Read Tzeltal Jueces 14 Bible Online

Jueces 14 - Tzeltal bible

Jueces 14

¹Co bahel te Sansón ta Timnat, tey la yil jtuhl filistea ach'ix.

²Te c'alal suht ta sna hich la yalbe ya'iy te sme'stat: La jquil jtuhl filistea ach'ix ta Timnat; awocoluc, c'ambon yu'un ya quic', xchi.

³Pero halbot yu'un te sme'state: ¿Yu'un bal mayuc ach'ix yu'un awermanotac o ta spisil te jlumaltic, te ya xbaht awic' awihnamin yantsilel te filisteohetic te ma ba yich'ojic circuncisión? xchi. Te Sansón la sjac'be sc'op te stat: C'ambon te ach'ix, yu'un ya jmulan, xchi.

⁴Te sme'stat ma ba la sna'ic te ha chahpambil yu'un Jehová, yu'un yac ta slehel bin ut'il ya scontrahin te filisteohetic; como ha yorahil a te cuentahimbilic yu'un te filisteohetic te Israel.

⁵Te Sansón baht soc sme'stat ta Timnat. C'alal c'ohtic ta ts'usubiletic yu'un Timnat, yac huhonel jcoht jcolel choj te wihl tal ta stojol.

⁶Ha yu'un te espíritu yu'un Jehová hul soc yu'el ta stojol te Sansón, hich ta sc'ab nax la sjecticlan te choj, hich te bin ut'il ya yich' jecticlanel tut tentsun. Pero ma ba la yalbe te sme'stat te bin la spase.

⁷Patil baht sc'opon te ach'ix; bayel la smulan.

⁸C'alal c'axix c'ahc'al a, suht tal yu'un ya yic' te ach'ixe. Loc' bahel ta be yu'un baht yilbe te schamen baq'uetal te choje. La yil te ay jtsohb schanul chab soc ay chab ta yutil te schamen baq'uetal te choje.

⁹La sjots' loq'uel ta sc'ab te chab, yac ta slo'el bahel ta be. C'alal la sta te sme'stat, ha nix la ya'be slo'ic te chab; pero ma ba la yalbe te loq'uem tal ta schamen baq'uetal te choje.

¹⁰Te stat Sansón baht ta banti ay te ach'ixe. Te Sansón la spas q'uin tey a, yu'un hich ya spasic te queremetique.

¹¹Pero te filisteohetic, c'alal la yilic, la yiq'uic tal lajuneb scha'winic (30) ta tuhl winiquetic te ya sjoquin sbahic soc.

¹²Te Samsón hich la yalbe: Ay chuhcul c'op ya calbeyex; teme ta huqueb c'ahc'al yu'un te q'uin ya xhu' yac awalbonic te suhtibe, ya ca'beyex lajuneb scha'winic (30) c'u'uletic pasbilic ta lino soc lajuneb scha'winic (30) c'u'uletic yu'un q'uin.

¹³Yan teme ma xhu' yac awalbonic, ha'ex yac awa'bonic te lajuneb scha'winic (30) c'u'uletic pasbilic ta lino soc te c'u'uletic yu'un q'uin, xchi. Hich la sjaq'uic: Hala ca'iycotic te chuhcul c'ope, xchihic.

¹⁴Hich la yalbe: Ta jti'awan loc' we'elil tey a, ta bin ay yip loc' te bin chi', xchi. Ta yoxebal c'ahc'al ma ba hu' yu'unic sna'el te suhtibe.

¹⁵Ta shuquebal c'ahc'al[23] la yalbeyic te yihnam Sansón: Suja ta yalel te amamalal te ac'a yalbotic te suhtib te chuhcul c'ope, teme ma'uque, ya jchic'atcotic soc te mach'atic ay yu'un te atate. ¿Yu'un bal la awic'otcotic tal yu'un yac apojbotcotic te bin ay cu'uncotic? xchihic.

¹⁶Hich te ants oc' ta stojol Sansón, hich la yalbe: Yac awil-o'tantayon, ma ba c'uxon ta awo'tan. Ma ba yac awalbon te suhtib te chucul c'op la awalbe te jlumale, xchi. La sjac' te Samsón: Ma ba calbeyej te jme'jtat bin scuentahil, ¿ha'at to bal c'an calbat bin scuentahil? xchi.

¹⁷Te ants oc' ta stojol te huqueb c'ahc'al ay q'uin yu'unic. Pero ta shuquebal c'ahc'al te Sansón la yalbe bin scuentahil, como bayel wulilanot yu'un. Hich te ants baht yalbe te slumale.

¹⁸Ta shuquebal c'ahc'al, c'alal ma to xmahl c'ahc'al a, te mach'atic yu'un te pueblo la yalbeyic te Sansón: ¿Bin xan c'ax chi' a te bin ut'il te chabe? soc ¿bin xan c'ax ay yip a te bin ut'il te choje? xchihic. Hich la sjac' te Sansón: Te manchuc la ajoq'uic lum soc te tut wacax cu'un, ma ba hu' awu'unic sna'beyel scuentahil te chucul c'op cu'un te hichuque, xchi.

¹⁹Te espíritu yu'un Jehová hul soc yu'el ta stojol Sansón, hich co bahel ta Ascalón, la smil lajuneb scha'winic (30) ta tuhl winiquetic tey a. La yich'be bahel sc'u'ic, ha baht stoj a te mach'atic la sna'beyic scuentahil te chucul c'ope; ilinem a suht bahel ta sna te state.

²⁰Pero te yihnam Sansón ha a'bot yic' bahel te mach'a la sjoquin te Sansón ta q'uin.