Read Tzeltal 1 Timoteo 5 Bible Online

1 Timoteo 5 - Tzeltal bible

1 Timoteo 5

¹Ma me xatij ta c'op te mamal, hichuc yac atsits bin ut'il atat; te mach'a queremetic, hichuc me ta awo'tan te bin ut'il awihts'inabe;

²te me'eletic, hichuc me ta awo'tan te bin ut'il anan, soc te ach'ixetic, hichuc me ta awo'tan te bin ut'il awihts'inab, tojuc me awo'tan ta stojolic.

³Ayuc ta cuenta awu'un te me'ba' antsetic te melel me'ba'etic nix a.

⁴Yan teme ay yalatac o teme ay yil-alatac te me'ba' antse, ha nahil ac'a snopic sc'uxultayel te mach'atic ay yu'unic soc ac'a ya'beyic bin ya xtuhun yu'un te sme'static, como ha lec soc ha lec yo'tan Dios yu'un.

⁵Yan te mach'a me'ba' ants te stuquel ay, ha smuc'ulinej yo'tan te Diose, soc c'ahc'al ahc'abal ya ya'telin yalel wocol soc sc'oponel Dios.

⁶Yan te ants te ya yac' sba ta spasel te bin mulantic sba, cuxul pero chamenix c'ohem.

⁷Ha nix hich xapasticlan ta mandar, scuenta yu'un mayuc mach'a ya sutot ta c'op yu'un,

⁸como teme ay mach'a ma ba ya ya'be bin ya xtuhun yu'un te mach'atic ay yu'un, soc ha tulan xan sc'oblal te mach'atic ay yu'un ta sna, la smuc te sch'uhunel yo'tan soc c'ax hich chopol a te bin ut'il mach'a ma ba sch'uhunej te Diose.

⁹Ha nax ya xhu' ya x'och ta ahtayel ta cuentahinel te me'ba' ants te ayix oxwinic (60) ya'bilal, te jtuhl nax smamalal c'ax soc,

¹⁰te lec sc'oblal yu'un te lec ya'tel: ha teme ay scoltesej yalatac, teme bayel yutsil yo'tan ya x'otseswan ta sna, teme ay la spocticlambe yoc mach'atic ch'uhltesbilic, teme ay la sc'uxultaylan mach'atic ay swocolic, teme ya'telinej spasel spisil lequil a'teliletic.

¹¹Yan te me'ba' antsetic te peq'uel to ya'bilalic, ma me xawahtay ta cuentahinel stuquel, como te c'alal ya x'u'untayotic yu'un te bin ya sc'an sbaq'uetalic yu'un ya sc'an ya xnuhpunic xan, ya yihquitayic ta yo'tanic te Cristo,

¹²ha smulic ya xc'oht te bin ut'il la sc'axuntayic te bin schapojic ta stojol ta nahil to.

¹³Soc ya snopic ch'ajilal, ya xpaxiajic ta nahnatic; soc ma ha'uc nax te ch'ajic, ya snopic le-c'op soc biluc nax ya sch'ic sbahic a, ya yalic te bin ma scuentahuc yalel.

¹⁴Ha yu'un ya jc'an te ya xnuhpunic te me'ba' antsetic te peq'uel to ya'bilalic, ac'a scoltes yalataquic, ac'a scuentahin snahic, hich ma xweht te bin chopol ya yal yu'un te contra,

¹⁵como ay mach'atic suhtemix ta spatic ta st'unel te Satanás.

¹⁶Teme ay mach'a te sch'uhunej Dios te ay me'ba' ants ta sna, ac'a scuentahin, scuenta yu'un ma ba ya ya'be swocol te iglesia, te hich mayuc ya spas falta yu'un a te mero me'ba' antsetic cuentahimbilic yu'un te iglesia.

¹⁷Te ancianohetic te lec ya xcuentahinwan, bayel ac'a yich' ich'el ta muc', ha mero hich ya sc'an ta stojol te mach'atic ya ya'telinic yalel sc'op Dios soc p'ijubteswanej,

¹⁸como hich ya yal ta Shun Dios: Ma me xawa'be sbolsahil sni' te j'a'tel-wacax c'alal yac ta sp'uyel trigo, xchi, soc: Te mach'a ya x'a'tej, ya me yich' stojol sc'ab yu'un te ya'tele, te xchihe.

¹⁹Ma me xawich' ta cuenta teme ya xlehbot smul jtuhl anciano, ha to teme ay cheb oxeb testigohetique.

²⁰Te mach'atic ya ya'telinic spasel mulil, tsitsa ta comonsitil, scuenta yu'un hich me ya xiwic a te yantique.

²¹Ya calbat tulan mandar ta stojol Dios soc te Cajwaltic Jesucristo soc ta stojol te tsahbil ch'ul a'batetic, te ya me apas spisil ini, ma me tsahbiluc nax mach'a yac ac'uxultay.

²²Ma me ayuc mach'a te ora nax yac acajan ac'ab ta stojol, soc ma me xawac' aba a te mach'a ay smul; tojuc me x'ayinat.

²³Ma me ha'uc nax xawuch' ha', uch'a jtebuc vino ta scaj te ach'uht soc te nopic yac awa'iy chamel.

²⁴Ay mach'atic chican ta ora te smulic te c'alal ma to x'ochic ta ich'el ta c'op yu'un a; pero ay yantic te patil to ya xchicnaj.

²⁵Ha nix hich ya xchicnaj te lequil a'teliletic, soc te lequil a'teliletic te mucul ayic ya me sta yorahil te ya xchicnaj.