Read Tzeltal 2 Tesalonicenses 1 Bible Online

2 Tesalonicenses 1 - Tzeltal bible

2 Tesalonicenses 1

¹Pablo, Silvano soc Timoteo, ta stojol te iglesia yu'un te Tesalonicahetic te ayic ta stojol te Jtatic Dios soc ta stojol te Cajwaltic Jesucristo:

²Ayuc me yutsil-o'tanil soc lamal q'uinal awu'unic te ya xtal ta stojol te Jtatic Dios soc te Cajwaltic Jesucristo.

³Ya sc'an te spisil ora ya calbecotic wocol Dios ta acuentahic, quermanotac, como hich ya sc'an pasel, como behbe muc'ubel te sch'uhunel awo'tanique, soc te sc'uxul awo'tanic yac ta p'ohlel ta stojol yantic.

⁴Ha scuentahil te soc yutsil co'tantic ya calbecotic te iglesiahetic yu'un Dios te yutsil ac'oblalic, ha te bin ut'il ay sch'uhunel awo'tanic soc te cuhchem awu'unic spisil te uts'inel soc te wocol awu'unique.

⁵Ha ini ya yac' ta ilel te stojil chahpanel yu'un te Dios, te ha stojil te ya x'ochex ta cuentahinel yu'un Dios, te ha nix yac ta c'axel awocolic yu'une.

⁶Ha stojil ta stojol Dios te ya ya'be stoj ta wocol te mach'atic ya ya'beyex awocolic,

⁷soc te ha'ex te ay awocolic ya ya'beyex acux awo'tanic soc ho'otcotic te c'alal ya xchicnaj cohel tal ta ch'ulchan ta yohlil yat c'ahc' te Cajwaltic Jesús soc te ch'ul a'batetic yu'un te ay yipic,

⁸yu'un ya ya'be castigo te mach'atic ma ba la sna'beyic sba te Dios soc ma ba ya sch'uhunic spasel te lec yach'il c'op yu'un te Cajwaltic Jesucristo.

⁹Ha me castigo ya x'a'botic te ch'ayel ya xbahtic sbahtel q'uinal, loq'uesbilic ta stojol te Cajwaltic soc te yutsil yu'el,

¹⁰c'alal ya sta sc'ahc'alel te ya xtal yu'un ya xhalbot yutsil sc'oblal ta scuenta te mach'atic yu'un te ch'uhltesbilic soc ya x'ich'ot ta muc' yu'un spisil te mach'atic sch'uhunejic. Te ha'ex la ach'uhunic te bin la jcalcotic ta testigo c'op ta awohlilique.

¹¹Ha scuentahil te spisil ora ya jc'opombeyexcotic Dios te ha'uc lec yo'tan awu'unic yu'un te la yiq'uex, soc ta scuenta yu'el te ts'acaluc ya sc'ohtes ta pasel spisil te bintic lec chapal awu'unic soc spisil te awa'telic yac apasic ta scuenta sch'uhunel awo'tanic.

¹²Ta scuenta yutsil yo'tan te Dios cu'untic soc te Cajwaltic Jesucristo hich ya xhalbot yutsil sc'oblal a te sbihil te Cajwaltic Jesucristo ta acuentahic, soc hich ya xhalot yutsil ac'oblalic ta scuenta.