Read Tzeltal 1 Tesalonicenses 3 Bible Online

1 Tesalonicenses 3 - Tzeltal bible

1 Tesalonicenses 3

¹Ha yu'un, te bin ut'il ma ba cuhchix cu'uncotic, la jchapcotic te jtuquel ya xhilotcotic ta Atenas.

²Ha la jticoncotic bahel te quermanotic Timoteo, te a'bat yu'un Dios soc jmohlolcotic ta a'tel yu'un te lec yach'il c'op yu'un Cristo, scuenta yu'un ya ya'beyex yip awo'tanic soc smuc'ul awo'tanic ta sch'uhunel te Diose,

³scuenta yu'un ma me ayuc mach'a ya smel yo'tan yu'un a te wocoletic ini, como ana'ojic te hich nix ya xc'ax ta jtojoltic a.

⁴Como te c'alal joquexcotic to a, la jcalbeyexcotic te ya me xc'ax jwocoltic ta uts'inel; hich nix c'oht ta pasel a, hich te bin ut'il ana'ojique.

⁵Ha yu'un te bin ut'il ma ba cuhchix cu'un la jca'iy, la jticon ta joc'oyel bin ut'il ay te sch'uhunel awo'tanic, yu'un la jxi' te ay wan yac ach'uhunic sujel yu'un te jsujawal, hich tojol ya xc'oht te ca'telcotique.

⁶Pero te c'alal suht talel te Timoteo te c'oht yilex, hul yal ca'iycotic lec sc'oblal te sch'uhunel awo'tanic soc te sc'uxul awo'tanic, soc te spisil ora bayel yutsil awo'tanic yac ana'belotcotic, te awo'tanicuc yac awilotcotic, hich te bin ut'il co'tanuc ya quilexcotique.

⁷Ha yu'un, quermanotac, aunque ay jwocolcotic soc mel-o'tan, muc'ub q'uinal la jca'iycotic c'alal la jna'cotic bin ut'il ay te sch'uhunel awo'tanique.

⁸Hich cuxulotcotic xan la jca'iycotic te bin ut'il la jna'cotic te jun awo'tanic ta stojol te Cajwaltique.

⁹Ha yu'un ¿bin ya xhu' ya calcotic xan ta yalbeyel wocol Dios ta acuentahic, yu'un bayel stse'elil co'tancotic ta acuentahic ta stojol te Dios cu'untique?

¹⁰Ta spisil co'tancotic yac calbecotic wocol Dios c'ahc'al ahc'abal yu'un te yacuc quilbeyexcotic asitic, soc te yacuc jts'acaytesbeyexcotic te bin ya to sc'an te sch'uhunel awo'tanique.

¹¹Ha nix te Jtatic Dios soc te Cajwaltic Jesucristo ac'a schahpan bin ut'il ya xbohotcotic te banti ayexe.

¹²Te Cajwaltic ac'a yac' muc'ubuc soc p'ohluc bin ut'il c'ux yac awa'iy abahic ta awo'tanic soc te sc'uxul awo'tanic ta stojol spisilic, hich te bin ut'il yac jpasbelcotic ta atojolic.

¹³Te Cajwaltic ac'a ya'beyex yip awo'tanic scuenta yu'un hich mayuc amulic a soc ch'ultesbilex ya xc'ohex ta stojol te Jtatic Dios te c'alal ya xtal te Cajwaltic Jesucristo soc spisil te mach'atic yu'un te ch'ultesbilique.