Read Tzeltal 2 Timoteo 4 Bible Online

2 Timoteo 4 - Tzeltal bible

2 Timoteo 4

¹Ta stojol Dios soc ta stojol te Cajwaltic Jesucristo, te ya me yich' ta c'op te mach'atic cuxajtic soc mach'atic chamenic c'alal ya xchicnaj tal ta cuentahinwanej, ya ca'bat apas ini:

²hala te sc'op Dios, a'telina spasel ta yorahil o teme ma yorahiluc. A'iya comaw, coma soc tsitsa ta scuenta lamal awo'tan soc ta scuenta nohptesel;

³como ya sta yorahil te ma ba ya sc'an ya ya'iyiquix te lequil nohptesel, ya sac'ub schiquinic, hich ya stsob bayel maestrohetic yu'unic te ya xnoptesotic yu'un te bin ya smulanic,

⁴q'uejel ya me yac' schiquinic ta stojol te smelelil c'op, ya suhtic bahel ta stojol cuentohetic.

⁵Yan te ha'ate, na'a me stsahtayel spisil, cuhchuc me awu'un awocol, puca bahel te lec yach'il c'op, hu'tesa spisil te awa'tele.

⁶Te ho'one nopol ya sta yorahil te milbil smahtan Dios ya xc'ohon, nopol ya stahix yorahil ya xhil cu'un te bahlumilale.

⁷La jca'beyix te lequil tsaltamba, hu'ix cu'un te ahnimal, jcanantayej te bin ay ta ch'uhunel.

⁸Ta ora ini q'uejbilix ta jtojol te corona yu'un toj-o'tanil te ya ya'bon te Cajwaltic, te stojil Jchahpanwanej, ta sc'ahc'alel. Ma jtuqueluc nax, ha nix hich ya ya'be spisil te mach'atic toyol yo'tanic yac smahliybelic ya xtal te Cajwaltique.

⁹Ayuc bin ut'il ya xtal awilon ta ora,

¹⁰como te Demas la sch'ayonix hilel ta yo'tan, te bin ut'il bic'tajem yo'tan yu'un te bin scuenta bahlumilal, bahtix ta Tesalónica. Te Crescente bahtix ta Galacia, te Tito bahtix ta Dalmacia.

¹¹Ha xanix sjoquinejon te Lucas. Ic'a tal ajoquin te Marcos, yu'un ya xtuhun cu'un ta spasel te a'tele.

¹²La jticonix bahel ta Éfeso te Tíquico.

¹³Te c'alal ya xtalat, ich'bon talel te jnahtil c'u' hilem cu'un ta sna Carpo ta Troas, soc ich'bon talel te librohetic, ha bayel sc'oblal ta co'tan te balbil hunetique.

¹⁴Te Alejandro te jten-taq'uin, la ya'bon c'axuc bayel jwocol; ya me x'a'bot stoj yu'un Cajwaltic te bin la spase.

¹⁵Ha nix hichat tsahtaya me aba ta stojol, como bayel scontrahinej te bin la jcaltique.

¹⁶Te shahchibal buelta te tehc'anoton ta ich'el ta c'op mayuc mach'a ay ta jts'ehl, spisilic la yihquitayonic hilel; manchuc me x'a'bot smulinic.

¹⁷Pero ay ta jts'ehl te Cajwaltic soc la ya'bon quip, scuenta yu'un hich ts'acal la yich' halel te Sc'op Dios ta jcuenta, yu'un hich me ya ya'iyic spisil a te jyanlumetique. Hich colon ta ye jti'awal choj.

¹⁸Te Cajwaltic ya me scoltayon loq'uel ta spisil chopol a'teliletic soc ya me yic'on bahel ta banti te cuentahinel yu'un ta ch'ulchan. Ac'a yich' halbeyel yutsil sc'oblal sbahtel q'uinal. Hichuc.

¹⁹Halbon xcoltanuc te Prisca soc Aquila, soc ta sjunal sna te Onesíforo.

²⁰Te Erasto hil ta Corinto, te Trófimo ay ta chamel a la jquihquitay hilel ta Mileto.

²¹Ayuc bin ut'il ya xtalat te ma to stahojuc yorahil te scomil c'ahc'ale. Xcoltanucat laj yu'un te Eubolo, Pudente, Lino, Claudia soc spisil te quermanotactique.

²²Te Cajwaltic Jesucristo ac'a sjoquimbat te espíritu awu'un. Ac'a sjoquinex te yutsil-o'tanil. Hichuc.