Read Tzeltal Jueces 11 Bible Online

Jueces 11 - Tzeltal bible

Jueces 11

¹Te Jefté te talem ta Galaad, ha tulan winic soc ay yip yo'tan. Ha yal jtuhl j'antsinel-ants soc ha stat te Galaad sbihil.

²Te yihnam Galaad la yalataybe snich'nab; te c'alal muc'ubic a, la stenic loq'uel te Jefté, hich la yalbeyic: Mayuc bin yac awich'be ta sna te jtatic, como yalat yan ants, xchihic.

³Ha yu'un te Jefté loc' ta ahnel ta stojol te yermanotac, baht ta nahinel ta sq'uinal Tob, te banti la stsob chopol winiquetic te loq'uic bahel soque.

⁴Ta patil bahel, te amonetic la ya'beyic guerra te Israel.

⁵Te c'alal hich c'oht ta pasel, te mamaletic ta Galaad la sticonic ta iq'uel tal te Jefté ta sq'uinal Tob,

⁶hich la yalbeyic: La', ha'at jtsobawat cu'uncotic ya xc'ohat ta ya'beyel guerra te amonetic, xchihic.

⁷Te Jefté hich la sjac'be sc'opic te mamaletic yu'un Galaad: ¿Ma bal lajuc awil-o'tantayonic soc la atenonic loq'uel ta sna te jtate? ¿Bin yu'un tal alehoniquix te c'alal ay awocolic? xchi.

⁸Te mamaletic yu'un Galaad la sjac'be sc'op te Jefté: Ha nix scuentahil te talotcotiquix ta atojol yu'un ya xtal ajoquinotcotic ta ya'beyel guerra te amonetic soc te ya x'ochat ta jtsobaw cu'uncotic ta jpisilcotic te ayotcotic ta Galaad, xchihic.

⁹Te Jefté la yalbe te mamaletic yu'un Galaad: Teme yac ac'anic te ya suhton tal ta ya'beyel guerra te snich'nab Amón, teme ya ya'bon ca'iy tsalaw te Jehová, ¿ho'on bal jtsobawon ya xc'ohon awu'unic? xchi.

¹⁰Te mamaletic ta Galaad la yalbeyic te Jefté: Ha testigo cu'untic te Jehová te ya jpascotic te bin yac awale, xchihic.

¹¹Ha yu'un te Jefté baht soc te mamaletic yu'un Galaad, te pueblo la yotsesic ta jtsobaw soc jcuentahinwanej yu'unic. Te Jefté la yal ta stojol Jehová ta Mizpa spisil te bintic la yalixe.

¹²Soc la sticon bahel winiquetic ta stojol te ajwalil yu'un te amonetic, hich la yalbe: ¿Bin awochelon a te ya xtal awa'be guerra te jlumale? xchi.

¹³Te ajwalil yu'un te amonetic hich la sjac'be sc'op te winiquetic ticombilic tal yu'un te Jefté: Como te c'alal loc' tal ta Egipto te Israel la spojbon te jq'uinal c'alal ta uc'um Arnón ha to ta uc'um Jaboc, soc c'alal ta muc'ul-ha' Jordán. Ha yu'un suhtbon me ta lec nax, xchi.

¹⁴Te Jefté la sticon bahel yantic winiquetic ta stojol te ajwalil yu'un te amonetic,

¹⁵hich la yalbe bahel: Hich ya yal te Jefté: Te Israel ma ba la yich'be te sq'uinal Moab o te sq'uinal Amón.

¹⁶Como te c'alal loc' tal ta Egipto te Israel behenic ta jochol taquin q'uinal c'alal ta Mar Rojo, c'ohtic ta Cades.

¹⁷Hich te Israel la sticonic bahel winiquetic ta stojol te ajwalil yu'un Edom, hich la yalbeyic: Awocoluc ac'awotcotic c'axel ta aq'uinal, xchihic. Pero te ajwalil yu'un Edom ma ba la sch'uhun. Ha nix hich la sticon bahel winiquetic ta stojol te ajwalil yu'un Moab, te ha nix hich ma ba la sc'an. Ha yu'un hil ta Cades te Israel.

¹⁸Patil te Israel behenic ta jochol taquin q'uinal, la sjoybetayic te sq'uinal Edom soc te sq'uinal Moab, c'axic tal ta stojol banti ya xloc' tal c'ahc'al yu'un te sq'uinal Moab, la spasic campamento ta jehch te uc'um Arnón. Pero ma ba och bahel ta sq'uinal Moab, como ha smojon Moab te uc'um Arnón.

¹⁹Ha nix hich te Israel la sticonic bahel winiquetic ta stojol Sehón ajwalil yu'un te amorreohetic, te ay ta Hesbón, hich la yalbeyic: Awocoluc ac'awotcotic c'axel bahel ta aq'uinal c'alal ta jq'uinalcotic, xchi.

²⁰Pero te Sehón ma ba lec la ya'iy te ya yac' c'axel ta sq'uinal te Israel. La nax stsob spisil te winiquetic yu'un, baht spas campamento ta Jahaza soc la ya'be guerra te Israel.

²¹Pero te Jehová te Dios yu'un Israel la yac' ta sc'ab Israel te Sehón soc spisil te pueblo yu'une, hich la stsalic. Hich te Israel la yu'untayic spisil sq'uinal te amorreohetic te tey nahinemic a.

²²Soc la yich'beyic spisil sq'uinal te amorreohetic c'alal ta Arnón ha to ta Jaboc, soc c'alal ta jochol taquin q'uinal ha to ta Jordán.

²³Ha yu'un ¿ya bal awich'botcotic te bin pojbot te amorreohetic yu'un Jehová te Dios yu'un Israel te la ya'be te Israel te pueblo yu'une?

²⁴Te bin ya ya'bat awu'untay te Quemos te dios awu'un ¿ma bal yac awu'untay? Ha nix hich spisil te bin ya ya'botcotic Jehová te Dios cu'uncotic ya me cu'untaycotic.

²⁵¿C'ax bal hich yac acuy aba a te bin ut'il Balac snich'an Zipor, te ajwalil yu'un Moab? ¿La bal scontrahin Israel o la bal ya'be guerra?

²⁶Ayix ho'lajunwinic (300) ha'bil te nahinem Israel ta Hesbón soc te tut pueblohetic yu'un, ta Aroer soc te tut pueblohetic yu'un, soc spisil te pueblohetic ta sti'il uc'um Arnón, ¿bin yu'un ma ba la awich'ic xan ta hich ora?

²⁷Ha yu'un mayuc jmul ta atojol, pero te ha'ate chopol bin yac apas yu'un te yac awa'bon guerra. Te Jehová, te ha juez stuquel, ac'a schahpan yo'tic te snich'nab Israel soc te snich'nab Amón, xchi te Jefté.

²⁸Pero te ajwalil yu'un te snich'nab Amón ma ba la yich'be ta cuenta te c'op la sticon tal te Jefté.

²⁹Hich te Jefté u'untayot yu'un te espíritu yu'un Jehová, hich c'ax bahel ta Galaad soc ta Manasés, soc c'ax xan bahel ta Mizpa te ay ta Galaad, baht ta stojol te amonetique.

³⁰Te Jefté hich jc'axel la yal ta jamal ta stojol Jehová: Teme yac awa'bon ta jc'ab te amonetic,

³¹mach'ayuc[20] a te ya xloc' tal stahon ta sti'il jna te c'alal ya suhton tal ta tsalel te amonetic, yu'un Jehová ya xc'oht, ha ya ca'be scuenta scohtol chic'bil mahtanil, xchi.

³²Hich te Jefté baht ya'be guerra te amonetic; te Jehová la yac'ticlambe ta sc'ab.

³³La stsal jtahb pueblohetic c'alal Aroer ha to ta Minit, soc jc'axel la slajinlan c'alal Abel-queramim. Hich tsalotic te amonetic yu'un te snich'nab Israel.

³⁴C'alal suht bahel ta sna ta Mizpa te Jefté, te yantsil-nich'an loc' tal ta tahel yu'un, yac ta ahc'ot loq'uel tal ta stijel panderohetic. Mero jip jtuhl a te yantsil-nich'an, mayuc yan squerem o yantsil-nich'an.

³⁵C'alal hich la yil, la sch'i' sc'u' yu'un, soc hich la yal: ¡Ay, cantsil-nich'an, ta mero melel la awa'bon jwocol! Ha'at nix ta acuenta te ay bin c'ux ya ca'iy, yu'un ay bin la jcal ta jamal ta stojol Jehová, ma xhu' ya jsut te jc'ope, xchi.

³⁶La yal te ach'ix: Jtat, teme ay bin awaloj ta jamal ta stojol Jehová, pasbon te bin awaloj, te bin ut'il Jehová la ya'bat atsal acontra, ha te amonetic, xchi.

³⁷La yalbe xan te state: Pero a'bon jpas ini: ac'awon te ya xbehenon chebuc u ta witsiltic soc te jmohloltac ta ach'ixil yu'un ya coq'uetay te cach'ixlel, xchi.

³⁸Bahan, xchi te Jefté. Hich la yac' te ya xbaht cheb u. Hich la sjoquin bahel te smohloltac ta ach'ixil ta witsiltic ta yoq'uetayel te yach'ixlele.

³⁹C'alal ts'acay te cheb u, suht tal ta stojol te state. Ha la spas te bin jc'axel yaloj ta jamal te ya spase. Mayuc bin ora tahot ta winic te ach'ixe.

⁴⁰Ha yu'un ha costumbre c'oht ta Israel te chaneb c'ahc'al ta jujun ha'bil ya xbahtic te ach'ixetic ta yoq'uetayel te yantsil-nich'an Jefté, te galaad-ach'ixe.