuenta yu'un ya xc'ax swocol ta sbaq'uetal,[1] scuenta yu'un hich ya xcol sch'uhlel a te c'alal ya xtal te Cajwaltic Jesús.

⁶Ma lecuc te atoyoj abahique. ¿Yu'un bal ma ba ana'ojic te jteb nax levadura ya spajubtes sc'ohlol te we'bal?

⁷Loq'uesa te poco' levadura scuenta yu'un yach'il harina ya xc'ohex te mayuc levadura yich'oj, hich te bin ut'il ayexe. Como te Pascua cu'untic, ha te Cristo, yich'ojix milel ta jcuentatic.

⁸Ha yu'un ac'a jpastic te q'uin, ma ha'uc soc te poco' levadura, ha te levadura yu'un te bin chopol soc te bin mulil, ac'a jpastic te q'uin soc te pan te ma ba yich'oj levadura, ha te ich'bil scuentahil soc smelelil.

⁹La jts'ihbabeyex ta carta te ma me xajoquin abahic soc j'antsiwejetic.

¹⁰Ma ha'uc ya calbe sc'oblal te j'antsiwejetic ta bahlumilal, te mach'atic ay st'ut'ilic, te j'eleq'uetic soc mach'atic sch'uhunejic lotil diosetic; ya sc'an ya xloq'uex ta bahlumilal te hichuque.

¹¹Pero ya jts'ihbabeyex te ma me xajoquinic te mach'a ya scuy sba ta hermano, teme ha j'antsiwej, o te ay st'ut'il, sch'uhunej lotil diosetic, j'ixta'c'op, jyacubel o j'elec'; ma me xajoquin abahic ta we'el soc.

¹²Como ¿bin cochel a te ho'on ya jchahpan te mach'atic ma ba ayic ta iglesia? ¿Ma bal ha'uc yac achahpanic te mach'atic ayic ta iglesia?

¹³Te mach'atic ma ba ayic ta iglesia ya me yich'ic chahpanel yu'un Dios. Ha yu'un loq'uesa ta awohlilic te mach'a c'ax chopol bin spasoje.