Read Tzeltal Efesios 3 Bible Online

Efesios 3 - Tzeltal bible

Efesios 3

¹Ha scuentahil ho'on, Pablohon, te ayon ta chuquel ta scaj Cristo Jesús ta acuentahic ha'ex te jyanlumex...

²Awa'iyejic te a'boton ca'tel ta atojolic yu'un yalbeyel sc'oblal te yutsil yo'tan Dios,

³ha a'boton jna' te bin muquen ay, hich te bin ut'il la jts'ihbayix cha'oxp'ahl.

⁴Te c'alal yac awilic bin la jts'ihbay, tey me yac ana'ic a te ya jna' te bin muquen ay sc'oblal te Cristo,

⁵ha te bin ma hichuc a'bot sna'ic te cajalcaj ts'umbalil, hich te bin ut'il a'bot sna'ic yu'un te Espíritu te ch'ul jpuc-c'opetic soc te jalwanejetique.

⁶Te bin muquen ay, ha te bin ut'il ta scuenta te lec yach'il c'op te jyanlumetic pajal sjelol stat soc Israel, junax sbaq'uetal schebalic, soc pajal ya yich'ic te bin yaloj Dios ya yac' ta scuenta Cristo Jesús.

⁷Ha a'bat c'ohemon yu'un te lec yach'il c'op ini ta scaj te yutsil mahtanil yu'un Dios te la ya'bon ta scuenta te ya'tel te yu'ele.

⁸Te ho'on te peq'uel ayon yu'un spisil mach'atic ch'uhltesbilic, a'boton te yutsil mahtanil ini, ha te ya calbe te jyanlumetic te lec yach'il c'op yu'un te c'uhlejaliletic yu'un Cristo te ma xhu'ic ta ahtayel,

⁹soc te jamal ya calbe spisilic bin ut'il ya xc'oht ta pasel te bin nameyix mucul ta yo'tan Dios, te la spas spisil bintic ay,

¹⁰scuenta yu'un ta ora ini, ta scuenta te iglesia, spisil mach'atic ayic ta ch'ulchan te ay yu'elic soc te ay ya'telic ya me x'a'bot sna'ic te c'ax bayel sp'ijil yo'tan te Diose,

¹¹hich te bin ut'il ta sbahtel q'uinal chapal yu'un Dios te la yac' c'ohtuc ta pasel ta scuenta te Cajwaltic Cristo Jesús.

¹²Ta scuenta Cristo soc ta scuenta sch'uhunel co'tantic ta stojol, jun co'tantic ya xhu' ya xnohpojotic ta stojol Dios.

¹³Ha yu'un ya calbeyex wocol te ma me xpehc'aj awo'tanic yu'un te bin ut'il ay jwocol ta acajic, yu'un tey yac ata awutsilalic a.

¹⁴Ha scuentahil te ya jquejan jba ta stojol te Stat te Cajwaltic Jesucristo,[1]

¹⁵(te ha yich'beyejic sbihil spisil ta chahp te mach'atic ayic ta ch'ulchan soc ta bahlumilal),

¹⁶ya jc'ambe te yacuc ya'beyex, hich te bin ut'il te sc'uhlejal te yutsilal, yu'un yacuc yich' yip awo'tanic ta scuenta te Espíritu yu'un;

¹⁷soc te yacuc xnahin ta awo'tanic te Cristo ta scuenta sch'uhunel awo'tanic, scuenta yu'un, te bin ut'il lop'inemex soc awich'oj awipic tey ta c'uxul-o'tanil,

¹⁸ya xhu' awu'unic sna'el ta lec, soc spisil mach'atic ch'uhltesbilic, bin ut'il ay sjamalil, snahtil, sc'ubulil soc stoyolil te sc'uxul yo'tan Cristo,

¹⁹soc te ya xhu' awu'unic sna'beyel sba te sc'uxul yo'tan te c'ax hich a te bin ut'il ya xhu' ta na'el, scuenta yu'un ts'acal yac awich'ic spisil bintic ay yu'un Dios.

²⁰Te Mach'a te ha ta scuenta yu'el te c'ax hich ya xhu' yu'un spasel ta jtojoltic a te bin ya jc'ambetic o te ya xtal ta co'tantic,

²¹ha ac'a yich' halbeyel yutsilal ta iglesia soc ta scuenta Cristo Jesús ta spisil ta caj ts'umbalil, ta sbahtel q'uinal. Hichuc.