Read Tzeltal 2 Tesalonicenses 3 Bible Online

2 Tesalonicenses 3 - Tzeltal bible

2 Tesalonicenses 3

¹Ta slajibal, quermanotac, c'opombotic Dios scuenta yu'un yacuc xpuhc xan ta lec te sc'op Cajwaltic soc yacuc x'ich'ot ta muc', hich te bin ut'il c'ohemix ta pasel ta awohlilic,

²soc te manchuc ya x'ipajotcotic ta sc'ab te mach'atic bohloben yo'tanic soc chopol yo'tanic, como ma spisiluc ay sch'uhunel yo'tanic.

³Pero stalel jun yo'tan ta jtojoltic te Cajwaltic, ya me ya'beyex yip awo'tanic soc ya me scanantayex yu'un te bin chopole.

⁴Ta scuenta Cajwaltic sch'uhunej co'tancotic te hich nix yac apasbelic a soc hich ya xc'oht ta pasel awu'unic te bin la jpasexcotic ta mandare.

⁵Te Cajwaltic ac'a stojobtesbeyex bahel awo'tanic ta stojol te sc'uxul yo'tan Dios soc te slamalil yo'tan Cristo.

⁶Quermanotac, ya jpasexcotic ta mandar ta scuenta te Cajwaltic Jesucristo te yacuc apit abahic ta stojol spisil quermanotic te ma sc'an ya x'a'tejic soc te ma ba ya spasic te bin la jca'beyexcotic anopic.

⁷Ha'ex nix ana'ojic bin ut'il ya sc'an yac anopbotic co'tancotic; ma ba hich nax ayinotcotic ta awohlilic,

⁸mayuc mach'a hich nax la jc'ambecotic jwe'elcotic. Melel c'ahc'al ahc'abal ma ba la jcux co'tancotic, tulan a'tejotcotic scuenta yu'un mayuc mach'a la jca'becotic swocol.

⁹Ma yu'unuc te ma xhu' te hich ya jpascotic, ha nax la jpascotic yu'un te hich la jca'beyexcotic awilic yu'un hich yac anopbotcotic co'tancotic a.

¹⁰Hich nix la jpasex ta mandar te c'alal joquexcotic to a: Te mach'a ma sc'an ya x'a'tej, ma me xwe', xchihotcotic.

¹¹Como ca'iyejcotic te ay ta awohlilic te mach'atic ma x'a'tejic, ha nax ya yotses sbahic ta banti ma yochelicuc.

¹²Te mach'atic hich yac spasbelic ya jpascotic ta mandar soc ya jtsitscotic ta scuenta te Cajwaltic Jesucristo te lamaluc yo'tan ya x'a'tejic ta slehel te swe'elique.

¹³Te ha'ex, quermanotac, ma me xluhbex ta spasel te bin leque.

¹⁴Teme ay mach'a ma ba ya sch'uhun spasel te bin ya calcotic ta scuenta te carta ini, na'beyahic sba mach'a a soc ma me xajoquinic, scuenta yu'un hich ya xq'uexawan a.

¹⁵Pero ma me xap'is hichuc acontra, lec nax me xatsitsic te bin ut'il awermano abahique.

¹⁶Te Cajwaltic yu'un lamal q'uinal ac'a ya'beyex ta spisil ora te lamal q'uinale. Ac'a sjoquinex apisilic te Cajwaltique.

¹⁷Ho'on Pablohon ta jc'ab nix ya jts'ihbabeyex te spatil awo'tanic cu'un, te ha nix seña cu'un ta spisil te cartahetic cu'une. Hich ya sts'ihbajon.

¹⁸Ac'a sjoquinex ta apisilic te yutsil yo'tan te Cajwaltic Jesucristo. Hichuc.