Read Tzeltal Josué 8 Bible Online

Josué 8 - Tzeltal bible

Josué 8

¹Te Jehová la yalbe te Josué: Ma me xiwat soc ma me xpehc'aj awo'tan; tsoba spisil te winiquetic yu'un guerra, hahchan, mohan bahel ta Hai. Ilawil, la jca'batix ta ac'ab te ajwalil yu'un Hai, te ants-winiquetic, te pueblo soc te q'uinal yu'une.

²Hich yac apasbe te Hai soc te ajwalil yu'un te bin ut'il la apasbe te Jericó soc te ajwalil yu'une; yan te sbiluquic soc te chambahlametic yu'unic ya xhu' yac awich'ic stuquel. Ya me awac' winiquetic te ya snac' sbahic ta spat te pueblo, xchi.

³Ha yu'un hahch te Josué soc spisil te winiquetic yu'un guerra yu'un ya ya'beyic guerra te Hai. Te Josué la stsa oxpic soc ho'lajunbahc' (30,000) winiquetic te ay yipic, la sticonlan bahel ta ahc'abal,

⁴hich la spasticlan ta mandar: A'iya awa'iyic, ya me anac' abahic ta spat te pueblo; ma namaluc ya xbahex ta pueblo, chapaluquex me ta apisilic.

⁵Te ho'on soc spisil mach'atic sjoquinejonic ya xnohpojotcotic bahel ta stojol te pueblo. Te c'alal ya xloq'uic tal stahotcotic, hich te bin ut'il la spasbotiquix, ya xloc'otcotic ta ahnel ta stojolic.

⁶Ya snutsotcotic tal ha to c'alal namal ya xloq'uic tal ta pueblo, yu'un ya me yalic: Ya xloq'uic ta ahnel ta jtojoltic hich te bin ut'il te yan buelta, xchihic. Ha yu'un ya xloc'otcotic ta ahnel ta stojolic.

⁷Hich te ha'exe ya me xhahchex tal ta banti anac'oj abahic, ya me awu'untayic te pueblohe. Te Jehová te Dios awu'unic ya me ya'beyex ta ac'abic.

⁸Te c'alal la awu'untayiquix a, ya me achiq'uic; ya me apasic hich te bin ut'il yaloj te Jehová. A'iya me awa'iy, la jpasex ta mandar, xchi.

⁹Ha yu'un te Josué la sticonlan bahel; hich baht snac' sbahic ta ohlil yu'un Bet-el soc Hai, ta stojol smahlib c'ahc'al yu'un Hai. Yan te Josué tey c'ax ahc'abal yu'un a ta yohlil te israeletique.

¹⁰Hahch ta buen sab te Josué, la stsob tal te winiquetic yu'un, ha nahilij bahel yu'unic soc te mamaletic yu'un Israel, mohic bahel ta stojol Hai.

¹¹Spisil te winiquetic yu'un guerra te sjoquinejic nohpojic bahel ta Hai, la spas campamento ta stojol norte yu'un Hai; ay spamlej ta yohlilic soc te Hai.

¹²Te Josué yic'ojix tal j'ohlil yoxlajunbahc' (5,000) winiquetic, la yac' te ya snac' sbahic ta ohlil yu'un Bet-el soc Hai, ta stojol smahlib c'ahc'al yu'un te Hai.

¹³Hich la schahpan te winiquetic: spisil te mach'atic ayic ta campamento la yac' ta stojol norte yu'un Hai, soc te mach'atic te snac'oj sbahic ayic ta stojol smahlib c'ahc'al yu'un Hai. Ta ahc'abal te Josué c'oht c'alal ta yohlil te spamlej.

¹⁴C'alal hich la yil te ajwalil yu'un Hai, ta sab ahnimal hahch soc te winiquetic yu'un; ta yorahil chapal yu'unic, loq'uic bahel te winiquetic yu'un Hai yu'un ya stsal sbahic soc Israel ta stojol te Arabá; ma ba la sna'ic teme ay mach'atic snac'oj sbahic ta spat te pueblo.

¹⁵Te Josué soc spisil Israel la scuy sbahic te tsalotic, hich loq'uic ta ahnel ta stojolic, bahtic ta sbehlal te jochol taquin q'uinal.

¹⁶Spisil te mach'atic ayic ta Hai la stsob sbahic ta snutsticlanel bahel; c'alal la snutsic bahel te Josué, namal hil yu'unic te pueblo.

¹⁷Mayuc jtuhluc winic hil ta Hai soc ta Bet-el te ma ba loq'uic bahel ta spat Israel. Te bin ut'il la snutsic bahel te Israel, jamal hilel te pueblo.

¹⁸Ha yu'un te Jehová la yalbe te Josué: Hacha ta stojol Hai te lanza ay ta ac'ab, yu'un ya ca'bat ta ac'ab, xchi. Hich te Josué la shach bahel ta stojol te pueblo te lanza ay ta sc'ab.

¹⁹Ora hahchic te mach'atic snac'oj sbahic, ahnumal ochic bahel ta pueblo, la yu'untayic soc ora la ya'beyic sc'ahc'al.

²⁰Te winiquetic yu'un Hai la sut sitic, la yilic te xtometix ta mohel ta ch'ulchan te sch'ahilel te pueblo; mayuc banti hu' ya xloq'uic ta ahnel, como te israeletic te bahtic ta ahnel ta sbehlal te jochol taquin q'uinal, la sut sbahic ta ya'beyel guerra te mach'atic yaquic ta nutsel yu'unic.

²¹Te Josué soc spisil Israel, c'alal la yilic te la yich'iquix te pueblo te mach'atic la snac' sbahic soc te yac ta mohel bahel te sch'ahilel te pueblo, sut ta spatic, hahch stsac sbahic soc te winiquetic yu'un Hai.

²²Te yantique loq'uic tal ta Hai ta ya'beyel guerra, hich joyotic yu'un Israel, j'ohlil ta jehch ta jehch. La smilticlanic, mayuc mach'a col yu'unic.

²³Pero cuxul a la stsaquic te ajwalil yu'un Hai, la yiq'uic bahel ta stojol Josué.

²⁴Te israeletic c'alal laj yo'tanic smilticlambelic spisil te winiquetic yu'un Hai te ayic ta aquiltic soc ta jochol taquin q'uinal, te banti bahtic ta nutsel, te c'alal spisil lajiquix ta espada a, spisil te israeletic suhtic bahel ta Hai, ha nix hich la smilticlan ta espada.

²⁵Te jaytuhl ants-winiquetic lajic ta hich ora, ha j'ohlil scha'pic (12,000) ta tuhl.

²⁶Como te Josué ma ba la scohtes sc'ab te shachoj te lanza a ha to c'alal jc'axel lajinot spisil te mach'atic nahinemic ta Hai.

²⁷Pero te Israel la yiq'uic te chambahlametic soc te biluquetic yu'un te pueblo, hich te bin ut'il pasot ta mandar yu'un Jehová te Josué.

²⁸Hich te Josué la schic' te Hai soc la yac' te busul hil ta jinel, stalel jochol hil c'alal ora.

²⁹La sjohc'an ta te' te ajwalil yu'un Hai ha to c'alal ta yihc'ubel q'uinal. C'alal mahlix bahel c'ahc'al a, la yal mandar te Josué te ya scohtesbeyic sbaq'uetal ta te' soc ya sch'ojic bahel ta yochibal te pueblo. La sbusambeyic bayel ton ta sba te chican c'alal ora.

³⁰Patil te Josué la spasbe scajtajib ta chiq'uel mahtanil te Jehová te Dios yu'un Israel ta wits Ebal,

³¹hich te bin ut'il Moisés te a'bat yu'un Jehová la spas ta mandar te snich'nab Israel, hich te bin ut'il ts'ihbabil ta hun yu'un te ley yu'un Moisés: Ha scajtajib ta chiq'uel mahtanil pasbil ta tonetic te ma ba walubil, te xchihe. Tey la ya'beyic scohtol chic'bil mahtaniletic yu'un a te Jehová soc la yaq'uic mahtaniletic scuenta lamal q'uinal.

³²Soc ta stojol te snich'nab Israel la sts'ihbay ta tonetic te ley yu'un Moisés.

³³Ta spisil Israel, ha te jyanlumetic soc te sts'umbal nix Israel, soc te mamaletic, jtsobawetic soc juecetic yu'unic, teq'uelic ta jujujehch te scaxahul te chapbil-c'op, ta stojol te sacerdote-levitahetic te sq'uechojic te scaxahul te chapbil-c'op yu'un Jehová. J'ohlil ay ta stojol wits Gerizim, j'ohlil ay ta stojol wits Ebal, hich te bin ut'il Moisés te a'bat yu'un Jehová la spas hilel ta mandar, scuenta yu'un ya yac'ticlambe bendición te pueblo yu'un Israel.

³⁴Patil te Josué la yalbe spisil te bintic ya yal te Ley, ha te bendicionetic soc te chopol c'oblaliletic, hich te bin ut'il spisil ts'ihbabil ta hun yu'un te Ley.

³⁵Mayuc jp'ahluc te mandar yaloj Moisés te ma ba la yil te Josué ta stojol spisil te pueblo Israel, ha nix te antsetic, alaletic soc te jyanlumetic te nahinemic ta yohlilic.