Read Tzeltal Josué 6 Bible Online

Josué 6 - Tzeltal bible

Josué 6

¹Te Jericó buen macal ta scaj te la xi'ic te snich'nab Israel, mayuc mach'a ya x'och bahel o ya xloc' talel.

²Te Jehová la yalbe te Josué: Ilawil, la jca'batix ta ac'ab te Jericó, te ajwalil yu'un soc te swinic yu'un guerra.

³Ha yu'un spisil te winiquetic yu'un guerra awu'unic ya me ajoyobtayic jun buelta te pueblo. Hich me yac apasulanic waqueb c'ahc'al.

⁴Huctuhl sacerdotehetic ya yich'ic bahel huqueb xulub tat tuminchij, ha ya xnahilijic bahel yu'un te scaxahul te chapbil-c'op. Ta shuquebal c'ahc'al huqueb buelta ya me ajoyobtayic te pueblo, yac ta yoq'uesinel xulubiletic a te sacerdotehetique.

⁵Te c'alal ya xhalaj ta oq'uesinel te xulub tat tuminchij, te c'alal yac awa'iybeyic yoq'uel, tulan ya x'awonic spisil te pueblo, hich ya xjihn cohel te sts'ahcul te pueblohe; tuhlultuhl toj me ya x'ochic bahel, xchi.

⁶Ha yu'un te Josué snich'an Nun la yic'ticlan tal te sacerdotehetic, hich la yalbe: Q'uechahic bahel te scaxahul te chapbil-c'op, soc ac'a yich'ic bahel huqueb xulub tat tuminchij huctuhl sacerdotehetic te ya xnahilijic bahel yu'un te scaxahul te chapbil-c'op yu'un Jehová, xchi.

⁷Soc hich la yalbe te pueblo: Bahan, joyobtayahic te pueblo. Te mach'atic yich'oj ya'tejibic yu'un guerra ya me xnahilijic bahel yu'un te scaxahul te chapbil-c'op yu'un Jehová, xchi.

⁸C'alal laj yo'tan ta sjuquel ta c'op te pueblo te Josué, te huctuhl sacerdotehetic te yich'ojic te huqueb xulub tat tuminchij nahilijic bahel yu'un te scaxahul te chapbil-c'op yu'un Jehová, yaquic ta yoq'uesinel a te xulubiletic, yac ta talel ta spatic te scaxahul te chapbil-c'op yu'un Jehová.

⁹Te winiquetic te yich'oj ya'tejibic yu'un guerra nahilijic bahel ta stojol te sacerdotehetic te yac yoq'uesimbelic te xulubiletic, soc te mach'atic patil ayic yaquic ta bahel ta spat te scaxahul te chapbil-c'op c'alal yacalic ta yoq'uesinel a te xulubiletique.

¹⁰Te Josué hich la spas ta mandar te pueblo: Ma me x'awonex, ma me xc'opojex, ma me xloc' jp'ahluc c'op ta awehic ha to bin ora hich ya calbeyex: awonanic, teme xchihone, ha to me ya x'awonex a, xchi.

¹¹Hich la ya'be sjoyobtay jun buelta te Jericó te scaxahul te chapbil-c'op yu'un Jehová, patil suhtic bahel ta campamento te banti c'ax ahc'abal yu'unic.

¹²Te Josué sab hahch, soc te sacerdotehetic la sq'uechic bahel te scaxahul te chapbil-c'op yu'un Jehová.

¹³Te huctuhl sacerdotehetic te yich'ojic te huqueb xulub tat tuminchij nahilijic bahel ta stojol te scaxahul te chapbil-c'op yu'un Jehová, yacalic ta behel soc ta yoq'uesinel a te xulubiletique. Te winiquetic te yich'oj ya'tejibic yu'un guerra nahilijic bahel yu'unic, soc te yantic talic ta spat te scaxahul te chapbil-c'op yu'un Jehová c'alal yac ta yoq'uesinel spisil ora te xulubiletique.

¹⁴Ta schebal c'ahc'al la sjoyobtayic jun buelta te Jericó, suhtic xan bahel ta campamento. Hich la spasulanic waqueb c'ahc'al.

¹⁵Ta shuquebal c'ahc'al hahchic ta sacubel q'uinal, ha nix hich la sjoyobtayic te Jericó, pero huqueb buelta; ha nax te c'ahc'al ini te la sjoyobtayic huqueb buelta.

¹⁶Ta shuquebal buelta, te c'alal la yoq'uesinic te xulubiletic te sacerdotehetic, te Josué la yalbe te pueblo: ¡awonanic, como te Jehová ya'beyejex te pueblohe!

¹⁷Parte me xawaq'uic scuenta lajel ta stojol Jehová te pueblo soc spisil bintic ay tey a; ha nax cuxul ya xhil te Rahab te j'antsinel-ants soc spisil te mach'atic sjoquinejic ta sna, como ha la snac' te jtsahtaywanejetic te ticombilic cu'untique.

¹⁸Pero te ha'exe tsahtayahic me yu'un te bin parte ac'bil scuenta lajel; ma me xapic soc ma me xawich'ic te bin parte ac'bil scuenta lajel; ma me xawaq'uic te ya xc'oht chopol c'oblalil ta stojol te campamento yu'un Israel, te hich yac awa'be sta swocol a.

¹⁹Spisil te plata, oro soc te bintic pasbil ta bronce soc ta hierro ac'otic ta stojol Jehová, ya x'ochic ta yawil sc'ulejal Jehová, xchi te Josué.

²⁰Ha yu'un awonic te pueblo, soc te sacerdotehetic la yoq'uesinic te xulubiletique. C'alal la ya'iybeyic yoq'uel xulubil te pueblo, buen tulan awonic, hich hemts'uj cohel te ts'ahque. Jujutuhl toj ochic bahel ta Jericó, hich la stsalic.

²¹La smilic ta espada spisil bintic ay ta pueblo: winiquetic, antsetic, alaletic soc me'el mamaletic, soc wacaxetic, tuminchijetic, tentsunetic soc burrohetic.

²²Te Josué hich la yalbe te cheb winiquetic te la stsahtayic te q'uinale: Ochanic ta sna te j'antsinel-ants, loq'uesahic tal soc spisil te mach'atic ay yu'un, hich te bin ut'il la awalbeyic hilel ta jamal, xchi.

²³Hich te jtsahtaywanejetic ochic bahel, la sloq'uesic tal te Rahab soc sme'stat, sbanquiltac, yihts'nab soc spisil mach'atic ay yu'un; soc la sloq'uesic spisil te mach'atic jun sbihilic soc, la yaq'uic ta sti'il te campamento yu'un Israel.

²⁴Patil la schiq'uic te pueblo soc spisil te bintic ay tey a; ha nax la yaq'uic ta yawil c'ulejalil ta sna Jehová te plata, oro soc te bintic pasbilic ta bronce soc ta hierro.

²⁵Pero te Josué la yac' cuxajuc te j'antsinel-ants Rahab soc te mach'atic ay yu'un te stat, soc spisil te bintic ay yu'un. Hich te Rahab nahin ta yohlil te snich'nab Israel c'alal ora yu'un te la snac' te winiquetic te ticombilic yu'un Josué ta stsahtayel te Jericó.

²⁶Ha yorahil a te Josué hich la yal ta jamal: Ma lecuc sc'oblal ya xc'oht ta stojol Jehová te winic te ya scha'pas xan ha'i pueblo Jericó ini. Ta scuenta stojol scuxlejal te sba-nich'an ya me ya'be hahchel te yich'o-ip; ta scuenta stojol scuxlejal te ihts'inal ya me yotsesbe te puertahetic yu'une, xchi.

²⁷Joquinot yu'un Jehová te Josué, soc puhc bahel sc'oblal ta spahmal te q'uinale.