Read Tzeltal Jueces 19 Bible Online

Jueces 19 - Tzeltal bible

Jueces 19

¹Ta yorahil te mayuc ajwalil ta Israel a, ay jtuhl levita-winic te nahinem hich te bin ut'il jbehyom ta lugar te namal ay ta witsiltic yu'un Efraín. Yic'oj jtuhl ants talem ta Belén ta sq'uinal Judá.

²Te ants yu'un la yac' sba ta antsinel,[26] la yihquitay te winique, baht ta sna stat ta Belén ta sq'uinal Judá; tey halaj chaneb u a.

³Hahch bahel te smamalal, yu'un ya yutsil-c'optay soc ya yic' suhtel tal. Yic'oj bahel jtuhl ya'bat soc cheb burrohetic. Te ants la yic' ochel ta sna te state.

⁴Te snihal-mamal te winic, ha te stat te ants, la yalbe te yacuc xhil, hich halaj ta sna oxeb c'ahc'al, we', uch' soc way tey a.

⁵Ta schanebal c'ahc'al, c'alal hahchic ta sab, ha nix hich hahch te levita-winic yu'un ya xloc' bahel; pero te stat te ach'ix la yalbe te snihale: We'an bahel jtebuc pan, patil ya xbahex, xchi.

⁶Ta schebalic pajal la shuhcan sbahic ta we'el uch'el. Te stat te ach'ix la sc'ambe te winic: Awocoluc, c'axuc xan ahc'abal awu'un li'i, ayuc yutsil awo'tan, xchi.

⁷Hahch te winic yu'un ya xbahtix, pero comot xan yu'un te snihal-mamal, hich c'ax ahc'abal yu'un tey a.

⁸Ta yo'ebal c'ahc'al sab hahch scuenta yu'un ya xbahtix, pero halbot yu'un te stat te ach'ix: We'an, ma to xbahat ha to ta xtibiltay bahel, xchi. Hich we'ic schebalic.

⁹Patil te winic la stehc'an sba yu'un ya xbaht soc te ants yu'un soc te ya'bate. Ha yu'un te snihal-mamal, te stat te ach'ix, hich la yalbe: Tibilix, ya x'ihc'ubix q'uinal, awocoluc, c'axuc ahc'abal awu'un li'i. Te bin ut'il mahlix c'ahc'al, wayan li'i scuenta yu'un ayuc yutsil awo'tan a. Sab pajel ya xhahchex, hich ya xbahex ta ana, xchi.

¹⁰Pero te winic ma ba la sc'anix te ya xc'ax ahc'abal yu'un tey a; hich loc' bahel, c'oht ta nopol Jebús, ha te Jerusalén, soc schebal sburro te ay smonturahic soc te ants yu'une.

¹¹C'alal nopol c'ohtic ta Jebús, mero tibilix a; te a'bat hich la yalbe te yajwal: Conic, ya xbohotic tey ta pueblo yu'un te jebuseohetic, yu'un tey ya xc'ax ahc'abal cu'untic a, xchi.

¹²Hich la sjac' te yajwal: Ma ba ya xbohotic ta pueblo yu'un jyanlumetic, te ma ha'uc yu'un te snich'nab Israel. Behenucotic xan bahel c'alal ta Gabaa, xchi.

¹³Soc la yal xan: Conic, behenucotic xan bahel ta junuc lugar tey a, scuenta yu'un ya xc'ax ahc'abal cu'untic ta Gabaa o ta Ramá, xchi.

¹⁴Hich c'axic xan bahel. Mero tibilix a c'ohtic ta Gabaa, ha pueblo yu'un Benjamín.

¹⁵Ha yu'un la yihquitayic hilel te be, ochic bahel ta Gabaa scuenta yu'un tey ya xc'ax ahc'abal yu'unic a. La shuhcan sbahic ta plaza yu'un te pueblo, yu'un mayuc mach'a ic'otic ochel ta na yu'un ya xc'ax ahc'abal yu'unic tey a.

¹⁶Pero ahc'abalix a c'ax tal jtuhl mamal te yac ta suhtel tal ta ya'tel ta q'uinal. Te mamal talem ta witsiltic yu'un Efraín, jyanlum te ay ta nahinel ta Gabaa; te mach'atic nahinemic tey a ha snich'nab Benjamín.

¹⁷Te mamal, c'alal la yil te jbehyom ta plaza yu'un te pueblo, la sjoc'obe: ¿Banti ya xbahat soc ban talemat? xchi.

¹⁸Te levita-winic la sjac': Talemotcotic ta Belén ta sq'uinal Judá, ya xbohotcotic ta lugar te namal ay ta witsiltic yu'un Efraín te banti talemon. C'ohon tal ta Belén ta sq'uinal Judá, pero yo'tic ya xbohonix ta sna Jehová,[27] mayuc mach'a ya yic'on ochel ta sna.

¹⁹Quich'ojcotic ac soc we'elil yu'un te jburrocotic; soc quich'ojcotic we'elil soc vino cu'un soc yu'un te criada awu'un soc te a'bat sjoquinej te a'bat awu'une; mayuc falta ya ca'iycotic, xchi.

²⁰Ha yu'un la yal te mamal: Lamaluc me awo'tan. Ho'on ya ca'bat spisil te bintic ya xtuhun awu'un, ha nax ma me xc'ax ahc'abal awu'un ta plaza, xchi.

²¹Hich la yic'ticlan bahel ta sna soc la ya'be swe'el te burrohetic yu'une; la spocbe yoquic, hahchic ta we'el uch'el.

²²Pero c'alal tse'el yo'tanic a, te winiquetic yu'un te pueblo te mero chopol yo'tanic la sjoytayic te na, tulan la stijic te ti'nahil soc hich la yalbeyic te mamal, te yajwal na: Loq'uesa tal te winic te ochem ta ana, scuenta yu'un ya joquin jbahcotic ta wayel soc, xchihic.

²³Loc' bahel te yajwal na, hich la yalbe: Ma'uc, quermanotac, awocoluc ma me xapasic te bin chopole. Te bin ut'il cula' te winic ini, ma me xapasbeyic te bin chopole.

²⁴Li' ay te cantsil-nich'an te mero ach'ix to soc te ants yu'un te winique, ya jloq'uesbeyex tal, ha xawuts'inic soc yac apasbeyic te bin ya sc'an awo'tanic, pero ma me xapasbeyic ha'i winic ini te bin c'ax chopole, la yut.

²⁵Pero ma ba la sc'an la ya'iybeyic sc'op. Ha yu'un te levita-winic la stsac te ants yu'une la sloq'ues bahel. Hich te winiquetic la stsaquic, la yuts'inic sjunal ahc'abal ha to c'alal sacub q'uinal, hich la yihquitayic hilel ta sacubel q'uinal.

²⁶C'alal nopol ya sacubix a te q'uinale, tal te ants, hul ta puch'el ta ti'nahil yu'un te sna te mamal te banti ay te smamalal, tey hil a ha to c'alal sacub te q'uinale.

²⁷C'alal hahch ta sab te smamalal, la sjam te ti'nahil yu'un te na, c'an loc'uc bahel, pero la yil te ants yu'un, puch'em ta ti'nahil, tey cajal sc'ab ta smarcohil te ti'nahil.

²⁸Hich la yal te levita-winic: Hahchan, conic, la yut. Pero ma ba la sjac' te antse. Ha yu'un te winic la scajan te ants ta sba te burro yu'un, baht ta sna.

²⁹C'alal c'oht ta sna, la stsac cuchillo, la sbojticlambe sbaq'uetal te antse, lahchayeb la sloq'ues a, la spucticlan bahel ta spahmal sq'uinal Israel.

³⁰Spisil te mach'atic la yilic, hich la yalic: Mayuc hich pasbil soc ilbil c'alal ta yorahil te loq'uic tal ta Egipto te snich'nab Israel ha to ta ora ini. Nopa awa'iyic, c'opojanic me, xchihic.