Read Tzeltal 1 Timoteo 3 Bible Online

1 Timoteo 3 - Tzeltal bible

1 Timoteo 3

¹Ha mero smelelil c'op ini: Teme ay mach'a yo'tanuc ya yich' ya'tel ta anciano,[1] buen lec a'tel te ya sc'ane.

²Te anciano ya sc'an te mayuc bin ya sutot ta c'op yu'un, te jtuhl nax yihnam, ya stsahtay sba, ya xhu' scombel sba, lec stalel, ya x'otseswan ta sna, ya xhu' yu'un p'ijubteswanej,

³ma xyacub, lec yo'tan, ma orahuc ya x'ilin, lamaluc yo'tan soc ma xbic'taj yo'tan yu'un c'uhlejalil.

⁴Ya sc'an te sbehlal ya scuentahin mach'atic ay yu'un ta sna, te ya xch'uhumbot smandar yu'un te yal-snich'nab soc ich'bil ta cuenta yu'unic.

⁵(Como te mach'a ma sna' scuentahinel te mach'atic ay yu'un ta sna, ¿bin ut'il c'an hu'uc yu'un scuentahinel te iglesia yu'un Dios?)

⁶Ma ocheluc to ta sch'uhunel Dios, teme repente ya stoy sba, te hich pajal ya x'a'bot stoj smul soc te pucuje.

⁷Soc ya sc'an te lec sc'oblal yu'un te mach'atic ma ba sch'uhunejic Dios, scuenta yu'un hich ma xbohlob sc'oblal soc ma xyacot yu'un te pucuje.

⁸Ha nix hich te diáconohetic, ya sc'an te lec sc'oblalic, smelelil bin ya yalic, ma sna'ic yacubel, soc ma xbic'taj yo'tanic yu'un slehel taq'uin te ma stojiluc;

⁹ya sc'an te mayuc bin ya xhalbot ta yo'tanic a ya sch'uhunic te bin muquen ay yu'un te bin ay ta ch'uhunel.

¹⁰Nahil ac'a yich'ic tsajel; patil ya xhu' ya yich' ya'telic ta diáconohil, teme mayuc bin smulinejic.

¹¹Ha nix hich te antsetic,[2] ya sc'an te lec sc'oblalic, ma xlehawanic ta c'op, ya sc'an ya sna'ic stsahtayel sbahic soc jun yo'tanic ta stojol spisil bintic ay ta scuentahic spasele.

¹²Te diáconohetic ya sc'an te jtuhl nax yihnam, soc te ya sna'ic scuentahinel ta lec te yal-snich'nabic soc mach'atic ay yu'un ta sna.

¹³Como te mach'atic lec ya x'a'tejic ta diáconohil ya stahic ich'el ta cuenta soc ya stahic bayel yip yo'tanic ta sch'uhunel te Cristo Jesús.

¹⁴Aunque sc'oblal ya xtal quilat ta ora, pero la jts'ihbabat ini

¹⁵scuenta yu'un, teme ma ba ora c'ohone, ya me ana' bin ya sc'an yac apas ta sna te Diose, ha te iglesia yu'un te cuxul Dios, te yoyal soc te yich'o-ip yu'un te smelelil c'ope.

¹⁶C'ax muc' sc'oblal te bin muquen ay ta ch'uhunel te Diose, hich te bin ut'il ya yal: Ha chicnaj[3] ta ch'ich'-baq'uet, ac'ot ta na'el yu'un te Espíritu te toj yo'tan, ilot yu'un te ch'ul a'batetic, halbot sc'oblal ta yohlil te jyanlumetic, ch'uhunot ta bahlumilal, ic'ot mohel ta utsilal.