Read Tzeltal Josué 14 Bible Online

Josué 14 - Tzeltal bible

Josué 14

¹Hich ay te q'uinal te la yich'ic te snich'nab Israel ta sq'uinal Canaán, te puctilambotic yu'un te sacerdote Eleazar, Josué snich'an Nun, soc te jolaletic yu'un te jujuchahp snich'nab Israel.

²La yich' pucticlanel te q'uinal ta scuenta spasbeyel seña ta na'el, hich te bin ut'il Jehová la spas ta mandar te Moisés te ya yich'ic te balunchahp soc ohlil.

³Como te Moisés ya'beyejix sq'uinalic te cha'chahp soc ohlil ta jehch muc'ul-ha' Jordán; yan te levitahetic ma ba la ya'be sq'uinalic stuquel ta yohlil te yantique.

⁴Te snich'nab José cha'chahp loc' a, ha te Manasés soc Efraín. Te levitahetic mayuc q'uinal a'botic, ha nax a'botic pueblohetic te banti ya xnahinic soc aquiltic yu'un te wacaxetic, tuminchijetic soc tentsunetic yu'unic.

⁵Hich te bin ut'il pasot ta mandar yu'un Jehová te Moisés, hich la spasic te snich'nab Israel ta spucticlanel te q'uinale.

⁶Te snich'nab Judá bahtic ta banti ay te Josué ta Gilgal; te Caleb snich'an Jefone te cenezeo-winic, hich c'oht yalbe: Ha'at ana'oj te bin halbot yu'un Jehová te Moisés te winic yu'un Dios ta Cades-barnea, te la yal ta jcuentatic ta jchebaltic.

⁷Ayix cha'winic (40) ca'bilal a te c'alal Moisés te a'bat yu'un Jehová la sticonon bahel ta Cades-barnea ta stsahtayel te q'uinale; hich tal calbe te bin la yal te co'tane.

⁸Yan te quermanotac te sjoquinejonic bahel c'oht xiwtesbe yo'tanic te pueblo, yan te ho'one jun co'tan ta stojol Jehová te Dios cu'un.

⁹Ha yu'un ta hich ora te Moisés jc'axel la yal ta jamal: Te q'uinal ta banti c'oht abehentay, ha'at awu'un ya xc'oht soc anich'nab sbahtel q'uinal, ta scuenta te jun awo'tan ta stojol Jehová te Dios cu'un, xchi.

¹⁰Yo'tic, hich te bin ut'il la yal te Jehová, la yac' te ya scuxajon ho'eb yoxwinic (45) xan ha'bil, c'alal te bin ora hich halbot yu'un Jehová te Moisés, te c'alal yac ta behel ta jochol taquin q'uinal a te Israel. Ta ora ini ayix ho'eb yo'winic (85) ca'bilal.

¹¹Pero hich nix quip ta ora ini te bin ut'il te c'alal la sticonon bahel te Moisés; stalel ay quip ta ora ini, ya to xhu' cu'un guerra soc loq'uel bahel soc suhtel talel.

¹²A'bon hiche te wits ini te halbot sc'oblal yu'un Jehová ta hich ora; como ta hich ora ha'at la awa'iy te tey ayic a te sts'umbal Anac soc te ay muc'ul pueblohetic te ay sts'aculique. Teme sjoquinejon te Jehová, ya jtenticlan loq'uel hich te bin ut'il yaloj te Jehová, xchi te Caleb.

¹³Ha yu'un te Josué la ya'be bendición soc la ya'be sq'uinalin Hebrón te Caleb snich'an Jefone.

¹⁴Hich te Hebrón ha sq'uinal c'oht te Caleb snich'an Jefone te cenezeo-winic c'alal ora, ta scuenta te jun yo'tan hil ta stojol Jehová te Dios yu'un Israel.

¹⁵Te sbihil te Hebrón ta nahilal ha Quiriat-arba, como te Arba ha jtuhl winic te muc' sc'oblal ta yohlil te sts'umbal Anac. Hich la scux yo'tan yu'un guerra te q'uinale.