Read Tzeltal Jueces 15 Bible Online

Jueces 15 - Tzeltal bible

Jueces 15

¹Ta patil bahel, ta yorahil te ya xloc' trigo, te Sansón baht yil te yihnam, soc la yic'be bahel tut tentsun, hich la yal: Ya x'ochon bahel ta yilel te quihnam ta stsalul sna, xchi. Pero ma ba ac'ot ochel yu'un stat te antse.

²Hich la yalbe te Sansón: La jcuy te jc'axel ma xac'anix, ha yu'un la jca'be yic' te mach'a la sjoquinat. Pero ¿ma bal ha'uc c'ax t'ujbil xan a te yihts'ine? Ic'a, ha sjelol ya xc'oht te swixe, xchi.

³Ha yu'un hich la sjac' te Sansón: Ma jmuluc ya xc'oht te bin ma lecuc ya jpasbe ta ora ini te filisteohetic, xchi.

⁴Hich baht te Sansón, la stsac ho'lajunwinic (300) ta coht waxetic, la syomticlambe ta chuquel ta jujun sne soc la schucbe c'ahc' ta yohlil te chebcheb sne.

⁵La stsunticlambe sc'ahc'al, la scoltay bahel te waxetic ta banti te yawil-ts'unubilic te filisteohetique. Hich c'ahc' te trigo te busajtic ta bojel soc te tec'ajtic to, soc nix te ts'usubiletic soc olivohetic.

⁶Te filisteohetic la sjoc'oyic: ¿Mach'a la spas ini? xchihic. Ha te Sansón te snihal te timnat-winic, yu'un pojbot yihnam, ha a'bot yic' te mach'a sjoquinej te Sansón, xchihic. Ha yu'un te filisteohetic tal schiq'uic te ants soc te state.

⁷Hich la yal yu'un te Sansón: Te bin ut'il hich la apasic, ya cal ta jamal te ma ba ya jquehchan ha to teme la sutbeyex spacol, xchi.

⁸Hich la stsac sba soc te filisteohetic, bayel la smilticlan. Patil co bahel ta nahinel ta ch'en ta ch'entiquil ta Etam.

⁹Te filisteohetic tal spas scampamentohic ta sq'uinal Judá ha to c'alal ta Lehi.

¹⁰Te winiquetic yu'un Judá la sjoc'obeyic: ¿Bin yu'un tal acontrahinotcotic? xchihic. Ha talotcotic ta schuquel te Sansón, yu'un hich ya jpasbecotic te bin ut'il la spasbotcotic, xchihic.

¹¹C'alal hich la ya'iyic, talic j'ohlil swaxacbahc' (3,000) ta tuhl winiquetic yu'un Judá ta ch'en yu'un te ch'entiquil ta Etam, hich la yalbeyic te Sansón: ¿Yu'un bal ma xana' te ha ajwalil cu'untic te filisteohetique? ¿Bin yu'un hich la apasbotcotic? la yutic. Te Sansón la sjac': La jca'be spacol te bin la spasbonic, xchi.

¹²Ha yu'un la yalbeyic: Te ho'otcotic tal jchucatcotic bahel yu'un ya cac'atcotic ta sc'ab te filisteohetic, xchihic. Te Sansón la yal: Halbonic ta jamal te ma ba yac amilonic, xchi.

¹³Ma ba ya jmilatcotic, ha nax ya jchucatcotic bahel soc ya cac'atcotic ta sc'abic, xchihic. Hich la schuquic bahel ta cha'lihc yach'il lazo soc la sloq'uesic tal ta ch'en.

¹⁴C'alal c'ohtic ta Lehi, te filisteohetic yacalic ta aw a loq'uic tal stahic. Pero te espíritu yu'un Jehová hul soc yu'el ta stojol Sansón. Te lazohetic te chucajtic sc'ab a, hich c'oht te bin ut'il lino te c'ahq'uem, hich ch'ay cohel te bin chucul a te sc'abe.

¹⁵La yil yach'il sbaquel yahlan-e burro, la stsac soc la smil j'ohlil yoxbahc' (1,000) ta tuhl winiquetic a.

¹⁶Ha yu'un hich la yal te Sansón: Ta sbaquel yahlan-e burro, bayel busajtic; ta sbaquel yahlan-e burro la jmil j'ohlil yoxbahc' (1,000) ta tuhl winiquetic, xchi.

¹⁷C'alal laj yo'tan ta c'op, la sch'oj bahel te bac, la ya'be sbihilin te lugar Ramat-Lehi.[24]

¹⁸Te bin ut'il mero bayel taquij yo'tan te Sansón, hich la yawtay te Jehová: Ha'at la awaq'uix te muc'ul coltayel ini ta scuenta te a'bat awu'un, ¿bin ut'il ay a te yac awac' te ya xchamon ta taquinti'il soc te ya x'ochon ta sc'ab mach'atic ma ba yich'ojic circuncisión? xchi.

¹⁹Ha yu'un Dios la sjambe ta banti lomol lum tey ta Lehi, hich loc' ha' tey a; la yuch' te ha'e, hich la yich' xan yip soc la sta xan yutsil yo'tan a. Ha scuentahil te la ya'be sbihilin En-hacore[25] te lugar te ay ta Lehi c'alal ora.

²⁰Te Sansón jtahb ha'bil ay ta juez yu'un Israel, ha te yorahil ay yipic a te filisteohetique.