Read Tzeltal Josué 13 Bible Online

Josué 13 - Tzeltal bible

Josué 13

¹Mamalix a te Josué, ayix bayel ya'bilal a te c'alal hich halbot yu'un Jehová: Mamalatix, bayelix awa'bilal, ay to bayel q'uinal quechel hilel ta u'untayel.

²Hich ay te q'uinal te quechele: spisil te sq'uinal filisteohetic soc spisil sq'uinal te gesureohetic,

³c'alal Sihor te ay ta stojol banti ya xloc' tal c'ahc'al yu'un Egipto, ha to ta sti'il Ecrón ta stojol norte, te ha yu'un cananeohetic ta halele; te sq'uinal te ho'tuhl ajwaliletic filisteohetic ta Gaza, Asdod, Ascalón, Gat soc Ecrón; soc nix te sq'uinal te aveohetic

⁴te ay ta stojol sur; ha spisil sq'uinal te cananeohetic, soc Mehara te ha yu'un te sidonetic, c'alal ta Afec, ha to c'alal ta sti'il te amorreohetic;

⁵te sq'uinal te gibletic, soc spisil te Líbano ta stojol banti ya xloc' tal c'ahc'al, c'alal ta Baal-gad te ay ta ye'tal wits Hermón, ha to c'alal ta yochibal Hamat.

⁶Ho'on ya jloq'ueslan ta stojol te snich'nab Israel spisil mach'atic nahinemic ta witsiltic c'alal Líbano ha to ta Misrefot-maim soc spisil te sidonetique. Ha'at nax yac apucticlambe te q'uinal te snich'nab Israel, hich te bin ut'il la jpasat ta mandar.

⁷Pucbeya hiche te q'uinal ini te balunchahp soc te j'ohlil yu'un Manasés, xchi.

⁸Como te j'ohlil xan yu'un Manasés, te Rubén, soc te Gad la yich'iquix sq'uinalic stuquel te a'botic yu'un Moisés ta stojol banti ya xloc' tal c'ahc'al yu'un Jordán, hich te bin ut'il a'botic yu'un Moisés te a'bat yu'un Jehová:

⁹ha te q'uinal c'alal Aroer te ay ta sti'il uc'um Arnón, soc te pueblo ay ta yohlil te sjuclej, soc spisil te toyol spamlej yu'un Medeba, ha to c'alal Dibón;

¹⁰spisil te pueblohetic yu'un Sehón ajwalil yu'un te amorreohetic, te la ya'iy cuentahinwanej ta Hesbón, ha to c'alal ta smojon te amonetic;

¹¹soc Galaad, te sq'uinal gesureohetic soc te maacateohetic, spisil te wits Hermón soc spisil te sq'uinal Basán c'alal ta Salca;

¹²spisil te banti scuentahinej te Og ta Basán, te ay ta ajwalil ta Astarot soc ta Edrei. Te Og ha xanix hil yu'un te refahetic te tsalticlambilic yu'un Moisés soc te tenotic loq'uel yu'un ta sq'uinalic.

¹³Pero te gesureohetic soc te maacateohetic ma ba la yich'ic loq'uesel yu'un te snich'nab Israel, te Gesur soc Maaca nahinemic ta yohlil te israeletic c'alal ora.

¹⁴Pero te sts'umbal Leví ma ba a'bot sq'uinalic; te milbil mahtaniletic yu'un Jehová te Dios yu'un Israel, ha sq'uinalic c'oht, hich te bin ut'il halbotic yu'un.

¹⁵Te Moisés la ya'be sq'uinalic te sts'umbal Rubén, ha chican te jaychahp ayique.

¹⁶Te sq'uinalic hahch ta Aroer te ay ta sti'il uc'um Arnón, soc te pueblo te ay ta yohlil te sjuclej, soc spisil te toyol spamlej c'alal ta Medeba;

¹⁷te Hesbón soc spisil te pueblohetic ayic ta toyol spamlej; Dibón, Bamot-baal, Bet-baal-meón,

¹⁸Jahaza, Cademot, Mefaat,

¹⁹Quiriataim, Sibma, Zaret-sahar, te ay ta wits yu'un te spamlej,

²⁰Bet-peor, te sch'uht wits Pisga, Bet-jesimot,

²¹ha spisil te pueblohetic ta toyol spamlej soc spisil te q'uinal te banti la scuentahin te Sehón ajwalil yu'un te amorreohetic, te la ya'iy cuentahinwanej ta Hesbón, ha te tsalot yu'un Moisés, te ha nix la stsal te príncipaletic yu'un Madián, Evi, Requem, Zur, Hur soc Reba, ha te príncipaletic yu'un Sehón, te nahinemic tey a.

²²Te snich'nab Israel ha nix hich la smilic ta espada te Balaam te jna'ojel, te snich'an Beor.

²³Te muc'ul-ha' Jordán ha sti'il c'oht yu'un te sq'uinal te snich'nab Rubén. Hich ay te sq'uinal te snich'nab Rubén, ha chican jaychahp ayic, soc te muc'ul pueblohetic soc tut pueblohetic yu'unique.

²⁴Ha nix hich te Moisés la yac'ticlambe q'uinal te sts'umbal Gad, ha chican jaychahp ayic.

²⁵Ha sq'uinalic c'oht te Jazer, spisil te pueblohetic yu'un Galaad, j'ohlil te sq'uinal te snich'nab Amón c'alal ta Aroer te snuhp'usitayej sba soc Rabá,

²⁶soc c'alal Hesbón ha to ta Ramat-mizpa, Betonim, soc c'alal Mahanaim ha to ta smojon Debir;

²⁷soc ta spamlej, ha te Bet-aram, Bet-nimra, Sucot soc Zafón, te j'ohlil xan sq'uinal banti la scuentahin te Sehón ajwalil yu'un Hesbón. Ha sti'il te muc'ul-ha' Jordán c'alal ta mar Cineret ta sjehchelul Jordán ta stojol banti ya xloc' tal c'ahc'al.

²⁸Hich ay sq'uinalic te snich'nab Gad ta scuenta jujuchahp, soc te muc'ul pueblohetic soc tut pueblohetic yu'unique.

²⁹Ha nix hich te Moisés la ya'be sq'uinal te j'ohlil sts'umbal Manasés, ha chican te jaychahp ayique.

³⁰Te sq'uinalic hahch bahel ta Mahanaim, spisil te Basán, ha spisil banti scuentahinej te Og ajwalil yu'un Basán, soc spisil te pueblohetic yu'un Jair te ayic ta Basán, oxwinic (60) pueblohetic;

³¹soc j'ohlil te Galaad, Astarot soc Edrei, ha pueblohetic banti scuentahinej te Og ta Basán; ha yu'un c'oht te j'ohlil te snich'nab Maquir snich'an Manasés, ha chican te jaychahp ayique.

³²Ha te q'uinal te Moisés la spucticlan te c'alal ay ta spamlej yu'un Moab, ta sjehchelul te muc'ul-ha' Jordán ta stojol banti ya xloc' tal c'ahc'al yu'un Jericó.

³³Yan te jchahp yu'un Leví ma ba a'bot sq'uinal stuquel yu'un te Moisés; te Jehová te Dios yu'un Israel ha me sq'uinalic c'ohem, hich te bin ut'il halbotic yu'une.