Read Tzeltal Josué 3 Bible Online

Josué 3 - Tzeltal bible

Josué 3

¹Te Josué sab hahch, loc' bahel ta Sitim soc spisil snich'nab Israel, c'ohtic c'alal ta muc'ul-ha' Jordán, tey c'oht spas scampamentohic te c'alal ma to ba sohlic bahel a.

²C'alal c'axix oxeb c'ahc'al a, te jtsobawetic behenic c'axel ta yocliyel te campamento,

³hich la spasic ta mandar te pueblo: C'alal yac awilic te ya xc'ax te scaxahul te chapbil-c'op yu'un Jehová te Dios awu'unic soc te sacerdote-levitahetic te yac sq'uechbelic bahel, ya me xloq'uex hahchel ta banti ayex, ya me at'unic bahel

⁴scuenta yu'un yac ana'ic te banti behil ya xbahex, como te ha'ex mayuc c'axemex li' ta be ini. Pero ayuc me ho'bahc' (2,000) xuhc'ubil[2] ma xatahic bahel te scaxahul te chapbil-c'op, ma me xalaq'uic bahel, xchihic.

⁵Te Josué la yalbe te pueblo: Ch'ultesa abahic, yu'un pajel ya me spas jchahp a'teliletic ta awohlilic te Jehová, xchi.

⁶Patil la yalbe te sacerdotehetic: Ich'ahic te scaxahul te chapbil-c'op, nahilijanic bahel ta stojol te pueblo, xchi. Hich la sq'uechic hahchel te scaxahul te chapbil-c'op, nahilijic bahel ta stojol te pueblo.

⁷Te Jehová hich la yalbe te Josué: Ha c'ahc'al ini ya xhahch cac' tohyuc ac'oblal ta sit spisil Israel, scuenta yu'un ya sna'ic te ya joquinat hich te bin ut'il la joquin te Moisés.

⁸Ha'at me yac apas ta mandar te sacerdotehetic te ya sq'uechic bahel te scaxahul te chapbil-c'op, hich yac awalbe: Te c'alal ya xc'ohex ta ti'ha' yu'un Jordán, ya me atehc'an abahic ta yohlil te muc'ul-ha', xchi.

⁹Te Josué hich la yalbe te snich'nab Israel: Nohpojanic tal, a'iya awa'iyic te bin ya yal te Jehová te Dios awu'unic, xchi.

¹⁰Soc hich la yal xan te Josué: Hich me yac ana'ic a te ay ta awohlilic te cuxul Dios soc te ya stenticlan loq'uel ta atojolic te cananeo, heteo, heveo, ferezeo, gergeseo, amorreo soc te jebuseohetic.

¹¹Ilawil, te scaxahul te chapbil-c'op yu'un te Yajwal swohlol bahlumilal nahil ya xc'ax bahel awu'unic ta Jordán.

¹²Ha yu'un ya me atsahic lahchaytuhl winiquetic, jujutuhl ta jujuchahp yu'un Israel.

¹³Te c'alal ya stec' ochel te ya'lel Jordán te sacerdotehetic te sq'uechojic te scaxahul te chapbil-c'op yu'un Jehová, te Yajwal swohlol bahlumilal, ya me sjam sba te ha' yu'un Jordán, como te ha' te ya x'oquin tal ta ahc'ol ya xquehchaj ta oc, ya stsob hilel sba, xchi.

¹⁴Ha yu'un te c'alal hahchic bahel te pueblo ta snahilpaq'uic yu'un ya xc'axic bahel ta Jordán, te sacerdotehetic te sq'uechojic bahel te scaxahul te chapbil-c'op nahilijic bahel yu'unic.

¹⁵Te muc'ul-ha' Jordán ya xmahl loq'uel ta sti'il ta yorahil c'ajoj. Pero te c'alal c'ohtic ta Jordán te sacerdotehetic te sq'uechojic te scaxahul te chapbil-c'op, soc te t'uxix a te yoquic ta sti'il te ha'e,

¹⁶quehchaj te ha' te ya x'oquin tal ta ahc'ol, namal to la stsob hilel sba ta pueblo Adam nopol ta Saretán, yan te yoc te ya x'oquin bahel ta mar yu'un Arabá, ha te Mar Salado,[3] taquij bahel. Hich sohlic bahel te pueblo ta stojol Jericó.

¹⁷Yan te sacerdotehetic te sq'uechojic te scaxahul te chapbil-c'op yu'un Jehová, teq'uelic ta staquin lumil ta yohlil te Jordán ha to c'alal sohlic bahel ta Jordán spisil te pueblo. Spisil Israel sohlic bahel ta staquin lumil.