Read Tzeltal 1 Pedro 3 Bible Online

1 Pedro 3 - Tzeltal bible

1 Pedro 3

¹Ha nix hichex, antsetic, ac'a abahic ta cuentahinel yu'un te amamalalic, scuenta yu'un teme ay ma ba ya sch'uhunic te sc'op Dios, ya me sch'uhunic, ma ha'uc ta scuenta ac'opic, ha ta scuenta te bin yac apasic,

²te c'alal ya yilic te lec bin yac apasic soc te ya x'ich'awanex ta cuenta.

³Te ach'ahlelic ma me ha'uc nax ta sba, hich te bin ut'il tesbil ajolic te ch'albil, te ach'ahlelic ta oro o lequil c'u'ul pac'al,

⁴ha'uc me ach'ahlelic te bin ay ta awo'tanic, te sch'ahlel te ma xlaj sc'oblal, ha te yutsil awo'tanic soc lamal awo'tanic, te ha lec yo'tan yu'un te Diose.

⁵Como hich la sch'ahl sbahic a te ch'ul antsetic ta namey te la smuc'ulin yo'tanic te Dios soc la yac' sbahic ta cuentahinel yu'un te smamalalique.

⁶Hich bin ut'il te Sara, la sch'uhumbe smandar te Abraham, te la yalbe: Cajwal, xchi ta stojol. Ha yantsil-alataquex teme yac apasic te bin lec ta pasel soc teme mayuc bin yac atojol-xi'ique.

⁷Ha nix hichex, winiquetic, socuc sp'ijil awo'tanic ya x'ayinex soc te awihnamique; ich'ahic ta muc' te ants hich te bin ut'il jun vaso te ora ya xwuy, soc te bin ut'il pajal yac awich'ic te cuxlejal te ay yutsil. Hich me xapas scuenta yu'un mayuc bin ya smaquex a te yac ac'oponic te Diose.

⁸Ta scuenta slajibal, junuc me awo'tan abahic ta apisilic, na'a yo'bolil abahic, c'ux me xawa'iy abahic te bin ut'il awermano abahic, a'iyahic c'uxultaywanej soc peq'uel me xawac' abahic.

⁹Ma me xasutbeyic ta bin chopol te mach'a chopol bin ya spasbeyex, soc ma me xasutbeyic chopol sc'oblal te mach'a la yalbeyex chopol ac'oblalic, ha xac'ambeyic bendición, como ana'ojic te ha ic'bilex yu'un yac awich'ic bendición,

¹⁰como hich ya yal: Te mach'a ya sc'an ya sc'uxultay te scuxlejal soc te ya yil te lec ya xc'ax jujun c'ahc'al yu'un, ac'a scom ye ta yalel bin chopol, soc ma me xloc' lo'loywanej ta ye.

¹¹Ac'a hiluc yu'un te bin chopol, ac'a spas te bin lec; ac'a sle lamal q'uinal soc ac'a st'un.

¹²Como t'ojol sit Cajwaltic ta stojol te mach'atic toj yo'tanic, soc ya ya'iybe sc'opic te c'alal ya xc'oponot, pero contra ya yil te mach'atic ya spasic te bin chopol, xchi.

¹³¿Mach'a c'an yuts'inex teme ha ya xbaht ta awo'tanic spasel te bin leque?

¹⁴Pero teme ay ya xc'ax awocolic ta scaj te bin stojil yac apasic, bayel me awutsilic yu'un. Ha yu'un ma xaxi'ic te bin ya xhu' ya spasbeyex, soc ma me xna'non awo'tanic yu'un.

¹⁵Ha me xawich'ic ta muc' ta awo'tanic te Cristo te bin ut'il ha Ajwalil awu'unic, soc chapaluquex me spisil ora ta sjac'beyel sc'op te mach'a ya sjoc'obeyex te bin ut'il ay sc'oblal te smuc'ul awo'tanic, mansohuc me awo'tanic soc ich'biluc me ta cuenta hich yac apasic.

¹⁶Lecuc me bin ya yalbat awo'tan, scuenta yu'un ya xq'uexawic te mach'atic chopol bin ya yalbeyic sc'oblal te bintic lec yac apasic te bin ut'il yu'unex Cristo.

¹⁷Ha lec xan te ya xc'ax awocolic yu'un spasel te bin lec, teme hich ya sc'an Dios, te bin ut'il spasel te bin chopole.

¹⁸Como ha nix hich te Cristo jmehl nax laj ta scuenta mulil, ha laj te mach'a toj ta scuenta te mach'atic ma tojuquic, yu'un ya yiq'uex bahel ta stojol Dios. Ac'ot ta lajel ta sbaq'uetal, pero cuxaj ta scuenta espíritu,

¹⁹te ha nix ta scuenta baht yalbe sc'op Dios te ch'uhlelaletic te chuculic,

²⁰ha te mach'atic ta namey ma ba la sch'uhunic mandar te c'alal Dios la smahliy ta yorahil Noé te c'alal ay ta spasel a te barco, te banti waxactuhl nax colic ta ha'.

²¹Te ha'e ha seña te ich'-ha' te ya xcolotic yu'un (ma ha'uc te ya sloq'uesbe yabaquil baq'uet, ha te bin ya calbe wocol Dios yu'un te bin ut'il mayuc bin ya yalbotic te co'tantique). Ha ya xcolotic yu'un ta scuenta te cha'cuxaj te Jesucristo,

²²te mach'a mohix ta ch'ulchan soc te ayix ta swa'el-c'ab te Diose; ha scuentahinej ch'ul a'batetic soc te mach'atic ay ya'telic soc te ay yu'elique.