Read Tzeltal Josué 21 Bible Online

Josué 21 - Tzeltal bible

Josué 21

¹Te jolaletic yu'un jujuchahp snahic te levitahetic talic ta stojol te sacerdote Eleazar, te Josué snich'an Nun soc te jolaletic yu'un jujuchahp sna te snich'nab Israel,

²te ayic ta Silo ta sq'uinal Canaán, hich la yalbeyic: Te Jehová la spas ta mandar ta scuenta Moisés te ya quich'cotic pueblohetic banti ya xnahinotcotic, soc te aquiltic yu'un te chambahlametic cu'uncotique, xchihic.

³Ha yu'un te snich'nab Israel la ya'beyic te levitahetic te pueblohetic soc aquiltic yu'unic, hich te bin ut'il yaloj mandar te Jehová.

⁴Te spasel seña ta na'el ha c'oht ta scuenta jujuchahp snahic te sts'umbal Coat. Te levitahetic te ha sts'umbalic te sacerdote Aarón, la yich'ic ta scuenta spasel seña ta na'el oxlajuneb (13) pueblohetic yu'un te jchahp yu'un Judá, Simeón, soc Benjamín.

⁵Te yantic sts'umbal Coat la yich'ic ta scuenta spasel seña ta na'el lajuneb pueblohetic yu'un te jujuchahp snahic yu'un te jchahp yu'un Efraín, yu'un Dan, soc te j'ohlil jchahp yu'un Manasés.

⁶Te sts'umbal Gersón la yich'ic ta scuenta spasel seña ta na'el oxlajuneb (13) pueblohetic yu'un te jujuchahp snahic yu'un te jchahp yu'un Isacar, Aser, Neftalí soc te j'ohlil jchahp yu'un Manasés te ay ta Basán.

⁷Te jaychahp snahic te sts'umbal Merari la yich'ic lahchayeb (12) pueblohetic yu'un te jchahp yu'un Rubén, Gad, soc Zabulón.

⁸Hich te snich'nab Israel, ta scuenta spasel seña ta na'el, la ya'beyic te levitahetic te pueblohetic ini soc te aquiltic yu'unic, hich te bin ut'il yaloj mandar Jehová ta scuenta Moisés.

⁹Ta banti te jchahp yu'un Judá soc yu'un Simeón la ya'beyic te pueblohetic te chican sbihilic li'i,

¹⁰ha te la yich'ic te sts'umbal Aarón te ay ta scuenta te jujuchahp snahic yu'un Coat, te sts'umbal Leví, como nahil c'oht ta scuentahic te seña ta na'el.

¹¹La ya'beyic te Quiriat-arba, (te Arba ha stat te Anac), ha te Hebrón te ay ta witsiltic yu'un Judá, soc te aquiltic yu'un ta sjoyobal.

¹²Yan te q'uinal yu'un te pueblo soc te tut pueblohetic yu'un la ya'beyic te Caleb snich'an Jefone, te ha yu'un ya xc'oht.

¹³Hich la ya'beyic te sts'umbal te sacerdote Aarón te Hebrón soc te aquiltic yu'un scuenta ahnibal pueblo yu'un te jmilawe; soc la ya'beyic te Libna,

¹⁴Jatir, Estemoa,

¹⁵Holón, Debir soc te aquiltic yu'unic,

¹⁶Aín, Juta, soc Bet-semes soc te aquiltic yu'unic; baluneb pueblohetic yu'un te cha'chahp ini.

¹⁷Soc ta banti te jchahp yu'un Benjamín la ya'beyic te Gabaón, Geba,

¹⁸Anatot, soc Almón soc te aquiltic yu'unic; chaneb pueblohetic.

¹⁹Ta spisil te pueblohetic yu'un te sacerdotehetic te ha sts'umbal Aarón, ha oxlajuneb (13) soc te aquiltic yu'unique.

²⁰Te yantic xan levitahetic yu'un te sts'umbal Coat, la yich'ic ta scuenta spasel seña ta na'el te pueblohetic yu'un te jchahp yu'un Efraín.

²¹La ya'beyic te Siquem soc te aquiltic yu'un te ay ta witsiltic yu'un Efraín scuenta ahnibal pueblo yu'un te jmilawe; soc la ya'beyic te Gezer,

²²Kibsaim, soc Bet-horón soc te aquiltic yu'unic; ha chaneb pueblohetic.

²³Ta banti jchahp yu'un Dan la ya'beyic Elteque, Gibetón,

²⁴Ajalón, soc Gat-rimón soc te aquiltic yu'unic; chaneb pueblohetic.

²⁵Soc ta banti te j'ohlil yu'un Manasés la ya'beyic Taanac, soc Gat-rimón soc te aquiltic yu'unic; cheb pueblohetic.

²⁶Ta spisil te pueblohetic yu'un te yantic xan snich'nab Coat, ha lajuneb soc te aquiltic yu'unique.

²⁷Te sts'umbal Gersón te ha sts'umbal te levitahetic, a'botic ta banti te j'ohlil yu'un Manasés te Golán te ay ta Basán soc te aquiltic yu'un scuenta ahnibal pueblo yu'un te jmilawe, soc nix te Beestera soc te aquiltic yu'unic: cheb pueblohetic.

²⁸Ta banti te jchahp yu'un Isacar, a'botic Cisón, Daberat,

²⁹Jarmut, soc En-ganim soc te aquiltic yu'unic; chaneb pueblohetic.

³⁰Ta banti te jchahp yu'un Aser, a'botic Misael, Abdón,

³¹Helcat, soc Rehob soc te aquiltic yu'unic; chaneb pueblohetic.

³²Ta banti te jchahp yu'un Neftalí, a'botic Cedes ay ta Galilea soc te aquiltic yu'un scuenta ahnibal pueblo yu'un te jmilawe; soc nix te Hamot-dor soc Cartán soc te aquiltic yu'unic; oxeb pueblohetic.

³³Ta spisil te pueblohetic yu'un te sts'umbal Gersón, ha oxlajuneb (13) soc te aquiltic yu'unique.

³⁴Te jaychahp sts'umbal Merari, te jayeb xan levitahetic te hilemic, a'botic ta banti te jchahp yu'un Zabulón te Jocneam, Carta,

³⁵Dimna, soc Naalal soc te aquiltic yu'unic; chaneb pueblohetic.

³⁶Ta banti te jchahp yu'un Rubén, a'botic Beser, Jahaza,

³⁷Cademot, soc Mefaat soc te aquiltic yu'unic; chaneb pueblohetic.

³⁸Ta banti te jchahp yu'un Gad, a'botic Ramot yu'un Galaad soc te aquiltic yu'un scuenta ahnibal pueblo yu'un te jmilawe; soc nix te Mahanaim,

³⁹Hesbón, soc Jazer soc te aquiltic yu'unic; chaneb pueblohetic.

⁴⁰Ta spisil te pueblohetic yu'un te sts'umbal Merari ta scuenta jujuchahp snahic, ha te jaychahp xan hilemic yu'un te levitahetic, ha lahchayeb (12) pueblohetic.

⁴¹Ta spisil te pueblohetic yu'un te levitahetic ta yohlil te sq'uinalic te snich'nab Israel: ha waxaqueb yoxwinic (48) pueblohetic soc te aquiltic yu'unique.

⁴²Te jujun pueblo ay aquiltic yu'unic ta sjoyobal; hich ay ta spisil te pueblohetic ini.

⁴³Te Jehová hich la ya'be Israel spisil te q'uinal te yaloj ta jamal te ya ya'be te sme'statique. La yu'untayic soc nahinic tey a.

⁴⁴Te Jehová la ya'be scux yo'tanic ta sjoyobalic, hich te bin ut'il la yalbe ta jamal te sme'statique. Mayuc junuc te scontrahic te tsalotic yu'un, como te Jehová la yac'ticlambe ta sc'abic spisil te scontrahique.

⁴⁵Mayuc jp'ahluc c'op te yaloj Jehová ta stojol Israel te ma ba c'oht ta pasel; spisil c'oht ta pasel.