Read Tzeltal Josué 23 Bible Online

Josué 23 - Tzeltal bible

Josué 23

¹Bayel c'ahc'al ta patil, te c'alal a'botix scux yo'tanic yu'un Jehová te snich'nab Israel yu'un te scontrahic ta sjoyobal, soc mamalix te Josué, ayix bayel ya'bilal a,

²te Josué la yic' tal spisil Israel, ha te mamaletic, príncipaletic, juecetic soc te mach'atic ay ya'telic ta Israel, hich la yalbe: Te ho'one mamalonix, bayelix ca'bilal.

³Ha'ex awilojic spisil bintic la spas Jehová te Dios awu'unic ta stojol spisil te nacionetic ini ta acuentahic; como Jehová te Dios awu'unic ha te la yac' guerra ta acuentahic.

⁴La jca'beyex awu'untayic ta jujuchahpex ta scuenta spasel seña ta na'el te nacionetic ini, ha te lajemiquix soc te hilemic to, c'alal ta muc'ul-ha' Jordán ha to ta Muc'ul Mar[23] ta stojol banti ya xmahl c'ahc'al.

⁵Te Jehová te Dios awu'unic ya sch'ojticlan loq'uel ta atojolic, ya stenticlan loq'uel ta awohlilic, te ha'exe ya me awich'beyic hilel te sq'uinalic, hich te bin ut'il la yalbeyex te Jehová te Dios awu'unique.

⁶Ayuc me yip awo'tanic ta scanantayel soc spasel spisil bin ts'ihbabil ta hun yu'un te mandariletic yu'un Moisés, ma me xhowiyex bahel ta stojolic ta q'uexam o ta wa'el,

⁷scuenta yu'un ma ba yac acap abahic soc te nacionetic te hilemic ta awohlilique. Soc ma me xawalbeyic sbihil soc ma me ayuc bin jc'axel yac awalic ta jamal ta scuenta sbihil te diosetic yu'unic, ni ma me xawac' abahic ta a'batinel yu'unic, ni ma me xaquejan abahic ta stojolic.

⁸Pero ha me yac at'unic te Jehová te Dios awu'unic hich te bin ut'il yac apasbelic talel c'alal ora.

⁹Como te Jehová la sloq'uesbeyex ta atojolic nacionetic te muq'uic soc te ay yipic, soc mayuc mach'a hu'em yu'un scontrahimbelex c'alal ora.

¹⁰Jtuhl nax winic awu'unic ya yac' te ya xloc' ta ahnel jmil ta tuhl, como ha te Jehová te Dios awu'unic te ya yac' guerra ta acuentahic, hich te bin ut'il la yalbeyexe.

¹¹Tsahtayahic ta canantayel hiche te acuxlejalic, yu'un c'uxuc me yac awa'iy ta awo'tanic te Jehová te Dios awu'unique.

¹²Como teme ya suhtex bahel ta apatic, teme jun ya xc'ohex soc te nacionetic te hilemic ta awohlilic, teme ya xnuhpunex soc, teme yac acap abahic soque,

¹³na'ahic me te Jehová te Dios awu'unic ma ba ya sloq'uesbeyexix bahel ta awohlilic te nacionetic ini, hich ya xc'ohtic ta atojolic te bin ut'il lazo, ayacolic, smajojibal apatic soc ch'ix ta asitic, ha to c'alal ya xtup'ex bahel ta lequil q'uinal ini te la ya'beyex Jehová te Dios awu'unique.

¹⁴Te ho'one nopol ya sta yorahil ya xchamon. Na'ahic me ta spisil awo'tanic soc ta spisil ach'uhlelic te ma ba ch'ay ni jp'ahluc c'op yu'un spisil te lequil c'opetic la yalbeyex te Jehová te Dios awu'unique; spisil c'ohtix ta pasel ta acuentahic, mayuc bin ch'ay.

¹⁵Pero hich te bin ut'il c'ohtix ta pasel spisil te bin lec la yalbeyex te Jehová, te Dios awu'unic, ha nix hich te Jehová ya me yac' tal ta atojolic spisil te bintic chopol, ha to teme ya stup'ex bahel ta lequil q'uinal te la ya'beyex te Jehová te Dios awu'unic

¹⁶teme yac ac'axuntaybe te chapbil-c'op yu'un Jehová te Dios awu'unic te la spasex ta mandar, teme yac awich'ic ta muc' yantic diosetic soc teme yac aquejan abahic ta stojolique. Hich me ya xtihl te yilimba Jehová ta atojolic soc ora ya xch'ayex ta lequil q'uinal ini te la ya'beyexe, xchi te Josué.