Read Tzeltal Josué 24 Bible Online

Josué 24 - Tzeltal bible

Josué 24

¹Te Josué la stsob spisil te jchahp yu'un Israel ta Siquem, soc la yic' tal te mamaletic yu'un Israel, te príncipaletic, juecetic soc te yantic ay ya'telic ta Israel. Spisilic la stehc'an sbahic ta stojol Dios.

²Te Josué hich la yalbe spisil te pueblo: Hich ya yal Jehová te Dios yu'un Israel: Te ame'atatic, ha te Taré stat te Abraham soc Nacor, nahinic ta namey ta jehch muc'ul-ha',[24] la sch'uhunic yantic diosetic.

³La jquic' loq'uel ta jehch muc'ul-ha' te atatic Abraham soc la jquic' tal ta spahmal sq'uinal Canaán; la jcac' p'ohluc te sts'umbal soc la jca'be te Isaac.

⁴Te Isaac la jca'be te Jacob soc Esaú. Te Esaú la jca'be yich' te witsiltic yu'un Seir, yan te Jacob soc te snich'nab cohic bahel ta Egipto stuquelic.

⁵La jticon bahel Moisés soc Aarón, soc la jca'be swocol te Egipto ta scuenta te bin la jpas ta yohlilic, patil la jloq'uesex talel.

⁶La jloq'ues tal ta Egipto te ame'atatic, c'ohtic ta mar; te egipciohetic la snutsic bahel ame'atatic ta carretahetic soc cawuhetic c'alal ta Mar Rojo.

⁷Te c'alal tulan awonic ta stojol Jehová, ha la yac' tal yihc'al q'uinal ta ohlil yu'un te egipciohetic soc te ha'exe, soc la yac' tal te mar ta sbahic, te ha mucotic yu'un. Ha'ex la awilic te bin la jpas ta Egipto. Ta patil bayel c'ahc'al ayinex ta jochol taquin q'uinal.

⁸La quiq'uex ochel ta sq'uinal te amorreohetic te nahinemic ta jehch ha' Jordán, te la ya'beyex guerra; pero la jca'beyex ta ac'abic, la awu'untaybeyic sq'uinalic, yu'un la jlajinlan ta atojolic.

⁹Patil hahch te Balac snich'an Zipor, te ajwalil yu'un te moabetic, la ya'be guerra te Israel. Ha la sticon ta iq'uel tal te Balaam te snich'an Beor, yu'un ya sc'an chopol c'oblalil ta atojolic.

¹⁰Pero ma ba la jc'an ya ca'iybe sc'op te Balaam, ha yu'un bayel buelta la yac'ticlambeyex bendición, hich la jcoltayex loq'uel ta sc'ab.

¹¹Sohlex bahel ta muc'ul-ha' Jordán, c'ohex ta Jericó. Te mach'atic nahinemic ta Jericó la ya'beyex guerra, soc nix te amorreo, ferezeo, cananeo, heteo, gergeseo, heveo soc te jebuseo; ho'on la jca'beyex ta ac'abic spisilic.

¹²La jticon bahel ta nahil awu'unic xuxetic te la stenticlanic loq'uel ta atojolic te cheb ajwaliletic yu'un te amorreohetic; ma ha'uc loq'uic ta scuenta te espada o t'ihmalte' awu'unique.

¹³La jca'beyex q'uinal te banti ma ba a'tejemex, soc pueblohetic te ma ba la apasic, te banti nahinemex ta ora ini; soc yac awe'ic sit ts'usubil soc olivohetic te ma ba la ats'unic, xchi te Jehová.

¹⁴Ha yu'un ich'ahic ta muc' te Jehová soc junuc me awo'tan ac'a abahic ta a'batinel yu'un ta mero melel. Loq'uesa ta awohlilic te diosetic te la sch'uhunic te ame'atatic ta jehch te muc'ul-ha' soc ta Egipto, ac'a abahic ta a'batinel yu'un Jehová.

¹⁵Teme ma lecuc yac awa'iyic te yac awac' abahic ta a'batinel yu'un Jehová, tsaha mach'a yac awac' abahic ta a'batinel yu'un: teme ha te diosetic te la yac' sbahic ta a'batinel yu'un te ame'atatic ta jehch te muc'ul-ha', o ha te diosetic yu'un te amorreohetic te banti nahinemexix ta sq'uinalique; pero te ho'on soc te mach'atic ay cu'un ya cac' jbahcotic ta a'batinel yu'un te Jehová, xchi te Josué.

¹⁶Ha yu'un la sjac' te pueblo: Mayuc bin ora te ya quihquitaycotic te Jehová yu'un ya cac' jbahcotic ta a'batinel yu'un yantic diosetic.

¹⁷Como ha te Jehová te Dios cu'untic te la sloq'uesotic tal soc te jme'jtatic ta sq'uinal Egipto te banti ayotic ta mosohil; ha te mach'a la spas te muc'ul señahiletic ini soc te la scanantayotic ta spisil be banti behenotic soc ta spisil te nacionetic banti c'axotic tale.

¹⁸Soc ha nix hich te Jehová la sloq'uesbotic bahel ta jtojoltic spisil te pueblohetic, soc te amorreohetic te nahinemic ta q'uinal. Ha nix hich ya me cac' jbahtic ta a'batinel yu'un Jehová, como ha Dios cu'untic stuquel, xchihic.

¹⁹Pero te Josué la yalbe te pueblo: Ma xhu' yac awac' abahic ta a'batinel yu'un te Jehová, como ha ch'ul Dios soc ha Dios te xut'et yo'tan, ma ba ya scuchbeyex atoybahilic soc amulic.

²⁰Teme yac awihquitayic hilel te Jehová, teme yac awac' abahic ta a'batinel yu'un yantic diosetic, ya me suht tal ya'beyex awocolic soc ya me slajinex, aunque lec bin la spasbeyex ta nahil to, xchi.

²¹Pero te pueblo la yalbeyic te Josué: Ma'uc, ya cac' jbahtic ta a'batinel yu'un te Jehová, xchihic.

²²Te Josué hich la sjac'be te pueblo: Ha'ex nix testigohex te la atsahic te Jehová yu'un yac awac' abahic ta a'batinel yu'un, xchi. Ho'otcotic nix testigohotcotic, xchihic.

²³Loq'uesahic hiche te yantic diosetic te ay ta awohlilic, ac'a awo'tanic ta stojol Jehová te Dios yu'un Israel, xchi te Josué.

²⁴Te pueblo la sjac'beyic sc'op te Josué: Te Jehová te Dios cu'untic ya me cac' jbahcotic ta a'batinel yu'un soc ya me jpascotic te bin ya yalbotcotic, xchihic.

²⁵Ha yu'un te Josué la schap sc'op soc te pueblo ta hich ora, soc la ya'be mandariletic soc leyetic ta Siquem.

²⁶Te Josué la sts'ihbay te c'opetic ini ta hun yu'un te ley yu'un Dios, soc la stsac muc'ul ton, la stehc'an ta ye'tal te jihte' te ay ta sts'ehl te ch'ul awilal yu'un Jehová.

²⁷Te Josué hich la yalbe spisil te pueblo: Te ton ini ha ya xtuhun cu'untic ta testigo, como ha la ya'iy spisil te bin la yalbotic te Jehová. Ha me testigo ta atojolic scuenta yu'un ma ba yac alotiyic te Dios awu'unique, xchi.

²⁸Patil te Josué la sticon bahel te pueblo, jujutuhl ta sq'uinalic.

²⁹Patil cham te Josué snich'an Nun, te a'bat yu'un Jehová, ay lajuneb swacwinic (110) ya'bilal a.

³⁰La smuquic ta sq'uinal ta Timnat-sera te ay ta witsiltic yu'un Efraín, ta stojol norte yu'un te wits Gaas.

³¹Te Israel la sch'uhuntayic te Jehová te jayeb ha'bil cuxul te Josué, soc te jayeb ha'bil cuxul hilel yu'un Josué te mamaletic te sna'ojic spisil te bintic la spas Jehová ta stojol Israel.

³²Te sbaquel José te la yich'beyic tal ta Egipto te snich'nab Israel, la smuquic ta Siquem ta q'uinal te Jacob la smambe te snich'nab Hamor te stat Siquem ta ho'winic (100) ta sehp plata, te ha yu'un c'oht te snich'nab José.

³³Ha nix hich cham te Eleazar snich'an Aarón, la smuquic ta tsehl yu'un Finees te snich'an, te a'bot ta witsiltic yu'un Efraín.