Read Tzeltal Jueces 17 Bible Online

Jueces 17 - Tzeltal bible

Jueces 17

¹Ay jtuhl winic ta witsiltic yu'un Efraín, Micaía sbihil.

²Hich la yalbe te snane: Te ho'lajunwinic yoxbahc' (1,100) ta sehp plata te la awich' elc'ambeyel, te la awalbe chopol c'oblalil yu'un, soc te la awalbon sc'oblale, ilawil, ho'on quich'oj, ho'on la jquelc'ambat, xchi. Hich la yal te snane: ¡Cal, ac'a ya'bat bendición te Jehová! xchi.

³Te c'alal la suhtbe te ho'lajunwinic yoxbahc' (1,100) ta sehp plata, hich la yal te snane: Ta scuenta te cal, jc'axel ca'beyejix Jehová te taq'uin scuenta spasel jun loc'omba pasbil ta c'abal soc yan pasbil ta uhltesbil taq'uin. Ya jsutbat te taq'uine, xchi.

⁴Hich te Micaía la suhtbe te taq'uin te snane, te ha la yich' bahel lajunwinic (200) ta sehp plata, baht ya'be te j'ultesej-taq'uin te la spas ta loc'omba pasbil ta c'abal soc ta uhltesbil taq'uin. La yich'ic aq'uel ta sna te Micaía.

⁵Hich te Micaía ay sna banti ya sch'uhuntay te diosetic yu'une. La spas jun efod soc loc'ombahetic yu'un na, soc la yotses ta sacerdote jtuhl snich'an.

⁶Ta hich ora mayuc ajwalil ta Israel, jujutuhl ya spasic te bin ya sc'an yo'tanic.

⁷Ay jtuhl jcolel levita-winic ta Belén ta Judá te nahinem ta sq'uinal Judá.

⁸Ha loc' bahel ta Belén ta sq'uinal Judá ta slehel banti ya xhu' ya xnahin. Behen bahel, c'oht ta witsiltic yu'un Efraín ta sna te Micaía.

⁹¿Ban talemat? xchi te Micaía. La sjac' te levita-winic: Talemon ta Belén ta sq'uinal Judá. Ya xnahinon te banti ya xhu' ya jta jun lugar, xchi.

¹⁰Hilan ta jna, xchi te Micaía. Ha me tatil soc sacerdote ya xc'ohat cu'un; ya jtojat lajuneb (10) ta sehp plata ta jujun ha'bil, soc ya ca'bat ac'u' apac' soc awe'el awuch'el, xchi.

¹¹Mero tse'el yo'tan te levita te ya sjoquin ta nahinel te winique, hich c'oht te bin ut'il mero snich'an.

¹²Te Micaía la ya'be yich' ya'tel te levita-winic; ha sacerdote c'oht yu'un soc hil ta nahinel ta sna te Micaía.

¹³Hich la yal te Micaía: Yo'tic ya jna' te Jehová ya me yac' te lec ya xc'ohon, yu'un ay jtuhl levita te ay ta sacerdotehil cu'un, xchi.