Read Tzeltal Santiago 2 Bible Online

Santiago 2 - Tzeltal bible

Santiago 2

¹Quermanotac, te ay sch'uhunel awo'tanic ta stojol te Cajwaltic Jesucristo te ay yutsilal, ma me tsahbiluc nax mach'a yac awich'ic ta cuenta.

²Teme ya x'och tal ta banti atsoboj abahic te mach'a ay sch'ocow pasbil ta oro soc buen lec sc'u' spac', soc teme ya x'och tal jtuhl pobre te poco'ix sc'u' spac',

³teme ha lec yac awil te mach'a slapoj lec sc'u' spac', soc teme hich yac awalbe: Huclan li'i ta banti lequil lugar, soc teme hich yac awalbe te pobre: Lum xatehc'an aba, o huhcana aba ta lum, teme yac awute,

⁴¿ma bal tsahbiluc nax awu'unic te mach'a yac awich'ic ta cuenta ta awohlilic, soc jchahpanwanejex c'ohemex te chopol bin anopojique?

⁵Quermanotac te c'uxex ta co'tan, a'iya me awa'iyic: ¿Ma bal ha'uc tsahbil yu'un Dios te pobrehetic ta bahlumilal te ha' c'uhlejetic ta scuenta sch'uhunel yo'tanic soc ya x'a'bot yich'ic te cuentahinel yu'un Dios te yaloj te ya yich'ic te mach'a c'ux ta yo'tanic te Diose?

⁶Pero ha'ex la ap'ajic te pobre. ¿Ma bal ha'uc te jc'uhlejetic te ya yuts'inex, soc ma bal ha'uc te ya sjochex bahel ta stojol te chahpajibal?

⁷¿Ma bal ha'uc te ya sbohlc'optaybeyic te yutsil sbihil te mach'a ayex ta scuentahe?

⁸Lec te bin yac apasic teme smelelil yac ac'ohtesic ta pasel te Ley te toyol ay, te hich ya yal ta Shun Dios: C'ux me xawa'iy ta awo'tan te apat-axuhc hich te bin ut'il c'ux yac awa'iy aba, te xchihe.

⁹Yan teme tsahbil nax mach'a yac awich'ic ta cuenta, yac ata amulic soc ya yalbat te Ley te jc'axun-c'opex.

¹⁰Como te mach'a ya scanantay spisil te Ley, pero teme ya sc'axuntay jp'ahluc, stahojix smul ta stojol spisil te Ley abi.

¹¹Como te mach'a la yal: Ma me xawa'iy antsiwej, te xchihe, ha nix hich la yal: Ma me xawa'iy milaw, xchi. Ha yu'un teme ma ba la awa'iy antsiwej, pero teme la awa'iy milaw, la ac'axuntay spisil te Ley abi.

¹²Hich me xc'opojex soc hich me xapasic te bin ut'il mach'a ya x'ich'ot ta c'op yu'un te ley te ya x'ac'awan ta libre,

¹³como te mach'a ma ba la ya'iy c'uxultaywanej, ma ba ya yich' c'uxultayel te c'alal ya xc'oht ta ich'el ta c'op; te c'uxultaywanej ya stsal te ich'el ta c'op.

¹⁴Quermanotac, ¿bin ya xloc' a teme ay mach'a ya yal te ay sch'uhunel yo'tan pero teme mayuc ya'telul? ¿Ya bal xhu' ya xcoltayot yu'un te sch'uhunel yo'tane?

¹⁵Ha xan teme ay awermano o awermana te mayuc sc'u' spac' soc mayuc swe'el scuenta jujun c'ahc'al,

¹⁶teme ay yac awalbe: Bahan, lamaluc me q'uinal xawa'iy, q'uixnaya aba, we'an uch'an, teme yac awute, pero teme ma ba yac awa'be te bin ya xtuhun yu'un ta sbaq'uetal, ¿bin ya xtuhun a?

¹⁷Ha nix hich te sch'uhunel-o'tanil, teme mayuc ya'telul, chamen mehix abi.

¹⁸Pero ay mach'a ya yal: Te ha'ate ay sch'uhunel awo'tan, te ho'one, ay ca'tel, xchi. A'bon quil te sch'uhunel awo'tan te mayuc ya'telul, te ho'one, ya ca'bat awil ta scuenta ca'tel te sch'uhunel co'tane.

¹⁹Ha'at ach'uhunej te junax Dios ay; lec ay. Ha nix hich sch'uhunej te pucujetic, soc ya xnihc yo'tanic yu'un.

²⁰Ma xana' q'uinal, ¿ya bal ac'an yac ana' te ma xtuhun te sch'uhunel-o'tanil te mayuc ya'telul?

²¹¿Ma bal ta scuentahuc ya'tel te jtatic Abraham te halbot te toj c'oht yu'un, te c'alal la yac' ta milbil mahtanil te snich'an, ha te Isaac, ta scajtajib ta chiq'uel mahtanil?

²²¿Ma bal yacuc awil te sch'uhunel yo'tan la snuhp'in sba soc te ya'tel, soc te ts'acal c'oht te sch'uhunel yo'tan ta scuenta te bin la spase?

²³Ha c'oht ta pasel te bin ya yal te Shun Dios: Te Abraham la sch'uhun te bin la yal te Diose, ha ac'ot ta cuenta yu'un te toj ay, soc halbot sc'oblal te ha sc'uxultaywanej sba soc te Diose.

²⁴Ha yu'un yac awilic te toj ya x'ilot yu'un Dios te ants-winic ta scuenta te ya'tel, ma ha'uc nax ta scuenta sch'uhunel yo'tan.

²⁵Ha nix hich te Rahab, te j'antsinel-ants, ¿ma bal ha'uc toj ilot yu'un Dios ta scuenta te ya'tel te c'alal la yic' ochel te jtsahtaywanejetic soc te la sticon bahel ta yan be?

²⁶Hich te bin ut'il chamen baq'uet teme mayuc sch'uhlel, ha nix hich chamen te sch'uhunel-o'tanil teme mayuc ya'telule.