Read Tzeltal 1 Timoteo 4 Bible Online

1 Timoteo 4 - Tzeltal bible

1 Timoteo 4

¹Pero jamal ya yal te Espíritu te ta nopol slajibal c'ahc'al ay mach'atic ya yihquitayic sch'uhunel Dios, ya me st'unic jlo'loywanej espírituhetic soc te bintic ya yaq'uic ta nopel pucujetic.

²Te bintic ya yaq'uic ta nopel ini ha ya xtal ta scuenta chebalc'optayel yu'un jlotetic, te tsajuben ta c'ahc' c'ohem te bin ya yal te yo'tanique.

³Ya xcomawanic ta nuhpunel soc ya yalic mandar te ay we'elil te ma me swe'ic, te ha nix pasbil yu'un Dios te ya swe'ic ta scuenta halbeyel wocol Dios te mach'atic sch'uhunejic soc te sna'ojic te bin melele.

⁴Como lec spisil bintic pasbil yu'un Dios, mayuc bin ay ta p'ajel, teme ya yich' halbeyel wocol Dios yu'un,

⁵como ch'ultesbil ta scuenta te sc'op Dios soc ta scuenta sc'oponel Dios.

⁶Teme hich yac awa'be snop te quermanotactic, lequil a'batat yu'un Jesucristo ya xc'ohat, te yipinej awo'tan yu'un te bintic ay ta ch'uhunel soc te lequil nohptesel te at'unoje.

⁷Ma xawich' ta cuenta te c'opetic scuenta bahlumilal soc te showilc'opic nax me'eletic. Pasa tulan ta slecubtesel acuxlejal ta stojol Dios,

⁸aunque ay stuc te slecubtesel baq'uet, ha bayel xan stuc te slecubtesel o'tanil, yu'un ay bin ya jtahtic yu'un ta cuxlejal ini soc ta patil te ya xtale.

⁹Ha smelelil c'op ini soc ya sc'an ch'uhunel yu'un spisilic.

¹⁰Ha scuentahil te ya x'a'tejotic soc ya ca'betic yipal, como ha smuc'ulinej co'tantic te cuxul Dios, te ha Jcoltaywanej yu'un spisil ants-winiquetic, pero ha mero Jcoltaywanej yu'un te mach'atic ya sch'uhunique.

¹¹Hala ta mandar soc ac'a ta nopel ini.

¹²Ma me ayuc mach'a ma xyich'at ta cuenta yu'un te jcolel winicat, a'beya yilic bin lec ta pasel te mach'atic ya sch'uhunic, a'beya yilic ta scuenta ac'op, atalel, sc'uxul awo'tan, sch'uhunel awo'tan soc te ma x'ana' slehel mulil.

¹³Te c'alal ma to ba ya xtalon, a'telina yilel te Shun Dios, soc a'telina tsitsaw soc p'ijubteswanej.

¹⁴Ma me xawac' pehc'ajuc te mahtanil awich'oj, te a'botat ta scuenta sc'op-jalwanej c'alal la scajambat sc'abic ta atojol ta schahpal te ancianohetique.

¹⁵A'telina spasticlanel ini; ha me xbaht ta awo'tan, scuenta yu'un hich me ya xchicnaj ta comonsitil a te behbe yac ta hu'el awu'une.

¹⁶Tsahtaya aba soc tsahtaya te bin yac awac' ta nopele; o'tantaya, como teme hich yac apase, hich ya xcolat a soc te mach'atic ya ya'iybat te ac'ope.