Read Tzeltal Josué 4 Bible Online

Josué 4 - Tzeltal bible

Josué 4

¹Te c'alal sohliquix bahel spisilic ta Jordán a, te Jehová la yalbe te Josué:

²Tsaha lahchaytuhl winiquetic ta yohlil te pueblo, jujutuhl ta jujuchahp,

³soc hich yac apasulan ta mandar: Tamahic lahchayeb tonetic li' ta yohlil te Jordán, te banti teq'uelic te sacerdotehetic, ich'ahic bahel, tey ya xc'oht awaq'uic ta banti ya xc'ax ahc'abal awu'unic, xchi.

⁴Ha yu'un te Josué la yic' tal te lahchaytuhl winiquetic te stsahoj ta yohlil te snich'nab Israel, jujutuhl ta jujuchahp,

⁵hich la yalbe: Nahilijanic bahel ta stojol te scaxahul te chapbil-c'op yu'un Jehová te Dios awu'unic ta yohlil te Jordán, ta jujutuhlex q'uechahic bahel jujupis ton, hich te bin ut'il jaychahp snich'nab Israel,

⁶scuenta yu'un ha seña awu'unic ya xc'oht. Teme ay hich ya sjoc'obeyex te awal-anich'nabic ta patil bahel: ¿Bin scuentahil te tonetic ini? teme xchihique,

⁷hich me xawalbeyic: Te ya'lel te muc'ul-ha' Jordán la sjat sba ta stojol te scaxahul te chapbil-c'op yu'un Jehová; c'alal c'axic bahel ta Jordán, la sjat sba te ya'lele. Te tonetic ini ya xtuhunic scuenta sna'ojibal yu'un te snich'nab Israel sbahtel q'uinal, xchi.

⁸Te snich'nab Israel hich la spasic te bin ut'il halbotic yu'un Josué. La stamic hahchel lahchayeb tonetic ta yohlil Jordán, hich te bin ut'il halbot yu'un Jehová te Josué, jujupis ta jujuchahp sts'umbal Israel, la yich'ic bahel ta banti ay scampamentohic, la yaq'uic hilel tey a.

⁹Te Josué la stehc'an te lahchayeb tonetic te loq'uemic tal ta yohlil te Jordán[4] ta banti la stehc'an sbahic te sacerdotehetic te la sq'uechic te scaxahul te chapbil-c'op; tey ayic c'alal ora.

¹⁰Te sacerdotehetic te la sq'uechic bahel te scaxahul te chapbil-c'op, tey tec'ajtic ta yohlil a te Jordán ha to c'alal c'oht ta pasel spisil bintic halbot yu'un Jehová te Josué te ya yalbe te pueblo; hich te bin ut'il spasot ta mandar yu'un Moisés te Josué. La suj sbahic sohlel te pueblohe.

¹¹Te c'alal laj ta sohlel bahel spisil te pueblo, ha nix hich sohl bahel te scaxahul te chapbil-c'op yu'un Jehová, te sacerdotehetic nahilijic bahel yu'un te pueblo.

¹²Soc te sts'umbal Rubén, Gad, soc j'ohlil sts'umbal Manasés nahilijic bahel soc ya'tejibic yu'un guerra ta stojol te snich'nab Israel, hich te bin ut'il halbotic hilel yu'un Moisés.

¹³Ay wan ho'pic (40,000) winiquetic chapalic soc ya'tejibic ta yaq'uel guerra te c'axic bahel ta stojol Jehová ta spamlej yu'un Jericó.

¹⁴Ha nix ta yorahil a te Jehová la stohytesbe sc'oblal te Josué ta stojol spisil Israel; hahch yich'ic ta muc' hich te bin ut'il la yich'ic ta muc' te Moisés te jayeb c'ahc'al cuxule.

¹⁵Patil te Jehová hich la yalbe te Josué:

¹⁶Halbeya te sacerdotehetic te sq'uechojic te scaxahul te Testigo-c'op te ac'a loc'uquix tal ta Jordán, xchi.

¹⁷Ha yu'un te Josué la yalbe te sacerdotehetic: Loc'aniquix tal ta Jordán, xchi.

¹⁸C'alal loq'uic tal ta yohlil Jordán te sacerdotehetic te sq'uechojic te scaxahul te chapbil-c'op, c'alal la steq'uic te taquin lumq'uinal, suht tal te ya'lel te muc'ul-ha' Jordán, oquin bahel soc mal loq'uel ta sti'il hich te bin ut'il ta nahil to.

¹⁹Te pueblo Israel loq'uic tal ta Jordán ta slajunebal c'ahc'al yu'un te shahchibal u, c'oht spas scampamentohic ta Gilgal ta stojol banti ya xloc' tal c'ahc'al yu'un Jericó.

²⁰Te Josué tey la stehc'an a te lahchayeb tonetic te la yich'ic loq'uel tal ta muc'ul-ha' Jordán.

²¹Hich la yalbe te snich'nab Israel: Teme ta patil bahel hich ya sjoc'obeyex awal-anich'nabic: ¿Bin scuentahil te tonetic ini? teme xchihique,

²²hich me xawalbeyic: Te Israel taquin a sohlic ta Jordán,

²³como te Jehová te Dios awu'unic la staquijtesbeyex te ya'lel Jordán ha to c'alal sohlex tal, hich te bin ut'il la spas Jehová te Dios awu'unic ta Mar Rojo, ha te la staquijtesbotic ha to c'alal sohlotic talel;

²⁴scuenta yu'un spisil te pueblohetic ta bahlumilal ya me sna'ic te ay bayel yu'el te sc'ab te Jehová, soc scuenta yu'un hich yac axi'ic spisil ora a te Jehová te Dios awu'unique, xchi.