Read Tzeltal Jueces 13 Bible Online

Jueces 13 - Tzeltal bible

Jueces 13

¹Te snich'nab Israel la scha'pasic xan te bin chopol ta stojol Jehová, hich te Jehová la yac'ticlan ta sc'ab te filisteohetic cha'winic (40) ha'bil.

²Ta Zora, ta jchahp yu'un Dan, ay jtuhl winic Manoa sbihil. Jma'al te yihnam, mayuc ayinem yal.

³Chicnaj ch'ul a'bat yu'un Jehová ta stojol te ants, hich la yalbe: Te ha'ate, jma'alat, mayuc ayinem awal; pero ya me xhahch awal, ya me x'ayin aquerem-al.

⁴Ha yu'un ma me xawuch'ix vino o bin pajuben, soc ma xawe' te bin bohloben sc'oblal,

⁵yu'un ya me xhahch awal, ya x'ayin aquerem-al. Ma xhu' ta loq'uesbeyel stsotsel sjol, como te querem ha nazareo ta stojol Dios ya xc'oht c'alal ta yayinab to; ya me xhahch ta scoltayel loq'uel ta sc'ab filisteohetic te Israel, xchi.

⁶Te ants hich baht yalbe te smamalal: Ay jtuhl winic yu'un Dios te tal ta jtojol, hich yilel te bin ut'il ch'ul a'bat yu'un Dios, mero xiweltic sba. Ma ba la joc'obe ban talem, soc ma ba la yalbon te sbihile.

⁷Pero la yalbon: Ilawil, ya me xhahch awal soc ya me x'ayin aquerem-al, ha yu'un ma me xawuch'ix vino o bin pajuben, soc ma xawe' te bin bohloben sc'oblal, como te alal ha nazareo ta stojol Dios ya xc'oht c'alal ta yayinab to ha to c'alal ya xcham, xchi.

⁸Ha yu'un te Manoa la sc'opon te Jehová, hich la yalbe: Ay, Cajwal, te winic te la aticon tal, awocoluc ac'a taluc yan buelta ta jtojolcotic soc ac'a yac' jna'cotic bin ya sc'an ya jpascotic soc te alal te ya x'ayine, xchi.

⁹Dios la ya'iybe sc'op te Manoa. Te ch'ul a'bat yu'un Dios tal ta stojol te ants yan buelta te c'alal ay ta aquiltic a; pero te Manoa te smamalal ma ba tey ay a.

¹⁰Te ants ahnimal baht yalbe te smamalal: ¡Ilawil, chicnajix te winic te tal ta jtojol ta yan c'ahc'al! xchi.

¹¹Hich hahch te Manoa, baht soc te banti ay te winique, hich c'oht sjoc'obe: ¿Ha'at bal te winicat te c'opojat soc te quihnam? xchi. Ho'on, xchi.

¹²Ha yu'un te Manoa la sjoc'obe: Te c'alal ya xc'oht ta pasel te bin la awal, ¿bin yilel scuxlejal ya xc'oht te querem, soc bin ya sc'an ya jpasbecotic? xchi.

¹³Te ch'ul a'bat yu'un Jehová hich la sjac'be sc'op Manoa: Te ants ya me spas spisil te bintic la jcalbe:

¹⁴Ma me swe' te bintic ya xloc' ta ts'usub, ma me xyuch' vino o yantic bin pajuben, soc ma me swe' te bin bohloben sc'oblale. Ya me stsahtay ta pasel spisil te bin la jpas ta mandar, xchi.

¹⁵Ha yu'un te Manoa la yalbe te ch'ul a'bat yu'un Jehová: Awocoluc, ma to xbahat, ya jchahpambatcotic jcohtuc tensun, xchi.

¹⁶Te ch'ul a'bat yu'un Jehová la sjac'be sc'op te Manoa: Aunque ma xawac'on bahel, ma ba ya jwe'bat te awe'ele; pero teme yac ac'an yac achahpan scohtol chic'bil mahtanil, a'beya te Jehová, xchi. (Te Manoa ma ba la sna' te ha te ch'ul a'bat yu'un Jehová te winique.)

¹⁷Ha yu'un te Manoa hich la sjoc'obe te ch'ul a'bat yu'un Jehová: ¿Bin abihil, scuenta yu'un ya quich'at ta muc' a te c'alal ya xc'oht ta pasel te bin la awale? xchi.

¹⁸La sjac' te ch'ul a'bat: ¿Bin yu'un yac ajoc'obon jbihil, te ha bihilil te c'ax t'ujbil? xchi.

¹⁹Te Manoa la stsac tut tentsun soc mahtanil harina, la ya'be smahtanin Jehová ta sba ton. Ha yu'un te ch'ul a'bat[22] la spas jchahp a'telil ta stojol Manoa soc te yihname.

²⁰Te c'alal tihl mohel c'ahc' ta stojol ch'ulchan ta scajtajib ta chiq'uel mahtanil, te Manoa soc te yihnam la yilic te mo bahel te ch'ul a'bat yu'un Jehová ta sc'ahc'al te scajtajib ta chiq'uel mahtanil; hich la spahcan sbahic ta lum.

²¹Mayuquix bin ora chicnaj xan ta stojol Manoa soc ta stojol te yihname. Hich la sna' te Manoa te ha te ch'ul a'bat yu'un Jehová.

²²Te Manoa hich la yalbe te yihnam: Ya me xchamotic, yu'un la jquiltiquix te Diose, xchi.

²³La sjac' te ants yu'une: Te yu'unuc la sc'an la smilotic te Jehová ma ba la stsacbotic te scohtol chic'bil mahtanil soc te mahtanil harina cu'untic, soc ma ba la ya'botic quiltic spisil ini soc ma ba hich la yalbotic te hichuque, xchi.

²⁴Te antse ayin squerem-al, Sansón sbihil la ya'be. Muc'ub te querem soc a'bot bendición yu'un Jehová.

²⁵Te espíritu yu'un Jehová hahch ta ya'beyel yip te Sansón ta campamentohetic yu'un Dan, ta ohlil yu'un Zora soc Estaol.