Read Tzeltal Tito 2 Bible Online

Tito 2 - Tzeltal bible

Tito 2

¹Te ha'ate, ac'a ta nopel te bin lec ta nopel.

²Te mamaletic ya sc'an ya stsahtay yo'tanic, te ya x'ich'awanic ta cuenta, ya stsahtay sbahic, te ay lec sch'uhunel yo'tanic, te ay sc'uxul yo'tanic soc te ya xcuhch yu'unic spisil.

³Ha nix hich te me'eletic ya sc'an te ya x'ich'awanic ta cuenta bin ut'il ya x'ayinic ta q'uinal, te ma xlehawanic ta c'op soc ma ba mosohimbilic yu'un vino, ha ya yaq'uic ta nopel te bin leque.

⁴Ac'a ya'beyic snopic te jcolel antsetic te c'uxuc ac'a ya'iy ta yo'tanic te smamalalic soc yalataquic,

⁵te yacuc stsahtay sbahic, te sacuc yo'tanic, yacuc yo'tantayic ya'tel ta snahic, lecuc yo'tanic, te yacuc yac' sbahic ta cuentahinel yu'un te smamalalic, scuenta yu'un hich ma xbohlob sc'oblal a te sc'op Diose.

⁶Ha nix hich ya me atsits te queremetic te yacuc stsahtay sbahic.

⁷Ta spisil ac'a ta ilel ta yohlilic te bin lec ta pasele. C'alal yac awa'iy p'ijubteswanej ac'a ta ilel te jun ay te awo'tan, te ay sc'oblal ta awo'tan,

⁸soc lequil c'op xawal te ma xhu' ta contrahinel, scuenta yu'un ya sta q'uexlal a te acontra soc ma xweht bin chopol ya yalbotic jc'oblaltic.

⁹Tsitsa te mosohetic te yacuc sch'uhumbeyic smandar te yajwalic, te lecuc yo'tanic ta stojolic, ma me sutawanic ta c'op.

¹⁰Ma me xyelc'anic te yajwalic, ac'a me yaq'uic ta ilel te jun yo'tanic ta stojol, scuenta yu'un hich me lec ya xc'oht sc'oblal yu'unic a te bin ay ta nopbeyel sc'oblal Dios, te Jcoltaywanej cu'untique.

¹¹Como chicnajemix te yutsil yo'tan Dios scuenta yu'un ay colel ta stojol spisil ants-winiquetic,

¹²soc ya snohptesotic te yacuc xhil cu'untic spisil bintic chopol soc bintic mulantic sba ta pasel ta bahlumilal, te tsahtaybiluc co'tantic ya x'ayinotic ta ora ini, te tojuc ya x'ayinotic soc te ayuc ta co'tantic spisil ora te Diose,

¹³te c'alal yacotic ta smahliyel te bin smuc'ulinej co'tantic te bayel yutsil, ha te ya xchicnaj tal soc yutsilal te muc'ul Dios soc Jcoltaywanej cu'untic, ha te Jesucristo.

¹⁴Ha la yac' sba ta lajel cu'untic yu'un la smanotic loq'uel ta stojol spisil bintic chopol soc yu'un ya sch'ultes jun pueblo te yu'un ya xc'oht, te ya yo'tantayic spasel lequil a'teliletic.

¹⁵Ha me xawalbe ya'iyic, ya me atsits soc ya me acom ta scuenta spisil yip awa'tel. Ma me ayuc mach'a ya sp'ajat.