Read Tzeltal 2 Corintios 13 Bible Online

2 Corintios 13 - Tzeltal bible

2 Corintios 13

¹Yoxebalix buelta a te ya xtal quilex. Ta scuenta cheb oxeb testigo ya yich' chahpanel spisil bintic ya sc'an chahpanel.

²Calbeyejexix te c'alal la joquinex ta schebal buelta, soc yo'tic, aunque ma ba joquinejex, ya jcha'halbe xan te mach'atic stahojix smulic soc spisil yantic, te c'alal ya xcha'talon ma ba ya jc'uxultay.

³Hich yac awilic a teme melel ha nix te Cristo te yac ta c'op ta jcuenta, soc te ma ba peq'uel te yip ta atojolic, ay bayel yu'el ta atojolic.

⁴Aunque mayuc yip a te la yich' jihpanel ta cruz, cuxulix ta scuenta yu'el te Diose. Ha nix hichotcotic, mayuc quipcotic ta scuenta, pero pajal cuxulotcotic soc ta scuenta yu'el Dios scuenta yu'un ya cac' jbahcotic ta a'batinel ta atojolic.

⁵Ha'ex nix xatsahtay awilic teme ay sch'uhunel awo'tanic; ha'ex nix xatsahtay awilic. ¿Ma bal ana'ojic te ay ta awo'tanic te Jesucristo? ¡O ha wan ma ba c'ax awu'unic te tsajele!

⁶Pero jch'uhunej te yac ana'ic te c'axem cu'uncotic te tsajele.

⁷Ya jc'oponcotic Dios yu'un te manchuc ayuc bin chopol yac apasic; ma yu'unuc tey ya xchicnaj a te c'axem cu'untic te tsajele, pero yu'un yac apasic te bin lec, aunque hich ya'iyel te ma ba c'axem cu'uncotic te tsajele,

⁸como mayuc bin ya xhu' cu'uncotic scontrahinel te bin melel, ha nax scoltayel te bin melele.

⁹Ha yu'un tse'el co'tancotic te c'alal mayuc quipcotic, pero te ay awipic te ha'exe; soc ya jc'opombeyex Dios yu'un te lecuc ya xc'ohex.

¹⁰Ha scuentahil te la jts'ihbabeyex te carta ini te c'alal ma to ba joquex a, scuenta yu'un te c'alal ya xc'ohon ma ba tulan ya jtuhun te yip ca'tel te ya'beyejon te Cajwaltic yu'un ya yich' yip awo'tanic, ma yu'unuc ajinelic.

¹¹Ta slajibal, quermanotac, tse'eluc me awo'tanic, lecuc me ya xc'ohex, ayuc smuc'ul awo'tanic, junuc me awo'tan abahic soc lamaluc me q'uinal ya xcuxajex; hich me ya sjoquinex te Dios yu'un lamal q'uinal soc te ay sc'uxul yo'tane.

¹²Talel c'axel xapatbe aba awo'tanic ta scuenta ch'ul uts'uyel.

¹³Xcoltanuquex laj yu'un spisil te mach'atic ch'uhltesbilic.

¹⁴Ac'a sjoquinex ta apisilic te yutsil yo'tan te Cajwaltic Jesucristo, te sc'uxul yo'tan Dios, soc junuc awo'tanic soc te Ch'ul Espíritu. Hichuc.