Read Tzeltal Jueces 10 Bible Online

Jueces 10 - Tzeltal bible

Jueces 10

¹Ta patil yu'un te Abimelec, hahch yac' ta libre te Israel te Tola snich'an Fúa, snich'an Dodo, jtuhl winic yu'un Isacar, te nahin ta Samir te ay ta witsiltic yu'un Efraín.

²Ha juez c'oht yu'un Israel oxeb scha'winic (23) ha'bil, patil cham, la yich' muquel ta Samir.

³Ta patil hahch Jair te talem ta Galaad, ha juez c'oht yu'un Israel cheb scha'winic (22) ha'bil.

⁴Ay lajuneb scha'winic (30) ta tuhl snich'nab te mohic ta lajuneb scha'winic (30) ta coht burro; soc ay lajuneb scha'winic (30) pueblohetic yu'unic ta sq'uinal Galaad, te ha ‘pueblohetic yu'un Jair’, xchi sbihilic c'alal ora.

⁵Cham te Jair, la yich' muquel ta Camón.

⁶Pero te snich'nab Israel la scha'pasic xan te bin chopol ta stojol Jehová, la yac' sbahic ta a'batinel yu'un te baaletic soc te Astarot, te diosetic yu'un Siria, Sidón, Moab, Amón soc yu'un te filisteohetic. La yihquitay ta yo'tanic te Jehová, ma ba la yac' sbahic ta a'batinel yu'un.

⁷Ha yu'un tihl yilimba Jehová ta stojol Israel, hich a'botic ta sc'ab te filisteohetic soc te amonetic.

⁸La yuts'inic soc te la ya'beyic swocol te snich'nab Israel waxaclajuneb (18) ha'bil, spisil te snich'nab Israel te nahinemic ta Galaad ta jehch Jordán, ta sq'uinal te amorreohetique.

⁹Te amonetic sohlic bahel ta Jordán yu'un ya ya'beyic guerra te Judá, Benjamín soc te sts'umbal Efraín. C'ax bayel swocol te Israel yu'un.

¹⁰Ha yu'un te snich'nab Israel awonic ta stojol Jehová, hich la yalbeyic: Jtahoj jmulcotic ta atojol, yu'un la jquihquitaycotic hilel te Dios cu'uncotic, la jcac' jbahcotic ta a'batinel yu'un te baaletic, xchihic.

¹¹Te Jehová hich la sjac'be sc'op te snich'nab Israel: ¿Ma bal lajuc awich'ic uts'inel yu'un te egipciohetic, amorreohetic, amonetic, filisteohetic,

¹²te mach'atic yu'un Sidón, Amalec soc Maón?[19] Te c'alal awonex ta jtojol ¿ma bal lajuc jcoltayex loq'uel ta sc'abic?

¹³Pero te ha'ex la awihquitayonic, la awac' abahic ta a'batinel yu'un yantic diosetic; ha yu'un ma ba ya jcoltayexix xan.

¹⁴Bahan awonanic ta stojol te diosetic atsahojic; ha ac'a scoltayex te c'alal ay awocolic, xchi.

¹⁵Te snich'nab Israel hich la sjac'beyic sc'op te Jehová: Jtahoj jmulcotic; pasa ta jtojolcotic te bin ya sc'an awo'tan. Pero awocoluc, coltayawotcotic yo'tic, xchihic.

¹⁶Hich la sloq'uesic te yantic diosetic, la yac' sbahic ta a'batinel yu'un te Jehová. C'ux la ya'iy te Jehová te ay swocol te Israel.

¹⁷Te amonetic la stsob sbahic soc la spas scampamentohic ta sq'uinal Galaad. Ha nix hich la stsob sbahic te snich'nab Israel soc la spas scampamentohic ta Mizpa.

¹⁸Te príncipaletic soc te winiquetic yu'un Galaad talel c'axel hich la yalbe sbahic: ¿Mach'a a te ya xhahch ya'be guerra te amonetique? Te mach'a hich ya spas, ha j'ic'aw ta guerra ya xc'oht yu'un spisil mach'atic nahinemic ta Galaad, xchihic.