Read Tzeltal 2 Corintios 7 Bible Online

2 Corintios 7 - Tzeltal bible

2 Corintios 7

¹Ha yu'un, quermanotac te c'uxex ta co'tane, te bin ut'il hich halbilotic yu'un Dios, ac'a jpoc jbahtic yu'un spisil bintic bohloben ta jbaq'uetaltic soc ta co'tantic; behbehuc me ac'a quich'tic ch'ultesel ta scuenta yich'el ta muc' te Diose.

²Ic'awotcotic ta awo'tanic; mayuc mach'a chopol bin jpasbeyejcotic, mayuc mach'a jimbeyejcotic yo'tan, mayuc mach'a jlo'loyejcotic.

³Ma ba hich ya calbeyex yu'un ay amulic ta jtojol; como calbeyejex ta nahilal te ayex ta co'tancotic, ha chican teme cuxulotcotic o teme chamenotcotic.

⁴Jamal co'tan ya xc'opojon ta atojolic; bayel yutsil co'tan awu'unic. Muc'uben q'uinal ya ca'iy ta acuentahic soc ta spisil jwocolcotic c'ax bayel stse'elil co'tan.

⁵Te c'alal talotcotic ta sq'uinal Macedonia, mayuc la scux yo'tan te jbaq'uetalcotic, bayuc nax la jtahcotic wocol: ay c'opetic ta spat soc ay xiwel ta yutil.

⁶Pero te Dios te ya smuc'ubtesbe yo'tan te mach'atic ayic ta wocol, ha la smuc'ubtesbotcotic q'uinal ca'iycotic a te c'alal hul te Tito.

⁷Soc ma ha'uc nax yu'un te tale, ha muc'ub q'uinal la jca'iycotic yu'un te bin ut'il muc'uben q'uinal la ya'iy te Tito ta acuentahique. Ha la ya'botcotic jna'cotic te ayotcotic ta awo'tanic, te bayel la amel awo'tanic, soc te yac ana'belonic; hich c'ax to xan tse'el co'tan yu'un.

⁸Aunque la jca'beyex amel awo'tanic yu'un te carta, pero ma ba ya jmel co'tan yu'un. Ay nix la jmel co'tan, como la jquil te jts'ihn nax la ya'beyex amel awo'tanic te cartahe.

⁹Pero ta ora ini tse'el co'tan, ma yu'unuc te la amel awo'tanic, ha yu'un te la amel awo'tanic te hich la asuhtes awo'tanic, yu'un hich la amel awo'tanic te bin ut'il la sc'an te Diose, hich mayuc bin ch'ayem awu'unic ta jcuentacotic.

¹⁰Como te mel-o'tan te ya sc'an te Dios ya yac' suhtesel-o'tanil scuenta colel, soc mayuc mel-o'tan tey a; yan te mel-o'tan yu'un te bahlumilal ya x'ac'awan ta lajel.

¹¹Ilawil bin ut'il lec c'oht te la amel awo'tanic ta stojol Dios: ¡tey hahch ana'ic bin yac apasic a, la anop te yac acoltay abahic, ilinex yu'un te bin chopol, ay xiwel ta awo'tanic, c'opoj awo'tanic ta jtojolcotic, xut'et awo'tanic, soc hahch achahpanic ta stojil! Ta spisil chican te mayuc amulic tey a.

¹²Ha yu'un te bin ut'il la jts'ihbabeyex, ma ha'uc yu'un te mach'a ay bin chopol la spas o te mach'a ay bin pasbot, ha nax yu'un te hich ya xchicnaj awu'unic ta stojol Dios te bayel jc'oblalcotic ta awo'tanic.

¹³Ta spisil ini muc'ub q'uinal la jca'iycotic. Ma ha'uc nax te la jta smuc'ul co'tancotic, ha tse'el co'tancotic ta yilel te tse'el yo'tan te Tito, te apisilic la awa'beyic yip yo'tan.

¹⁴Como te bin ut'il la jcalbe te Tito te buen lec ac'oblalic, ma ba la jta q'uexlal yu'un. Hich te bin ut'il melel spisil te bintic la jcalbeyex, ha nix hich melel te bin la jcalbe te Tito te buen lec ac'oblalique.

¹⁵Te Tito bayel to xan c'uxex ta yo'tan te c'alal ya sna' te ach'uhunejic mandar ta apisilic, ha te la awiq'uic ta atojolic soc xiwel soc nihquel.

¹⁶Tse'el co'tan yu'un te ta spisil junix co'tan ta atojolic.