Read Tzeltal Josué 20 Bible Online

Josué 20 - Tzeltal bible

Josué 20

¹Te Jehová la yalbe te Josué:

²Halbeya te snich'nab Israel: Tsahahic te pueblohetic yu'un ahnibal, ha te la jcalbeyex sc'oblal ta scuenta Moisés,

³scuenta yu'un tey ya xhu' ya xbaht ta ahnel a te mach'a ma yolojuc a ya smil yan, te ma ba snopoj ta yo'tan te ya spase. Ha ya xtuhun awu'unic scuenta ahnibal yu'un te mach'a ya sc'an ya ya'be spacol yu'un te ch'ich'e.

⁴Te mach'a ya xbaht ta ahnel ta bayuc ahnibal pueblo, ya stehc'an sba ta yochibal te pueblo, ya yalbe ya'iyic te mamaletic yu'un te pueblo bin yu'un te taleme; ha ya yiq'uic ochel ta pueblo soc ya ya'beyic banti ya xhu' ya xnahin tey a.

⁵Teme tal ta lehel yu'un te mach'a ya c'an ya'be spacol te ch'ich'e, ma ba ya yaq'uic ta c'abal te jmilawe, como ma yolojuc a la smil te spat-xuhc, mayuc yilintayej sba soc ta nahil to.

⁶Ya xhil ta pueblo ha to c'alal ya stehc'an sba ta ich'el ta c'op ta stojol te tsoblej soc ha to c'alal ya xcham te mach'a ay ta muc'ul sacerdotehil a; ha to ya xhu' ya suht bahel a te jmilaw ta sna soc ta pueblo yu'un, ha te pueblo banti loc' tal ta ahnel, xchi.

⁷Ha yu'un la stsahic te Cedes ta Galilea te ay ta witsiltic yu'un Neftalí; te Siquem te ay ta witsiltic yu'un Efraín; soc te Quiriat-arba (ha te Hebrón) te ay ta witsiltic yu'un Judá.

⁸Ta jehch ha' Jordán, ta stojol banti ya xloc' tal c'ahc'al yu'un Jericó, la stsahic te Beser te ay ta jochol taquin q'uinal, ta spamlej yu'un te jchahp yu'un Rubén; te Ramot te ay ta Galaad yu'un te jchahp yu'un Gad; soc te Golán te ay ta Basán yu'un te jchahp yu'un Manasés.

⁹Ha te pueblohetic tsahbilic te ya xtuhun yu'un spisil te snich'nab Israel soc te jyanlum winiquetic te ya xnahinic ta yohlilic, scuenta yu'un tey ya xhu' ya xbaht ta ahnel mach'ayuc a te ma yolojuc a ya smil yan, scuenta yu'un ma ba ya xmilot yu'un te mach'a ya c'an ya'be spacol te ch'ich'e, ha to c'alal ya stehc'an sba ta stojol te tsoblej.