Read Tzeltal Santiago 4 Bible Online

Santiago 4 - Tzeltal bible

Santiago 4

¹¿Banti ya xtal te guerra soc te hach-c'op ta awoholilic? ¿Ma bal ha'uc ta scuenta te bintic ya smulan awo'tanic, te ha ya ya'iyic tsaltamba ta awo'tanique?

²Ay bin ya xbic'taj awo'tanic yu'un, pero ma ba yac atahic; ya xmilawanex soc ay sbic'tal awo'tanic, pero mayuc bin yac atahic a; yac atsal abahic soc ya xtsalawanex, pero ma ba yac atahic a te bin ya sc'an awo'tanic, como ma ba yac ac'ambeyic te Diose.

³Yac ac'ambeyic, pero ma ba yac awich'ic, yu'un ma ba lec yac ac'ambeyic, ha nax yac ac'anic yu'un yac atuhunic yu'un te bintic ya smulan awo'tanique.

⁴¡J'antsinelex soc j'antsiwejex! ¿Ma bal ana'ojic te ha scontrahinel Dios teme jun awo'tan abahic soc te bahlumilale? Te mach'a ya sc'an te jun yo'tan sba soc te bahlumilal, ha scontrahinej te Diose.

⁵O ¿ya bal acuyic te tojol hich ya yal te Shun Dios: Te espíritu te la yac' ayinuc ta co'tantic, ha bayel xut'et yo'tan,[1] te xchihe?

⁶Pero c'ax bayel xan yutsil-o'tanil ya yac' te Diose. Ha scuentahil te hich ya yal: Dios ya scontrahin te mach'a ya stoy sba, pero ya sc'uxultay te mach'a peq'uel ay, xchi.

⁷Ha yu'un ac'a abahic ta cuentahinel yu'un te Diose; ma xawac' yochintayex te pucuje, hich ya xloc' ta ahnel ta atojolic.

⁸Nohpojanic ta stojol Dios, hich ya xnohpoj ta atojolic. Jmulawiletic, poca ac'abic; soc ha'ex te cheb awo'tanique, poca awo'tanic.

⁹Mela awo'tanic, oq'uetaya abahic. Ac'a sutp'ijuc ta oq'uel te atse'ejic, soc ac'a sutp'ijuc ta mel-o'tan te stse'elil awo'tanique.

¹⁰Pehc'ana abahic ta stojol te Cajwaltic, ha me ya stohytesbeyex ac'oblalic.

¹¹Quermanotac, ma me talel c'axeluc xawalbe abahic bin chopol. Te mach'a ya yalbe bin chopol te yermano o ya yich' ta c'op, ha ya yalbe chopol sc'oblal te Ley soc ha ya yich' ta c'op. Teme ha'at yac awich' ta c'op te Ley, ma ba yac apas te bin ya yal te Ley, ha jchahpanwanejat yu'un ya xc'ohat.

¹²Jtuhl nax mach'a yac'oj te Ley soc te ha Jchahpanwanej yu'un, ha te mach'a ya xhu' ya xcoltaywan soc ya xch'ayawan. Pero te ha'ate ¿mach'a yac acuy aba yu'un te yac awich' ta c'op yan?

¹³A'iya awa'iyic ini, ha'ex te hich yac awalic: Yo'tic o pajel ya xbohotcotic ta pueblo, ya xhalajotcotic jun ha'bil tey a, ya ca'iycotic mambajel, chombajel soc ya me jpascotic bayel ganar, te xchihexe.

¹⁴Ma xana'ic bin ya xc'oht ta pasel pajel. ¿Bin a te acuxlejale? Ha sahb lum te jts'ihn nax ya xchicnaj, patil ya xch'ay bahel.

¹⁵Ha ya sc'an te hichuc yac awalic: Teme hich ya sc'an te Cajwaltic, teme cuxulotcotic a, ya jpascotic ini o te yane, xchihex.

¹⁶Yan te ha'exe yac atoy abahic ta scuenta awulwul-c'opic. Spisil toybahil hich te bin ut'il ini ma lecuc.

¹⁷Te mach'a sna'oj te bin lec ta pasel, pero teme ma ba ya spas, ha smul abi.