Read Tzeltal Filipenses 1 Bible Online

Filipenses 1 - Tzeltal bible

Filipenses 1

¹Pablo soc Timoteo, a'batetic yu'un te Jesucristo, ta stojol spisil te mach'atic ch'uhltesbilic te ayic ta stsojol Cristo Jesús ta Filipos, soc te obispohetic soc te diáconohetique.

²Ayuc me yutsil-o'tanil soc lamal q'uinal ta atojolic yu'un te Jtatic Dios soc yu'un te Cajwaltic Jesucristo.

³Te c'alal ya jna'ex, ya calbe wocol te Dios cu'un ta acuentahic.

⁴Tse'el co'tan ya jc'opombeyex Dios spisil ora ta apisilic,

⁵yu'un te jmohlol jbahtic ta a'tel ta scuenta te lec yach'il c'op c'alal ta shahchibal c'alal ora ini.

⁶Sch'uhunej co'tan te mach'a la shach te lequil a'tel ta atojolic, ya me shu'tes bahel ha to c'alal ya sta sc'ahc'alel yu'un te Jesucristo.

⁷Ha lec te hich ya ca'iyex ta co'tan ta apisilic, yu'un ayex ta co'tan; yu'un teme ayon ta cárcel o teme ya xc'opojon yu'un te lec yach'il c'op soc te ya cac' ta na'el te ha melel, pajal quich'beyejtic yutsil yo'tan te Diose.

⁸Ha testigo cu'un te Dios te bayel yac jna'belex apisilic ta scuenta te yutsil sc'uxul yo'tan te Jesucristo.

⁹Ha ya jc'opombeyex Dios yu'un te behbehuc yac ta p'ohlel te sc'uxul awo'tanic yu'un te bintic ay ta na'el soc sna'beyel scuentahil,

¹⁰scuenta yu'un hich yac atsahic a te bin lec, scuenta yu'un mayuc awa'baquilic soc mayuc bin quechel ta acuentahic a ta yorahil sc'ahc'alel te Cristo,

¹¹te nojelex ta sit yu'un te bintic stojil ta pasel te ya xtal ta scuenta Jesucristo, scuenta yutsilal soc yalbeyel yutsil sc'oblal te Diose.

¹²Quermanotac, ya jc'an te yac ana'ic te c'ax hich yac ta puhquel bahel te lec yach'il c'op yu'un te bin pasbilone.

¹³Ha scuentahil te chicanix ta spisil te pretorio soc spisil yantic te chuculon ta scuenta Cristo.

¹⁴Soc ay tsobol quermanotactic te tey la yich' xan yip yo'tanic a ta scuenta te Cajwaltic yu'un te bin ut'il chuculon, mayuc xiwel yu'unic a ya yaq'uic xan fuersa ta yalel te sc'op Diose.

¹⁵Melel ay nix mach'atic te ya spucbeyic sc'oblal Cristo ta scuenta il-o'tantaywanej soc ta scuenta tsaltamba; pero ay yantic te ya spasic soc sc'anojel yo'tanic.

¹⁶Ha'ic ini ya spasic ta scuenta sc'uxul yo'tanic, yu'un sna'ojic te ac'bilon li'i yu'un ya xc'opojon yu'un te lec yach'il c'ope.

¹⁷Te yantique ya spucbeyic sc'oblal Cristo ta scuenta tsaltamba, ma ha'uc soc spisil yo'tanic, ya scuyic te ya ya'bonic xan jwocol yu'un te ayon ta chuquel.

¹⁸¿Bin cochel a? Ha nax ay sc'oblal te ya yich' halbeyel sc'oblal te Cristo, teme smacoj sba ta c'op a o teme melele; ha tse'el co'tan yu'un, soc tse'el co'tan spisil ora,

¹⁹como jna'oj te ta scuenta te yac ac'opombonic Dios soc ta scuenta te ya scoltayon te Espíritu yu'un Jesucristo, ha ya yac' te ya xcolon ta libre.

²⁰Ha ya sc'an co'tan soc ha smuc'ul co'tan te mayuc bin ya jta q'uexlal yu'un, pero socuc yip co'tan ta ora ini, hich te bin ut'il ta spisil ora, yacuc x'ich'ot ta muc' Cristo ta scuenta jbaq'uetal, teme cuxulon o teme ya xchamone,

²¹como ha jcuxlejal te Cristo, soc teme ya xchamon, ha jganar.

²²Pero teme ya to xcuxajon ta jbaq'uetal, te hich ya jta xan sit te ca'tele, ma jna' banti ya jtsa.

²³Ta schebal ma jna' ban ya jtsa; co'tanuc te ya xloc'on bahel, te ya joquin te Cristo, ha c'ax lec xan ya ca'iy a.

²⁴Pero bayel xan sc'oblal te ya xhilon ta jbaq'uetal ta acuentahic.

²⁵Te bin ut'il hich jch'uhunej, ya jna' te ya xhilon, ya to joquinex xan ta apisilic yu'un alequilic soc yu'un ayuc xan stse'elil awo'tanic yu'un te bin ach'uhunejic,

²⁶scuenta yu'un bayel awutsilalic cu'un ta scuenta Cristo Jesús yu'un te ayon ta awohlilic yan buelta.

²⁷Ha nax ya calbeyex wocol te hichuc ya x'ayinex te bin ut'il ya sc'an te lec yach'il c'op yu'un Cristo, scuenta yu'un teme ya xtal quilex o ma ba ya xtal quilex, ya me ca'iybeyex ac'oblalic te jun awo'tan abahic soc te pajal yaquex ta ya'beyel yipal yu'un sch'uhunel te lec yach'il c'op,

²⁸te ma ba yac axi'ic te mach'atic ya scontrahinexe; tey ya xchicnaj a te ch'ayel ya xbahtic, yan te ha'exe ya xcolex; ha yu'un Dios ini.

²⁹Como ma hipuc a te a'botex te yac ach'uhunic te Cristo, ha nix hich a'botex te ya xc'ax awocolic ta scuenta,

³⁰te hich nix yac ta c'axel awocolic te awilojic te c'ax ta jtojol, soc yac awa'iyic te ay ta jtojol ta ora ini.