Read Tzeltal Gálatas 3 Bible Online

Gálatas 3 - Tzeltal bible

Gálatas 3

¹¡Galaciahetic, ma xana'ic q'uinal! ¿Mach'a la smombeyex awo'tanic scuenta yu'un ma ba yac ach'uhuniquix te smelelil c'op, te ha'ex te jamal a'botex awil ta asitic bin ut'il laj ta cruz te Jesucristo?

²Ha nax ya jc'an te yac awalbonic ca'iy ini: ¿Ha bal la awich'ic te Espíritu ta scuenta spasticlanel te bin ya yal te Ley, o ha bal ta scuenta sch'uhunel te bin la awa'iyique?

³¿Yu'un bal ma xana'ic q'uinal? Te bin ut'il hahchex ta scuenta te Espíritu, ¿yo'tic bal yac ahu'tesic ta scuenta ch'ich'-baq'uet?

⁴¿Tojol bal te c'axix bayel awocolic yu'une? teme melel tojol aye.

⁵Te mach'a ya ya'beyex te Espíritu soc te ya spas jchahp a'teliletic ta awohlilic, ¿ha bal ya spas ta scuenta spasel te bin ya yal te Ley o ta scuenta sch'uhunel te bin yac awa'iyique?

⁶Hich te bin ut'il te Abraham: La sch'uhun bin la yal te Diose, ha ac'ot ta cuenta yu'un te toj ay, xchi sc'oblal.

⁷Ha yu'un na'ahic me te ha yal-snich'nab Abraham te mach'atic ay sch'uhunel yo'tanique.

⁸Te Shun Dios, te bin ut'il nahil yiloj te toj ya x'ilotic yu'un Dios te jyanlumetic ta scuenta sch'uhunel yo'tanic, nahil la yalbe te Abraham te lec yach'il c'op, te hich la yal: Ya me x'a'bot bendición spisil nacionetic ta acuenta, te xchi sc'oblale.

⁹Ha yu'un te mach'atic ay sch'uhunel yo'tanic pajal ya yich'ic bendición soc Abraham te ay sch'uhunel yo'tane.

¹⁰Spisil te mach'atic te ayic ta scuenta spasel bin ya yal te Ley, ayic ta scuenta chopol c'oblalil, como hich ts'ihbabil: Chopol sc'oblalic spisil mach'atic ma ba ya spasic spisil bintic ts'ihbabil ta libro yu'un te Ley, xchi.

¹¹Jamal chican te mayuc mach'a toj ya x'ilot yu'un Dios ta scuenta te Ley, como ya yal: Te mach'a toj yo'tan ya xcuxaj ta scuenta sch'uhunel yo'tan, xchi.

¹²Ta stojol te Ley mayuc sc'oblal te sch'uhunel-o'tanil, como hich ya yal: Te mach'a ya spas spisil ini hich ya xcuxaj a, xchi.

¹³Cristo la scoltayotic loq'uel ta stojol te chopol c'oblalil yu'un te Ley, ha chopol sc'oblal c'oht stuquel ta jcuentatic, (yu'un hich ts'ihbabil: Chopol sc'oblalic spisil mach'atic ya yich'ic johc'anel ta te', xchi),

¹⁴scuenta yu'un ta scuenta Cristo Jesús ya xc'oht ta stojol te jyanlumetic te bendición yich'oj te Abraham, scuenta yu'un ta scuenta sch'uhunel co'tantic ya xhu' ya quich'tic te Espíritu te yaloj Dios te ya ya'botique.

¹⁵Quermanotac, ya calbeyex awa'iyic hich te bin ut'il ay ta pasel yu'un te ants-winiquetique: Teme chahpambilix chapbil-c'op yu'un winic, mayuc mach'a ya xhu' ya slajimbe sc'oblal o te ay bin ya yotses tey a.

¹⁶Bueno, ay bintic yaloj Dios ta stojol Abraham soc te sts'umbale. Ma ba ya yal: soc spisil sts'umbal, ma xchihuc, hich te bin ut'il sc'oblal tsobolic ya'iyel, pero jtuhl nax: soc ats'umbal, xchi, ha te Cristo abi.

¹⁷Ha yu'un ya cal ini: Te Ley te tal jbahc' soc lajuneb scha'winic (430) ha'bil ta patil ma xhu' ya slajimbe sc'oblal te chapbil-c'op nahil schapoj te Dios, te hich ya slajin bin yaloj te Diose;

¹⁸como teme ya xtal ta scuenta te Ley te bin ya x'a'bot yich' hilel, ma ha'uquix ta scuenta te bin yaloj Dios te hichuque; pero Dios la ya'be te Abraham ta scuenta te bin halbil ta hamal yu'une.

¹⁹Ha yu'un ¿banti ya xtuhun te Ley? Ha a'bot ta scaj sc'axuntayel mandar, ha to c'alal tal te sts'umbal Abraham, te ha nix yu'un te bin yaloj ta jamal te Diose; soc ha la yich' aq'uel ta scuenta ch'ul a'batetic, ha a'bot te mach'a ya xc'opoj yu'un te pueblo.

²⁰Te mach'a ya xc'opoj, ma ba ya xc'opoj yu'un jtuhl nax; pero jtuhl nax te Diose.

²¹¿Yu'un bal te Ley ya scontrahin te bintic yaloj te Diose? ¡Ban c'an hichuc! Como te yacuc xhu' ya yac' cuxlejal te Ley, toj ya x'ilotic yu'un Dios ta scuenta sch'uhunel te Ley te hichuque.

²²Pero te Shun Dios ya yal te chucbil yu'un mulil spisil te bahlumilal, scuenta yu'un te bin yaloj Dios ya x'a'botic te mach'atic ya xch'uhunic te Jesucristo.

²³Te c'alal ma to ba talem yorahil a te ya cac' sch'uhunel co'tantic ta stojol Jesucristo, chucbilotic yu'un te Ley, chucbilotic ha to c'alal chicnaj te sch'uhunel-o'tanil ini.

²⁴Ha yu'un te Ley ha jtojobteswanej cu'untic yu'un ya yic'otic ta stojol Cristo, scuenta yu'un toj ya x'ilotic yu'un Dios ta scuenta sch'uhunel co'tantic.

²⁵Te bin ut'il talix yorahil te ya cac' sch'uhunel co'tantic, mayucotiquix ta cuentahinel yu'un te jcanan al-nich'an.

²⁶Apisilic yal-snich'anex Dios ta scuenta bin ut'il ach'uhunejic te Cristo Jesús,

²⁷como apisilic te awich'ojic ha' ta scuenta Cristo, ac'u'inejic te Cristo.

²⁸Mayuquix judío o griego; mayuc moso o mach'a ay ta libre; mayuc winic o ants, como junax c'ohemex ta apisilic ta scuenta Cristo Jesús.

²⁹Teme yu'unex Cristo, hich sts'umbalex Abraham, soc ya x'a'botex awich'ic bendición hich te bin ut'il yaloj te Diose.