Read Tzeltal 1 Tesalonicenses 5 Bible Online

1 Tesalonicenses 5 - Tzeltal bible

1 Tesalonicenses 5

¹Quermanotac, ma fuersahuc ya jts'ihbabeyex sc'oblal te bin ora soc te bin yilel q'uinal a,

²como ana'ojic ta lec te sc'ahc'alel te Cajwaltic hich ya xtal te bin ut'il j'elec' ta ahc'abal.

³Te c'alal hich ya yalic: Lamal q'uinal, lec ay spisil, repente nax ya xtal jinel ta stojolic, hich te bin ut'il ya xhahch sc'uxul c'alal ya x'ayin yal te antse, ma ba ya xhu' ya x'ahnic loq'uel.

⁴Yan te ha'exe, quermanotac, ma ba ayex ta yihc'al q'uinal, yu'un te ch'ayal awo'tanic a ya xtal sc'ahc'alel hich te bin ut'il j'elec'.

⁵Como apisilic yal-snich'nabex te sacal q'uinal soc yal-snich'nabex te c'ahc'alel. Ma ba yu'unotic te ahc'abal soc ma ba yu'unotic te yihc'al q'uinale.

⁶Ha yu'un ma me xwayotic hich te bin ut'il te yantique, wiq'uiluc me jsitic soc p'ijuc me x'ayinotic.

⁷Como te mach'atic ya xwayic, ta ahc'abal ya xwayic, soc te mach'atic ya xyacubic, ta ahc'abal ya xyacubic.

⁸Yan te ho'otic te yu'unotic te c'ahc'alel, p'ijuc me x'ayinotic, ac'a jlaptic te smahquil jtahntic, ha te sch'uhunel co'tantic soc te sc'uxul co'tantic, soc ac'a jlaptic te smahquil joltic, ha te smuc'ul co'tantic yu'un te colele.

⁹Como te Dios ma ba la stsahotic yu'un ya quich'tic castigo, ha la stsahotic yu'un te ya jtahtic colel ta scuenta te Cajwaltic Jesucristo,

¹⁰ha te mach'a laj cu'untic scuenta yu'un teme cuxulotic o wayem jbaq'uetaltic a pajal ya xcuxajotic soc.

¹¹Ha yu'un talel c'axel me xamuc'ubtesbe aba q'uinal awa'iyic soc talel c'axel me xawa'be aba yip awo'tanic, hich nix te bin ut'il yac apasbelique.

¹²Ya calbeyexcotic wocol, quermanotac, ich'ahic ta cuenta te mach'atic yacalic ta a'tel ta awohlilic, te ya scuentahinex ta scuenta Cajwaltic soc te ya stsitsexe.

¹³Ich'ahic ta muc' soc c'ux me xawa'iyic ta awo'tanic ta scaj te ya'telique. Lamaluc me q'uinal ta awohlilic.

¹⁴Soc ya calbeyexcotic wocol, quermanotac, tsitsahic te mach'atic ch'ajic, a'beyahic smuc'ul yo'tanic te mach'atic mayuc yip yo'tanic, coltayahic te mach'atic mayuc yipic, soc cuhchuc me awu'unic spisilic.

¹⁵Tsahtayahic te mayuc mach'a ya sutbe spacol te bin chopol ya xpasbot, pero spisil ora talel c'axel xapasbe abahic te bin lec soc nix spisil te yantique.

¹⁶Spisiluc me ora tse'el awo'tanic.

¹⁷A'telinahic me sc'oponel Dios.

¹⁸Halbeyahic wocol Dios ta spisil bintic ya xc'oht ta pasel ta atojol, yu'un hich ya sc'an yo'tan Dios ta atojolic ta scuenta Cristo Jesús.

¹⁹Ma me xatup'ic te Espíritu.

²⁰Ma me xap'ajic te sc'op-jalwanej.

²¹Tsahtayahic spisil, ich'ahic te bin leque.

²²Coma abahic yu'un spisil bintic chopol.

²³Te Dios yu'un lamal q'uinal ts'acal ac'a sch'ultesex; soc ac'a yich' canantayel spisil acuxlejalic, ha te espíritu awu'unic, ach'uhlelic soc abaq'uetalic, te mayuc amulic a te c'alal ya xtal te Cajwaltic Jesucristo.

²⁴Stalel jun yo'tan te Mach'a ya yiq'uex ta stojol, ya me xc'oht ta pasel yu'un.

²⁵Quermanotac, c'opombotcotic me Dios.

²⁶Patbeya yo'tanic spisil te quermanotactic ta scuenta ch'ul uts'uyel.

²⁷Tulan ya calbeyex ta scuenta Cajwaltic te ya me yich'ic ilel te carta ini ta stojol spisil te quermanotactique.

²⁸Ac'a sjoquinex te yutsil yo'tan te Cajwaltic Jesucristo. Hichuc.