Read Tzeltal Santiago 5 Bible Online

Santiago 5 - Tzeltal bible

Santiago 5

¹A'iya me awa'iyic, jc'uhlejetic, oc'anic soc awetanic yu'un te wocoletic te ya xtal ta atojolique.

²C'a'emix te ac'uhlejalic, soc huticlambilix ta chan te ac'u' apaq'uique.

³Chuxubenix te oro soc te plata awu'unique. Te schux te ataq'uinic, ha ya scontrahinex ta testigo-c'op, soc ya me slajimbeyex abaq'uetalic hich te bin ut'il c'ahc'. Atsoboj ac'uhlejalic yu'un slajibal c'ahc'al.

⁴A'iya me awa'iyic, yaquic ta aw ta scontrahimbelex te j'a'teletic te la stsobeyex sit te ats'unub awawalic, te ta scuenta lo'loyel ma ba la atojique. Te yawic te mach'atic la stsobic te sit ats'unub awawalic c'ohtix ta stojol te Cajwaltic te scuentahinej spisil.

⁵Lec cuxulex li' ta bahlumilal soc la apasic te bintic la smulan awo'tanic. La ajuhp'tes abahic yu'un te sc'ahc'alel miltamba.

⁶La awaq'uic ta lajel soc la amilic te mach'a toj yo'tan, ma ba la scomex.

⁷Quermanotac, junuc me awo'tanic ta smahliyel ha to c'alal ya xtal te Cajwaltique. Ilawil bin ut'il te j'a'tel ta q'uinal ya smahliybe sit te sts'unub yawal, jun yo'tan ya smahliy te sba yahlelan ha'al soc te slajibal syahlel ha'ale.

⁸Ha nix hichex, junuc me awo'tanic xamahliy soc ayuc me yip awo'tanic, como nopolix ya xtal te Cajwaltique.

⁹Quermanotac, ma me talel c'axeluc xale abahic ta c'op, scuenta yu'un ma ba ya xc'ohex ta ich'el ta c'op yu'un. Ilawil, teq'uelix ta ti'nahil te Mach'a ya x'ich'awan ta c'op.

¹⁰Quermanotac, ha me xanopbeyic yo'tan te jalwanejetic te c'opojic ta scuenta sbihil Cajwaltic, te cuhch yu'unic te swocolique.

¹¹Ya caltic te ha bayel yutsilic te mach'atic ya xcuhch yu'unic te swocolique. Awa'iyejic bin ut'il cuhch yu'un te Job, soc awilojic bin ut'il c'oht ta loq'uel ta patil yu'un te Cajwaltic, como te Cajwaltic bayel ya xc'uxultaywan soc ya sna'botic yo'bolil jbahtic.

¹²Quermanotac, ha tulan sc'oblal te ma me ayuc bin yac awalic ta jamal ta scuenta te ch'ulchan, te bahlumilal, o biluc yan. Hich, xchihanic me teme hiche. Ma hichuc, xchihanic me teme ma hichuque, scuenta yu'un ma ba yac awich'ic ich'el ta c'op yu'un.

¹³¿Ay bal mach'a ay swocol ta awohlilic? Ac'a sc'opon Dios. ¿Ay bal mach'a buen tse'el yo'tan? Ac'a c'ayojinuc.

¹⁴¿Ay bal mach'a te ay ta chamel ta awohlilic? Ac'a yic' tal te ancianohetic yu'un te iglesia yu'un ya sc'opombeyic Dios, soc ac'a smalic ta aceite ta scuenta sbihil te Cajwaltique.

¹⁵Teme ay sch'uhunel yo'tanic te ya sc'oponic Dios, ya xlecub te jchamel yu'un; ya xhahchot yu'un te Cajwaltique. Soc teme ay stahoj smul, ya xpasbot perdón yu'un.

¹⁶Talel c'axel halbeya abahic te amulique, soc talel c'axel c'opombeya abahic Dios, scuenta yu'un hich me ya xlecubex ta chamel a. Te ya sc'opon Dios te mach'a toj yo'tan, ay yu'el soc bayel bin ya xc'oht ta pasel yu'un.

¹⁷Te Elías pajal mayuc quiptic soc, pero tulan la sc'opon Dios yu'un te manchuc ya xtal ha'al, hich ma ba tal ha'al ta bahlumilal j'ohlil schaneb ha'bil.

¹⁸La scha'c'opon xan te Diose, hich la yac' tal ha'al te ch'ulchan, hich sitin ts'unub awaliletic ta q'uinal.

¹⁹Quermanotac, teme ay mach'a ay ta awohlilic te howiyem loq'uel ta stojol te smelelil c'op, teme ay mach'a ya xtojobtesot tal yu'une,

²⁰ac'a me sna' te bin ut'il te mach'a ya yac' te ya suht tal te jmulawil te ch'ayem ta be, ha ya scoltaybe loq'uel sch'uhlel ta lajel soc bayel muliletic ya xch'ay ta scuenta.