Read Tzeltal Santiago 1 Bible Online

Santiago 1 - Tzeltal bible

Santiago 1

¹Santiago, ya'bat te Dios soc te Cajwaltic Jesucristo, ya jpatbeyex awo'tanic te lajchaychahp sts'umbal Israel te puhquemex ta bayuc.

²Quermanotac, bayeluc me yutsil awo'tanic te c'alal ay bayel awocolic ta tsajel,

³como ana'ojic te c'alal ya yich' tsajel te sch'uhunel awo'tanic ya yac' te ya xcuhch awu'unic.

⁴Ac'a shu'tes te ya'tel te ya xcuhch awu'unic, scuenta yu'un lec soc ts'acal ya xc'ohex yu'un, te mayuc bin ya spasex falta a.

⁵Teme ay mach'a mayuc sp'ijil yo'tan, ac'a sc'ambe Dios, ma p'isbiluc nax ya yac' stuquel soc mayuc mach'a ya sp'aj, ya me x'a'bot yu'un.

⁶Pero ac'a sc'ambe soc sch'uhunel yo'tan, ma me xchebetuc yo'tan; como te mach'a xchebet yo'tan, hich c'ohem te bin ut'il stselajan mar te bayuc nax ya xtenot yu'un ic'.

⁷Te mach'a hich ya spas, ma me scuy te ay bin ya x'a'bot yu'un te Cajwaltique.

⁸Te mach'a xchebet yo'tan, ya sjelticlan spisil bintic ya spas.

⁹Te quermanotic te peq'uel ay, ac'a stoybe sba q'uinal ya'iy yu'un te ay bayel sc'oblal.

¹⁰Yan te mach'a jc'uhlej, ac'a sna' te peq'uel ay, como hich ya xc'ax bahel te bin ut'il snich ha'mal.

¹¹Como te c'alal ya xloc' tal c'ahc'al, ya xtaquij yu'un sq'uixinal, ya xluhbaj snich, ya xlaj yutsil. Hich nix ya xtaquij te mach'a jc'uhlej ta banti spisil te ya'tele.

¹²Bayel me yutsil te mach'a ya xcuhch yu'un swocol ta tsajel, como teme cuhch yu'une, ya me x'a'bot yich' te corona yu'un cuxlejal te yaloj Dios ya yich'ic te mach'atic c'ux ya ya'iy ta yo'tanic.

¹³Te mach'a ay ta sujel ta mulil, ma me scuy te ha ay ta sujel yu'un Dios, como te Dios ma xhu' ya sujot ta mulil yu'un, soc mayuc mach'a ya suj ta mulil;

¹⁴tuhlutuhl ya ya'iy sujel ta mulil yu'un te bin chopol ya sc'an yo'tan, te ya xnitot soc ya xmonot yu'une.

¹⁵C'alal hahchemix te bin chopol ya sc'an yo'tan, ya yayintes mulil; c'alal yich'ojix yip a te mulile, ya yayintes lajel.

¹⁶Quermanotac te c'uxex ta co'tan, ma me xalo'loy abahic.

¹⁷Spisil te bin lec a'bibilotic soc spisil lequil mahtanil talem ta toyol, ta stojol te Tatil yu'un sacal q'uinal, te ma xyanij hich te bin ut'il axinal.

¹⁸Ta scuenta sc'anojel yo'tan la yac' te ya x'ayinotic ta scuenta te smelelil c'op, scuenta yu'un sba sit ya xc'ohotic yu'un spisil bintic pasbil yu'un.

¹⁹Ha yu'un, quermanotac te c'uxex ta co'tan, chapaluquex me apisilic yu'un ya'iyel ta ora te bin ya yich' halel, ma me orahuc ya xc'opojex, soc ma me orahuc ya x'ilinex,

²⁰como te yilimba ants-winiquetic ma ba ya yac' te ya spas te bin stojil ay ta pasel yu'un Dios.

²¹Ha yu'un ihquitayahic spisil bin bohloben soc te bayel bin chopol ta pasele; peq'ueluc me awo'tanic xawich'ic te c'op ts'umbil ta awo'tanic, te ha ya xhu' ya xcol ach'uhlelic yu'un.

²²Pasahic te bin ya yal te sc'op Dios, ma ha'uc nax te yac awa'iyic, te hich yac alo'loy abahic a.

²³Como te mach'a ya ya'iy te sc'op Dios, teme ma ba ya spas te bin ya yale, pajal c'ohem soc te mach'a ya yil te sit yelaw ta espejo;

²⁴xlaj nax yilbel sba a ya xloc' bahel, ora ya xch'ay ta yo'tan te bin yilele.

²⁵Yan te mach'a t'ojol sit ya yil te lequil ley te ya x'ac'awan ta libre, teme hich ya spasulan, teme ma xch'ay ta yo'tan te bin ya ya'iy, teme ha ya spase, ha me bayel yutsil yu'un.

²⁶Teme ay mach'a sch'uhunej Dios ta sc'op, pero teme ma ba ya scom ye, ya slo'loy sba ta yo'tan, tojol te sch'uhunej Dios ya yale.

²⁷Te sch'uhunel Dios te lec soc te mayuc bin chopol tey a ya yil te Jtatic Dios, ha te yula'tayel te me'ba' alaletic soc me'ba' antsetic te ay swocolic, soc te ya scanantay sba te ma xbohlobtesot yu'un te bahlumilale.