Read Tzeltal Josué 9 Bible Online

Josué 9 - Tzeltal bible

Josué 9

¹Te c'alal la ya'iyic te bintic c'ohtix ta pasel spisil te ajwaliletic te ayic ta stojol smahlib c'ahc'al yu'un te muc'ul-ha' Jordán, ha te ayic ta witsiltic soc ta spamlejtic soc ta spisil sti'il te Muc'ul Mar c'alal ta Líbano, ha te heteo, amorreo, cananeo, ferezeo, heveo soc te jebuseohetic,

²la stsob sbahic ta ya'beyel guerra te Josué soc Israel.

³Pero te mach'atic nahinemic ta Gabaón, c'alal la ya'iyic te bin la spas Josué ta stojol te Jericó soc te Hai,

⁴la schahpanic lo'loyel; la scuy sbahic ta ticombil winiquetic, la yich'ic bahel c'a' costaletic te sburrohic soc c'a' nuhculetic yu'un vino te lohmenic soc pac'antaybilic,

⁵la slapic sc'a' tepic te pac'antaybiliquix soc poco' c'u'uletic; soc spisil te pan yich'ojic bahel yu'un te behel mero tulanix soc totobenix.

⁶C'alal c'ohtic ta stojol Josué ta campamento ta Gilgal, hich la yalbeyic soc te winiquetic yu'un Israel: Talemotcotic ta mero namal q'uinal; ya me jchap jc'optic, xchihic c'ohel.

⁷Te winiquetic yu'un Israel la sjac'beyic te heveohetic: Repente nahinemex ta cohlilcotic; ¿bin ut'il ya xhu' ya jchap jc'optic? xchihic.

⁸Pero la yalbeyic te Josué: Ho'otcotic a'batotcotic awu'un, xchihic. ¿Mach'ahex a? ¿Banti talemex? xchi te Josué.

⁹Hich la sjaq'uic: Te a'batetic awu'un talemotcotic ta mero namal q'uinal ta scaj te sbihil te Jehová te Dios awu'un como ca'iybeyejcotic sc'oblal, soc spisil te bintic la spas ta Egipto

¹⁰soc spisil te bintic la spasticlambe te cheb ajwaliletic yu'un te amorreohetic ta jehch muc'ul-ha' Jordán ta stojol banti ya xloc' tal c'ahc'al, ha te Sehón ajwalil yu'un Hesbón, soc te Og ajwalil yu'un Basán, te nahin ta Astarot.

¹¹Ha yu'un te mamaletic cu'uncotic soc spisil te mach'a nahinemic ta jlumalcotic, hich la yalbotcotic: Chahpana bahel awe'elic yu'un te behele, bahanic te banti ayic, hich me ya xc'oht awalbeyic: Te ho'otcotic a'batotcotic awu'unic; ya me jchahp jc'optic, xchihic.

¹²Te pan ini q'uixin to a la jloq'uescotic ta jnahcotic yu'un te behel te bin c'ahc'alil hahchotcotic tal ta atojolic; ilawil, taquinix soc totobenix.

¹³Ha nix hich te nuhculetic yu'un vino yach'ilic a c'alal la jnojescotic, ilawil, lomeniquix. Soc te jc'u' jpac'cotic soc jtepcotic poco'ix ta scaj te mero naht te behele, xchihic.

¹⁴Te winiquetic yu'un Israel la swe'beyic jtebuc te swe'elic, pero ma ba la sjoc'obeyic te Jehová.

¹⁵Te Josué la yac' te lamal yo'tan ya xc'oht soc; soc la schap sc'op soc te cuxul ya xhilic; hich nix jc'axel la yalic ta jamal te príncipaletic yu'un te pueblohe.

¹⁶Ta yoxebal c'ahc'al ta patil te la schap sc'opic, la ya'iyic te ha mero spat-xuhquic, te tey nix nahinemic ta yohlilic a.

¹⁷Hich loq'uic bahel te snich'nab Israel, ta yoxebal c'ahc'al c'ohtic ta banti pueblohetic yu'unic, ha te Gabaón, Cafira, Beerot soc Quiriat-jearim.

¹⁸Pero te snich'nab Israel ma ba la smilic ta scaj te príncipaletic yu'un te pueblo ay bin jc'axel yalbeyejic ta jamal ta stojol Jehová te Dios yu'un Israel. Spisil te pueblo hahch stijic ta c'op te príncipaletic;

¹⁹pero spisil te príncipaletic hich la yalbeyic te israeletic: Te ho'otcotic jc'axel calbeyejcotic ta jamal ta stojol Jehová te Dios yu'un Israel; ha yu'un ma xhu' ay bin ya jpasbetiquix.

²⁰Hich me ya jpasbetic: ya cac'tic cuxajicuc scuenta yu'un ma ba ya xc'oht ilimba ta jtojoltic yu'un te bin jc'axel calbeyejcotic ta jamal, xchihic.

²¹Hich la yalic xan te príncipaletic: Ac'a cuxajicuc, pero jcuch-si'etic soc jlic-ha'etic me ya xc'ohtic yu'un spisil te pueblo, xchihic. Hich la yac' cuxajicuc, hich te bin ut'il halbotic ta jamal yu'un te príncipaletique.

²²Te Josué la yic'ticlan tal soc la sjoc'obe: ¿Bin yu'un te la alo'loyotcotic te hich la awalic: Mero namal te banti talemotcotic, te xchihex, pero nahinemex ta cohlilcotic?

²³Ha yu'un chopol ac'oblalic, spisil me ora ay mach'atic ya yich'ic a'batinel ta awohlilic, ha ya sch'uyic si' soc ya sliquic ha' yu'un te sna te Dios cu'un, xchi.

²⁴Hich la sjac'beyic te Josué: Como la ya'iyic te a'batetic awu'un te Jehová te Dios awu'un spasojix ta mandar te ya'bat Moisés te ya me ya'beyex spisil te q'uinal soc te ya slajin ta atojolic spisil te mach'atic nahinemic ta q'uinal, ha scuentahil te bayel la jxi'cotic te ya xlajotcotic, ha yu'un te hich la jpascotic.

²⁵Ha yu'un ayotcotiquix ta ac'ab; pasa te bin lec soc te bin toj yac awa'iy te yac apasbotcotique, xchihic.

²⁶Hich te Josué la scoltay loq'uel ta sc'ab te snich'nab Israel, ma ba la smilic.

²⁷Ta hich ora te Josué la yac' te ha jcuch-si' soc jlic-ha' c'ohtic yu'un te pueblo soc yu'un te scajtajib ta chiq'uel mahtanil yu'un Jehová ta lugar te ya stsahe. Hich ayic c'alal ora.