Read Tzeltal Josué 16 Bible Online

Josué 16 - Tzeltal bible

Josué 16

¹Te ban c'oht ta scuenta te sts'umbal José ta scuenta spasbeyel seña ta na'el, ya xhahch bahel ta muc'ul-ha' Jordán ta nopol Jericó, ta stojol banti ya xloc' tal c'ahc'al yu'un te ha'etic yu'un Jericó, tey ya xc'ax bahel ta jochol taquin q'uinal, ya xmo bahel ta witsiltic c'alal ta Bet-el.

²Ta Bet-el ya xloc' bahel ta Luz,[17] ya xc'ax ta sq'uinal arquetic c'alal ta Atarot;

³ya xco bahel ta stojol banti ya xmahl c'ahc'al ta sq'uinal te jafletic, c'alal ta sti'il Bet-horón te ay ta ahlan, ha to c'alal ta Gezer, ya xc'oht ta loq'uel ta mar.

⁴Hich la yich'ic sq'uinalic te snich'nab José, ha te Manasés soc Efraín.

⁵Te q'uinal yu'un te snich'nab Efraín, ta scuenta te jujuchahp yu'unic, hich ay: te sti'il sq'uinal ta stojol banti ya xloc' tal c'ahc'al, ha ya xhahch bahel ta Atarot-adar c'alal ta Bet-horón te ay ta ahc'ol,

⁶ya xbaht c'alal ta mar,[18] soc c'alal Micmetat ta stojol norte, ya yac' buelta ta stojol banti ya xloc' tal c'ahc'al c'alal ta Tanaat-silo, tey ya xc'ax bahel ta Janoa.

⁷Ta Janoa ya xco bahel ta Atarot soc ta Naarat, ya sta Jericó soc ya xc'oht ta loq'uel ta muc'ul-ha' Jordán.

⁸Ta Tapúa ya xbaht ta stojol banti ya xmahl c'ahc'al c'alal ta uc'um Caná, ya xc'oht ta loq'uel ta mar. Hich ay te q'uinal yu'un te sts'umbal Efraín ta scuenta te jujuchahp ayique.

⁹Soc te pueblohetic te a'botic te snich'nab Efraín ta yohlil sq'uinal te snich'nab Manasés, spisil te pueblohetic soc te tut pueblohetic yu'unic.

¹⁰Pero te snich'nab Efraín ma ba la stenic loq'uel te cananeohetic te nahinemic ta Gezer, ha scuentahil te hilem te cananeohetic ta yohlilic c'alal ora, pero ay ta a'batinel yu'unic.