Read Tzeltal Tito 1 Bible Online

Tito 1 - Tzeltal bible

Tito 1

¹Pablo, a'bat yu'un Dios soc jpuc-c'op yu'un te Jesucristo yu'un ya sta sch'uhunel yo'tanic a te mach'atic tsahbilic yu'un Dios soc yu'un ya sna'ic te smelelil c'op te hich toj ya sc'an ch'uhunel te Diose,

²te ha ya yac' smuc'ul co'tantic ta smahliyel te cuxlejal scuenta sbahtel q'uinal. Te Dios, te ma xya'iy lot, te c'alal ma to ayuc bintic ay a la yal ta jamal te ya me xchicnaj te cuxlejal ini,

³soc ta mero yorahil yu'un la yac' chicnajuc te bin la yal, ha la spas ta scuenta yalel te sc'op Dios te a'boton ta scuenta smandar te Cajwaltic Dios.

⁴Ta stojol Tito, te mero jnich'an ta scuenta te bin ay ta ch'uhunel ta comon. Ayuc me ta atojol te yutsil-o'tanil, xc'uxul-o'tanil soc lamal q'uinal yu'un te Jtatic Dios soc te Cajwaltic Jesucristo, te Jcoltaywanej cu'untique.

⁵La jquihquitayat hilel ta Creta scuenta yu'un yac ahu'tes ta chahpanel te bintic quechel ta pasel soc te yac awac'ticlambe yich' ya'telic ancianohetic ta jujun pueblo, hich te bin ut'il la jpasat hilel ta mandar.

⁶Te anciano ya sc'an te mayuc bin ya sutot ta c'op yu'un, te jtuhluc nax yihnam, te sch'uhunej Dios te yal-snich'nab soc ma ba ya xhalbot sc'oblalic te ha chopol stalelic soc jc'axun-mandaretic.

⁷Te anciano ya sc'an te mayuc bin ya sutot ta c'op yu'un, como ha scuentahinej te bin ay yu'un Dios; ma sc'an te ya stoy sba, te ya x'ilin ta ora, ya sc'an te ma xya'iy yacubel, ma ba ya shach c'op, ma ba ya sbic'sitay te bin ma stojiluc ta stahel taq'uin.

⁸Ha ya sc'an te ya x'otseswan ta sna, te c'ux ta yo'tan te bin lec, te ya stsahtay sba, toj yo'tan, ch'ultesbil, soc ya xhu' scomel sba.

⁹Ya sc'an te jc'axel yac'oj ta yo'tan te lequil c'op te a'bot snop, scuenta yu'un hich ya xhu' yu'un stsitsel ta scuenta lequil nohptesel soc ya xhu' yu'un sutbeyel sc'op te mach'atic ya xcontrac'optayot yu'une.

¹⁰Como ay tsobolic ya sutawanic ta c'op, jlomlomc'opetic soc jlo'loywanejetic; ha bayel hich ya spasic te mach'atic ayic ta scuenta circuncisión.

¹¹Ya sc'an ya yich' macbeyel yehic, como yac sjimbel nahetic, yu'un ta scaj sbic'sitayel taq'uin ya yaq'uic ta nopel te bin ma xtuhune.

¹²Ay hich yaloj jtuhl jalwanej yu'unic te jun slumalic soc: Te Cretahetic, stalel jlotetic, bohl chambahlametic, ch'ajic, bahem ta yo'tanic we'el uch'el, xchi sc'oblalic.

¹³Melel nix a te bin halbil sc'oblalique. Ha yu'un tulan me xatsits, scuenta yu'un lecuc me te sch'uhunel yo'tanic

¹⁴soc ma me xyich'ic ta cuenta te cuentohetic yu'un judíohetic soc te smandar winiquetic te yihquitayejic te smelelil c'ope.

¹⁵Spisil mach'atic lec yo'tanic, lec sc'oblal yu'unic spisil bintic ay, yan te mach'atic bohloben yo'tanic soc te ma sch'uhunic Dios, mayuc bin lec sc'oblal yu'unic, como bohloben sjolic soc yo'tanic.

¹⁶Ya sna'beyic sba Dios ta sc'opic, pero chican ta ya'telic te ma hichuc, te bin ut'il ihlaybilic, jc'axun-c'opetic, soc ma sna'ic spasel lequil a'telil.