Read Tzeltal Tito 3 Bible Online

Tito 3 - Tzeltal bible

Tito 3

¹A'beya xan sna'ic te ac'a yac' sbahic ta cuentahinel yu'un te ajwaliletic soc te mach'atic ay ya'telic, ac'a sch'uhumbeyic smandar, te chapaluc ta spasel spisil lequil a'teliletic.

²Ma me ayuc mach'a ya sbohlobtesbeyic sc'oblal, soc ma me xya'iyic hach-c'op, ayuc me yutsil yo'tanic, yacuc yaq'uic ta ilel te manso yo'tanic ta stojol spisil ants-winiquetic.

³Ta nahil to ha nix hichotic, ma ba la jna'tic q'uinal, jc'axun-c'opotic, howiyemotic, mosohimbilotic yu'un chijil-o'tanil soc spisil ta chahp bintic mulambil cu'untic spasel, ca'telinejtic lablab-o'tantaywanej soc ti'ti'o'tantaywanej, ihlaybilotic soc talel c'axel la jquihlay jbahtic.

⁴Pero te c'alal chicnaj te lec yo'tan soc te sc'uxul yo'tan Dios, te Jcoltaywanej cu'untic, ta stojol spisil ants-winiquetic,

⁵la scoltayotic, ma ha'uc yu'un te lec ca'tel jpasojtic, ha nax ta scuenta sc'uxul yo'tan, ta scuenta te poquel yu'un cha'ayinel soc ta scuenta te ach'ubtesel yu'un te Ch'ul Espíritu.

⁶Te Dios bayel la smal ta jtojoltic te Ch'ul Espíritu ta scuenta Jesucristo, te Jcoltaywanej cu'untic,

⁷scuenta yu'un, te bin ut'il lec ilotiquix yu'un Dios ta scuenta yutsil yo'tan, ya xc'oht ta jcuentatic yich'el te cuxlejal scuenta sbahtel q'uinal te yacotic ta smahliyel.

⁸Ha stojil c'op ini, soc ya jc'an te tulan sc'oblal yac awa'be sna'ic, scuenta yu'un te mach'atic sch'uhunejic Dios ya me ya'telinic spasel lequil a'teliletic, te ha lec soc te ya xtuhun yu'un te ants-winiquetique.

⁹Pero ma me xawac' aba a te tentamba ta c'op te mayuc scuentahil, te xtiq'uet ta halel bihililetic yu'un ts'umbalil, tijtamba c'op soc shach c'op ta scuenta te Ley, como ma xtuhun soc mayuc bin ya xloc' a.

¹⁰Teme ay mach'a ya yac' jatamba, teme la atsits jun cheb buelta, loq'uesa,

¹¹como yac ana' te bohloben, soc te ay smul soc ha nix ya yac' sba ta stojel te smule.

¹²Te c'alal ya jticon tal ta atojol te Artemas o Tíquico, ayuc te ya xtal awilon ta ora ta Nicópolis, yu'un jnopoj te tey ya xc'ax cu'un a te yorahil sic.

¹³Coltaya ta spisil bintic ya xtuhun yu'unic te Zenas te maestro yu'un Ley, soc te Apolos, scuenta yu'un mayuc bin ya xpasotic falta yu'un.

¹⁴Te mach'atic pajal jch'uhunejtic Dios soc ya sc'an ya snopic spasel lequil a'teliletic ta stojol te mach'atic ay falta yu'unic, scuenta yu'un hich ay scuentahil te scuxlejalique.

¹⁵Xcoltanucat laj yu'un spisil te mach'atic li' joquinej. Halbon xcoltanuc te mach'atic c'uxotic ta yo'tanic ta scuenta bin ut'il pajal ay sch'uhunel co'tanic. Ac'a sjoquinex te yutsil yo'tan te Diose. Hichuc.