Read Tzeltal Gálatas 4 Bible Online

Gálatas 4 - Tzeltal bible

Gálatas 4

¹Te bin ya jc'an ya cal, ha ini: Teme alal to te mach'a ya yich'be hilel sbiluc te stat, pajal c'ohem soc moso, aunque ha yajwal spisil,

²ay ta cuentahinel yu'un jcanantaywanejetic soc jcuentahinwanejetic ha to c'alal ya sta yorahil te chapal yu'un te state.

³Ha nix hichotic, te c'alal alalotic to a, ayotic ta mosohil yu'un te bintic scuenta te bahlumilale.

⁴Pero te c'alal la sta yorahil, Dios la sticon tal te Snich'an, te alatayot yu'un ants soc cuentahinot yu'un te Ley,

⁵scuenta yu'un ya yac' ta libre te mach'atic cuentahimbilic yu'un te Ley, scuenta yu'un ya x'ic'ototic ta al-nich'anil.

⁶Te bin ut'il yal-snich'anex Dios, ha la ya'beyex ta awo'tanic te Espíritu yu'un te Snich'an, te hich ya yal: ¡Abba, Jtat! xchi.

⁷Ha yu'un ma ba mosohatix, ha al-nich'anilatix; soc te bin ut'il al-nich'anilat, Dios la yac' te yac awich'be hilel te bintic ay yu'un ta scuenta Cristo.

⁸Ta nahil to, te c'alal ma ba la ana'beyic sba te Diose, ayex ta mosohil yu'un bintic ma ha'uc diosetic.

⁹Pero yo'tic, te bin ut'il yac ana'beyiquix sba te Diose, o lec xan ya caltic te na'bilexix abahic yu'un Dios, ¿bin yu'un te ya xcha'suhtex xan ta apatic ta stojol te bintic mayuc yip soc te bintic scuenta bahlumilal, te c'an awac' xan abahic ta mosohil yu'un?

¹⁰Yac acanantayic c'ahc'aletic, uhetic, te ya sjel sba snahtil soc scomil c'ahc'al, soc te ha'biletique.

¹¹Ya jxi' te tojol a'tejemon ta awohlilic.

¹²Awocolicuc, quermanotac, hichuc me ya xc'ohex te bin ut'il te ho'one, como ha nix hich c'ohon te bin ut'il ayexe. Mayuc bin chopol la apasbonic,

¹³pues ana'ojic te ta scaj chamel te la jcalbeyex awa'iyic ta shahchibal te lec yach'il c'ope.

¹⁴Aunque c'ax awocolic yu'un te ayon ta chamel, ma ba la ap'ajonic soc ma ba la awihlayonic yu'un, hich la awic'onic te bin ut'il ch'ul a'bat yu'un Dios, hich te bin ut'il Cristo Jesús.

¹⁵¿Banti ayix a te yutsil awo'tanic te ay ta nahil to? Como ya cal ta testigo-c'op, te hu'uc awu'unic, la aloq'ues asitic yu'un yac awa'bonic te hichuque.

¹⁶¿Yu'un bal acontra c'ohemonix yu'un te la jcalbeyex te bin melele?

¹⁷Te yantic xut'et yo'tanic ta atojolic, pero ma ha'uc yu'un alequilic; ha nax ya sc'anic te parte yac awac' abahic ta jtojolcotic, scuenta yu'un ayuc xut'et awo'tanic ta stojolic a.

¹⁸Lec te ay xut'et awo'tanic spisil ora yu'un te bin leque, ma ha'uc nax te c'alal joquinejex a.

¹⁹Cal-jnich'nabex, te yac ta c'axel xan jwocol yu'un yac calataybelex ha to c'alal ya xchicnaj te stalel Cristo ta awo'tanic,

²⁰co'tan ayucon ta awohlilic ta ora ini soc te yacuc xyanij te bin ut'il ya xc'opojon, yu'un xna'et co'tan awu'unic.

²¹Halbonic ca'iy, ha'ex te yac ac'anic cuentahinel yu'un te Ley, ¿ma bal lajuc awa'iyic bin ya yal te Ley?

²²Como ts'ihbabil hilel te ay cheb snich'nab te Abraham, te jtuhle, ha yal te moso-ants, te yane, ha yal te ants ay ta libre.

²³Te yal te moso-ants ayin ta scuenta ch'ich'-baq'uet, yan te yal te ants te ay ta libre, ayin ta scuenta te bin yaloj te Diose.

²⁴Ha sloc'ombahil c'op ini, como te cheb antsetic, ha seña yu'un te cha'chahp chapbil-c'op; te jchahp tal ta wits Sinaí te la yalatay te mach'atic ayic ta mosohil; ha te Agar.

²⁵Como te Agar, ha te wits Sinaí te ay ta sq'uinal Arabia, soc pajal c'ohem soc te Jerusalén te ay ta ora ini te pajal ay ta mosohil soc te yalataque.

²⁶Yan te Jerusalén ta toyol, libre ay stuquel, ha jnantic te ho'otique,

²⁷como hich ts'ihbabil: ¡Tse'eluc me awo'tan, ha'at jma'alat te ma ba alajemat; awonan soc yutsil awo'tan, ha'at te ma ba yac awa'iybe sc'uxul alajel! como c'ax hich ay yalatac a te ants te ihquitaybil te bin ut'il te ants te ay smamalal, xchi.

²⁸Ha yu'un, quermanotac, ho'otic al-nich'anotic ta scuenta te bin yaloj Dios, hich te bin ut'il Isaac.

²⁹Pero hich te bin ut'il ta namey, te mach'a ayin ta scuenta ch'ich'-baq'uet la yuts'in te mach'a ayin ta scuenta te Espíritu, ha nix hich ta ora ini.

³⁰Pero ¿bin ya yal ta Shun Dios?: Tena loq'uel soc yal te moso-ants, como ma pajaluc ya x'a'bot yich' hilel bintic ay yu'un te stat soc te yal te ants te libre ay, xchi.

³¹Ha yu'un, quermanotac, ma ha'uc yalotic te moso-ants, ha yalotic te ants te libre ay.