Read Tzeltal 2 Timoteo 3 Bible Online

2 Timoteo 3 - Tzeltal bible

2 Timoteo 3

¹Soc ya sc'an te yac ana' ini: Ta slajibal c'ahc'al bahel ya xtal yorahil wocol.

²Ay mach'atic te ha nix c'ux ya ya'iy sbahic, xbiq'uet ta yo'tanic taq'uin, ya stoybe sba sc'oblalic, jbohlc'optaywanejetic, ya sc'axuntaybeyic smandar sme'static, ma sna'ic yalel wocol, chopolic,

³mayuc sc'uxul yo'tanic, mayuc perdón ta yo'tanic, jlehawetic ta c'op, ma scom sbahic, j'uts'inwanejetic, ihlaybil yu'unic te bintic lec,

⁴j'ac'awetic ta c'abal, ma sna'ic stsahtayel sbahic, stuquel nax muc' ya scuy sbahic, c'ax hich c'ux ta yo'tanic a te bintic ay ta ac'oltayel ta bahlumilal te bin ut'il c'ux ta yo'tanic te Diose,

⁵sjel te stojil yaquic ta sch'uhunel Dios yilel, pero ya smuc ta yo'tanic te ay yu'el. Jc'axel ma me xajoquin.

⁶Ha'ic te ya yochintayic nahetic, ya sjuquic bahel antsetic te bayel smulic, te jteb nax stahelic ta spasel bayel ta chahp chijil-o'tanil,

⁷te spisil ora yaquic ta snopel pero mayuc bin ora ya xhu' ya sna'beyic scuentahil te smelelil c'ope.

⁸Hich te bin ut'il la scontrahinic Moisés te Janes soc te Jambres, ha nix hich ya scontrahinic te smelelil c'ope; ha winiquetic te chopol spensaric, mayuc sch'uhunel yo'tanic.

⁹Pero mayuc binti bayel ya xhu' yu'unic spasel, como ya xchicnaj ta ilel ta comonsitil te sbohlilic, hich te bin ut'il te cheb winiquetique.

¹⁰Yan te ha'ate at'unoj te nohptesel cu'un, te bin yilel jtalel, te bin jnopoj ya jpas, te sch'uhunel co'tan, te sc'uxul co'tan, te ya xcuhch cu'un spisil,

¹¹bayel uts'inel soc wocol, hich te bin ut'il c'ax ta jtojol ta Antioquía, Iconio soc ta Listra. Bayel c'ax jwocol ta uts'inel, pero ha la scoltayon ta spisil te Cajwaltique.

¹²Ha nix hich ya me xc'ax swocolic ta uts'inel spisil te mach'atic ya sc'an ya yo'tantayic sch'uhunel te Cristo Jesús.

¹³Yan te mach'atic chopolic soc te jlo'loywanejetic behbe bohlobelic stuquel, ya xlo'loywanic soc ha nix lo'loybilic.

¹⁴Yan te ha'ate teyuc ay awo'tan spisil ora a te bin anopoj soc te bin c'ohem ta awo'tan, como ana'oj mach'a ya'beyejat anop,

¹⁵soc te ta awalalil to ana'oj bin ts'ihbabil ta sch'ul Shun Dios, te ha ya xhu' ya ya'bat ap'ijil scuenta colel ta scuenta sch'uhunel awo'tan ta stojol Cristo Jesús.

¹⁶Spisil te bin ts'ihbabil hilel ta Shun hich nix la sc'an Dios te ya yich' ts'ihbayel, soc ya xtuhun scuenta nohptesel, tsitsel, tojobtesel soc yaq'uel ta nopel bin stojil ta pasel,

¹⁷scuenta yu'un te winic yu'un Dios chapal ya xc'oht yu'un spasel spisil lequil a'teliletic.