Read Tzeltal 2 Corintios 8 Bible Online

2 Corintios 8 - Tzeltal bible

2 Corintios 8

¹Yo'tic, quermanotac, ya ca'beyex ana'ic bin ut'il chicnajem yutsil yo'tan Dios ta stojol te iglesia te ay ta sq'uinal Macedonia.

²Aunque c'ax bayel swocolic ta uts'inel, ta scuenta bayel stse'elil yo'tanic soc aunque pobrehic, bayel bin la yaq'uic.

³Ho'on ya cal ta testigo te bin ut'il la yaq'uic soc yutsil yo'tanic, ha chican jayeb hu' yu'unic, soc c'ax to xan hich la spasic a te bin ut'il hu' yu'unique.

⁴La yalbotcotic bayel wocol te yacuc x'ac'otic joquincotic ta spasel te a'tel ini ta stojol te mach'atic ch'uhltesbilique.

⁵C'ax hich la yaq'uic a te bin ut'il la jcuycotic te ya xhu' yu'unic yaq'uele, pero nahil la yac' sbahic ta stojol te Cajwaltic, patil ta jtojolcotic, hich te bin ut'il ya sc'an yo'tan te Diose.

⁶Ha yu'un la jcalbecotic wocol te Tito, te hich te bin ut'il hahch spas, te yacuc shu'tes ta pasel ta awohlilic te yutsil a'tel ini.

⁷Ha yu'un hich te bin ut'il ta spisil c'ax bayel ya xhu' awu'unic: ha te ay sch'uhunel awo'tanic, te yac ana'ic c'op, te bin ana'ojic, te jun awo'tanic yac apasic spisil, soc te sc'uxul awo'tanic ta jtojolcotic, ha nix hich ac'a hu'uc awu'unic spasel bayel te yutsil a'tel ini.

⁸Ma yu'unuc ya jpasex ta mandar, ha nax ya jtsajex teme melel ay sc'uxul awo'tanic, teme pajal ay soc te yantique.

⁹Ana'ojiquix te yutsil yo'tan te Cajwaltic Jesucristo, aunque jc'uhlej, ha pobre c'oht ta acuentahic, scuenta yu'un ha'ex jc'uhlejex ya xc'ohex ta scuenta spobrehil.

¹⁰Ta scuenta ini, ya calbeyex te bin lec yac apasic: ayix jun ha'bil te ma ha'uc nax nahil hahch apasic, pero ha nahil hich la sc'an awo'tanic te yac apasique.

¹¹Ha yu'un yo'tic ac'a c'ohtuc ta pasel awu'unic, scuenta yu'un hich te bin ut'il ora la ac'an la apasic, hichuc me yac ahu'tesic spasel, ha chican te bin ay awu'unique.

¹²Como teme nahil ay sc'anojel awo'tanic te yac awaq'uic te mahtanil, ay ta cuenta te bin ay awu'unic, ma ha'uc te bin mayuc awu'unique.

¹³Ma hichuc ya cal ini scuenta yu'un ay mach'atic ay bin ya sta a, yan te ha'exe mayuc bin ay awu'unic, pero te pajaluc ay bin ay awu'unic.

¹⁴Ta ora ini te ay bintic ay awu'unic ya scoltay te mach'atic mayuc bin ay yu'unic, scuenta yu'un teme ay bin ora te mayuc bin ay awu'unic, ha nix hich ya scoltayex te bintic ay yu'unic, scuenta yu'un hich pajal ay bin ay awu'unic a.

¹⁵Hich te bin ut'il ts'ihbabil: Te mach'a bayel bin la stsob, ma ba la spas sobra, soc te mach'a jteb nax bin la stsob, ma ba la spas falta, xchi.

¹⁶Wocol yal Dios te la yac' te hich nix ya sna'ex ta yo'tan te Tito te bin ut'il ya jna'ex ta co'tan te ho'one.

¹⁷Como ma ha'uc nax la sch'uhun te bin la jcalbecotic, te bin ut'il toyol yo'tan, ta scuenta sc'anojel yo'tan baht yilex.

¹⁸Ha ya jticombecotic sjoquin bahel te Tito te jtuhl quermanotic te a'iybil sc'oblal yu'un spisil te iglesiahetic te lec a'tejem yu'un te lec yach'il c'ope.

¹⁹Ma ha'uc nax ini, ha nix hich la yich' tsahel yu'un spisil te iglesia te ya sjoquinotcotic ta behel ta yich'el bahel te mahtanil, te ya jcuentahincotic ta scuenta yich'el ta muc' te Cajwaltic, soc yu'un hich ya xchicnaj a te ya jc'antic te ya jcoltaytique.

²⁰Hich ya jpascotic scuenta yu'un mayuc mach'a ya xhu' ya slehbotcotic jmulcotic yu'un te muc'ul mahtanil te jcuentahinejcotique.

²¹Stojil ya jpascotic, ma ha'uc nax ta stojol Cajwaltic, ha nix hich ta stojol te ants-winiquetique.

²²Soc ya jticombecotic sjoquinic bahel jtuhl quermanotic te bayel buelta quilojcotiquix te jun yo'tan, te hich ya xchicnaj ta scuenta bayel bintic spasoj, soc yo'tic c'ax to xan hich jun yo'tan a ta scaj te bayel smuc'ul yo'tan ta atojolic.

²³Te Tito jun ayon soc, ha jmohlol ta a'tel ta atojolic; yan te quermanotactic, ha ticombilic yu'un te iglesia soc yac'ojic ta ich'el ta muc' te Cristo.

²⁴Ha yu'un a'beya yilic, ta stojol te iglesiahetic, te sc'uxul awo'tanic soc te ay scuentahil te lec ac'oblalic ya ca'iycotique.