Read Tzeltal 2 Corintios 9 Bible Online

2 Corintios 9 - Tzeltal bible

2 Corintios 9

¹Ma fuersahuc ya jts'ihbabeyex sc'oblal te coltayel yu'un te mach'atic ch'uhltesbilic,

²como jna'oj te ay yutsil awo'tanic ta coltaywanej. Calbeyej te yutsil ac'oblalic ta stojol te mach'atic ayic ta sq'uinal Macedonia, la jcalbeyic te ayix jun ha'bil te chapalex ha'ex te ayex ta Acaya; soc te yutsil awo'tanic ha nix hich la stijbe yo'tanic tsobol yantic.

³Pero ya jticon bahel ta atojolic te quermanotactic ini scuenta yu'un ma tojoluc la jtoybeyex ac'oblalic; scuenta yu'un chapalex, hich te bin ut'il la jcale.

⁴Yu'un teme ay macedoniahetic te ya sjoquinonic tal, manchuc ch'ayal awo'tanic a ya xc'oht stahex, te tey ya jtahcotic q'uexlal a, soc nix te ha'exe, te bin ut'il hich jun co'tancotic jch'uhunejcotic.

⁵Ha yu'un la jnop te ya calbe wocol te quermanotactic te ha nahil ya xc'ax yilex soc ya sts'acaytesic te muc'ul mahtanil te awalojic te yac awaq'uic, scuenta yu'un hich chapalix a, te ya yac' ta ilel te jun awo'tanic yac awaq'uic, te ma sujbiluquex cu'uncotic.

⁶Na'ahic ini: Te mach'a jteb nax bin ya sts'un, jteb nax bin ya stsob, soc te mach'a bayel bin ya sts'un, bayel bin ya stsob.

⁷Jujutuhl ac'a yac' ha chican te hich yipal snopoj ta yo'tan te ya yaq'ue, ma ta scuentahuc mel-o'tan o ta sujel, como c'ux ta o'tanil yu'un Dios te mach'a tse'el yo'tan ya yaq'ue.

⁸Soc ya xhu' yu'un te Dios te ya yac' p'ohluc spisil ta chahp bendición ta atojolic, scuenta yu'un spisil ora ay bin ay awu'unic te ya xtuhun awu'unic, hich ya xhu' yac apasic spisil lequil a'teliletic.

⁹Hich te bin ut'il ts'ihbabil: La spucticlan mahtaniletic ta stojol te pobrehetic; sbahtel q'uinal ya xhalaj te stojil ya'tel, xchi.

¹⁰Te mach'a ya ya'be sts'unub te mach'a ya ya'iy ts'umbajel soc te ya ya'be pan te mach'a ya xwe', ha nix ya me yac' sitinuc soc ya me yac' p'ohluc te ts'unubiletic awu'unic, soc ya me yac' xp'ohl te sit yu'un te stojil awa'telic,

¹¹hich ay bayel ta chahp ac'uhlejalic scuenta yu'un spisil ora jun awo'tanic ya xhu' yac awaq'uic. Hich ta jcuentacotic ya me yich' halbeyel wocol Dios yu'un te bintic bayel awac'ojic,

¹²como te bin yac apasic ini, ma ha'uc nax yac awaq'uic yu'un te bin ya spas falta yu'un te mach'atic ch'uhltesbilic, ha yac awaq'uic yu'un te ay tsobolic te ya yalbeyic wocol Dios yu'un a.

¹³Ta scuenta te a'tel ini ya me yalbeyic wocol Dios yu'un te bin ut'il ach'uhunejic spasel te bin ya yal te lec yach'il c'op yu'un Cristo, soc yu'un te bayel awa'beyejic te bin ya xtuhun yu'unic soc spisil yantic.

¹⁴Soc ya me sc'opombeyex Dios te bin ut'il c'uxex ta yo'tanic, ta scaj te bayel yutsil yo'tan Dios te ya xchicnaj ta atojolique.

¹⁵¡Wocol yal Dios yu'un te smahtan te mayuc bin c'an spajbe yutsil stuquele!