Read Tzeltal Jueces 20 Bible Online

Jueces 20 - Tzeltal bible

Jueces 20

¹Ha yu'un loq'uic bahel spisil te snich'nab Israel, c'alal ta Dan ha to ta Beerseba soc ta sq'uinal Galaad, la stsob sbahic hich te bin ut'il jtuhl winic ta stojol Jehová ta Mizpa.

²Te jtsobawetic yu'un spisil te pueblo, ta jujuchahp sts'umbal Israel, tey ayic a ta tsoblej yu'un te pueblo yu'un Dios, lajuneb yoxwinic ta pic (400,000) ta tuhl winiquetic te chapalic ta espada.

³Te snich'nab Benjamín la ya'iyic te mohemiquix bahel ta Mizpa te snich'nab Israel. Te levita-winic hich joc'obot yu'un te snich'nab Israel: Halbotcotic ca'iycotic bin ut'il c'oht ta pasel te bin chopol ini, xchihic.

⁴Ha yu'un te levita-winic, te smamalal te ants te laje, hich la yal: C'ohon soc te ants cu'un ta Gabaa ta sq'uinal Benjamín yu'un ya xc'ax ahc'abal cu'un tey a.

⁵Pero hahch scontrahinonic te mach'atic ay ta Gabaa, la sjoytayic te na banti c'ax ahc'abal cu'un yu'un ya c'an smilonic, soc la yuts'inic te ants cu'un ha to c'alal laj.

⁶Hich la jtsacbe sbaq'uetal, la jbojticlambe, la jpucticlambe bahel ta spahmal sq'uinal Israel, ta scaj te bin chopol soc te milaw la spasic ta Israel.

⁷Te bin ut'il ha'ex snich'nabex Israel, hala ca'iycotic bin a te snopojibal awu'unic, xchi.

⁸Spisil te pueblo, ta junax hich hahch yalic: Mayuc mach'a ya xbaht ta snahilpac', ni jtuhluc ma ba ya suht bahel ta sna.

⁹Hich me ya jpasbetic te Gabaa: ya jpastic seña ta na'el te mach'a ya xbaht ya'be guerra.

¹⁰Ya jloq'uestic lajuntuhl winiquetic ta ho'ho'winic (100) ta spisil ta chahpalchahp yu'un Israel, soc ho'winic (100) ta jujumil, soc jmil ta lajlajunmil, te ya yich'beyic bahel we'elil yu'un te winiquetic ya xbaht yaq'uic guerra, scuenta yu'un te c'alal ya xc'ohtic ta Gabaa ta sq'uinal Benjamín hich ya xhu' ya ya'beyic stoj spisil te bin chopol la spasic ta Israel, xchihic.

¹¹Ha yu'un la stsob sbahic hich te bin ut'il jtuhl winic spisil te winiquetic yu'un Israel ta scontrahinel te pueblo.

¹²Te chahpalchahp Israel la sticonlanic bahel winiquetic ta stojol spisil te jchahp yu'un Benjamín, hich la yalic: ¿Bin a te mulil te la yich' pasel ta awohlilic?

¹³A'botcotic ta jc'abcotic te chopol winiquetic te ayic ta Gabaa, scuenta yu'un ya jmilcotic, hich ya jloq'uestic a te bin chopol ay ta Israel, xchihic. Pero te mach'atic yu'un Benjamín ma ba la yich'ic ta cuenta te sc'op te yermanotac, ha te snich'nab Israel.

¹⁴Te winiquetic yu'un Benjamín la stsob sbahic ta Gabaa scuenta yu'un ya ya'beyic guerra te snich'nab Israel.

¹⁵Ta hich ora te snich'nab Benjamín la stsobic ta pueblohetic yu'un oxpic soc ho'bahc' (26,000) ta tuhl winiquetic te chapal ta espada, ma ahtaybiluc stuquel te ho'lajunwinic scha'bahc' (700) ta tuhl tsahbil winiquetic te ayic ta Gabaa.

¹⁶Ta yohlil spisilic ay ho'lajunwinic scha'bahc' (700) tsahbil q'uexam-c'ab winiquetic te ya xhu' ya sch'ojic ton ta jihmuch'il, ma xc'ax te ya ya'beyic jlihc tsotsel jolal.

¹⁷Soc la yich' tsobel lajuneb yoxwinic ta pic (400,000) ta tuhl winiquetic yu'un Israel te chapalic soc espada, spisilic winiquetic yu'un guerra; ma ahtaybiluc te Benjamín.

¹⁸Patil hahchic bahel te snich'nab Israel, mohic bahel ta Bet-el, hich baht sjoc'obeyic te Diose: ¿Mach'a nahil ya xmo bahel cu'uncotic ta ya'beyel guerra te snich'nab Benjamín? xchihic. La sjac' te Jehová: Ha nahil ya xbaht te Judá, xchi.

¹⁹Hich sab hahchic te snich'nab Israel, baht ya'beyic guerra te Gabaa.

²⁰Loq'uic bahel te snich'nab Israel ta ya'beyel guerra te Benjamín; te winiquetic yu'un Israel la schol sbahic ta yaq'uel guerra ta stojol Gabaa.

²¹Pero te snich'nab Benjamín loq'uic tal ta Gabaa soc la smilic cha'pic soc ho'lajunbahc' (22,000) ta tuhl winiquetic yu'un Israel ta hich ora.

²²Te winiquetic yu'un Israel la smuc'ubtesbe sba yo'tanic, suhtic bahel ta yaq'uel guerra tey nix te banti la schol sbahic ta shahchibal;

²³yu'un te snich'nab Israel mohemiquix bahel soc oq'uic ta stojol Jehová c'alal ta yihc'ubel q'uinal, soc la sjoc'obeyic te Jehová: ¿Ya bal suhtotcotic ta ya'beyel guerra te snich'nab Benjamín te quermanocotic? xchihic. La sjac' te Jehová: Bahan, a'beyahic guerra, xchi.

²⁴Ha yu'un te snich'nab Israel cha'bahtic xan ya'beyic guerra te snich'nab Benjamín ta schebal c'ahc'al.

²⁵Pero ta schebal c'ahc'al cha'loq'uic tal te snich'nab Benjamín ta Gabaa ta scontrahinel te snich'nab Israel, la smilic cha'pic soc ho'bahc' (18,000) xan snich'nab Israel, spisilic chapal ta espada.

²⁶Ha yu'un spisil te pueblo Israel bahtic ta Bet-el. Tey oq'uic soc huhcajic ta stojol Jehová, la scom swe'elic c'alal yihc'ubel q'uinal soc la ya'beyic Jehová scohtol chic'bil mahtaniletic soc mahtaniletic scuenta lamal q'uinal.

²⁷Te snich'nab Israel la sjoc'obeyic te Jehová (yu'un ha yorahil a te tey ay a te scaxahul te chapbil-c'op yu'un Dios,

²⁸soc te Finees snich'an Eleazar, te snich'an Aarón, tey yac ta a'tel a), hich la yalic: ¿Ya to bal suhtotcotic xan ta ya'beyel guerra te snich'nab Benjamín te quermanocotic, o ma'uquix? xchihic. La yal te Jehová: Mohanic bahel, yu'un pajel ya ca'beyex ta ac'abic, xchi.

²⁹Ha yu'un te Israel la yaq'uic winiquetic te la snac' sbahic ta sjoyobal te Gabaa.

³⁰Ta yoxebal c'ahc'al mohic bahel te snich'nab Israel ta scontrahinel te snich'nab Benjamín, la schol sbahic ta stojol Gabaa ta ya'beyel guerra, hich te bin ut'il ta nahil to.

³¹Loq'uic tal te snich'nab Benjamín ta yaq'uel guerra, namijic bahel ta pueblo, hahch yehchenteslanic te winiquetic yu'un Israel, hahch smilticlanic ta behbetic hich te bin ut'il ta yan buelta, ha te be ya xbaht ta Bet-el, soc yan te ya xbaht ta Gabaa. Ay wan lajuneb scha'winic (30) ta tuhl winiquetic yu'un Israel te milotic.

³²Hich yac yalbelic te snich'nab Benjamín: Tsalbiliquix cu'untic, hich te bin ut'il ta yan buelta, xchihic. Pero te snich'nab Israel yalojic: Ya x'ahnotic bahel, hich ya xloq'uic tal ta pueblo c'alal ta behbetic, xchihic.

³³Ha yu'un spisil te snich'nab Israel loq'uic tal te banti ayic, la schol sbahic ta guerra ta Baal-tamar. Ha nix hich loq'uic tal te snich'nab Israel te snac'oj sbahic ta aquiltic ta sjoyobal te Gabaa.

³⁴Ay jpic soc ho'bahc' (10,000) ta tuhl tsahbil winiquetic ta spisil Israel te tal ya'beyic guerra te Gabaa, hich tulanij te guerra yu'unic. Pero te snich'nab Benjamín ma ba la sna'ic te nopol ya xc'oht ta stojolic te lajinele.

³⁵Te Jehová la stsal te Benjamín ta stojol Israel. Ta hich ora te snich'nab Israel la smilic oxpic soc ho'lajunwinic yoxbahc' (25,100) winiquetic yu'un Benjamín te chapalic ta espada.

³⁶Hich te snich'nab Benjamín la yilic te tsalbiliquix. Como te snich'nab Israel ahniquix bahel ta stojol Benjamín, yu'un ha smuc'ul yo'tanic te winiquetic te snac'oj hilel sbahic ta spat Gabaa.

³⁷Te winiquetic te snac'oj sbahic ora nax baht slumtayic te Gabaa, ochic bahel soc la smilic ta espada spisil te pueblo.

³⁸Te bin seña schapojic te winiquetic yu'un Israel soc te mach'atic snac'oj sbahic, ha te ya yaq'uic mohel ch'ahil ta pueblo.

³⁹Te snich'nab Israel te c'alal yacalic ta ahnel bahel yilel, te snich'nab Benjamín hahch yehchentesic soc la smilic lajuneb scha'winic (30) ta tuhl winiquetic yu'un Israel, yu'un la yalic: Tsalbiliquix cu'untic hich te bin ut'il ta nahil to, xchihic.

⁴⁰Pero c'alal hahch ta mohel te ch'ahil ta pueblo, la suht sitic te snich'nab Benjamín, la yilic te sch'ahilel te pueblo te yac ta mohel ta ch'ulchan.

⁴¹Hich te winiquetic yu'un Israel suht ta spatic, te snich'nab Benjamín noj xiwel ta yo'tanic, yu'un la yilic te c'ohtix ta scuentahic te lajinel.

⁴²Ha yu'un suht ta spatic ta stojol Israel, ahnic bahel ta sbehlal te jochol taquin q'uinal, pero tahotic yu'un te guerra. Te winiquetic yu'un Israel te loq'uic tal ta pueblohetic la smaquic ta be soc la smilic.

⁴³Hich la sjoytayic te snich'nab Benjamín, la snutsic bahel soc la spech'ic ta teq'uel ta Menúha c'alal ta banti snuhp'usitayej sba soc Gabaa, ta stojol banti ya xloc' tal c'ahc'al.

⁴⁴Hich lajic cha'pic soc ho'bahc' (18,000) winiquetic yu'un Benjamín, spisilic ha winiquetic yu'un guerra.

⁴⁵Te yantique suht ta spatic, loq'uic bahel ta ahnel ta stojol te jochol taquin q'uinal, ta muc'ul ton yu'un Rimón; pero lajic ta milel j'ohlil yoxlajunbahc' (5,000) ta tuhl ta behbetic. La snutsic xan bahel c'alal ta Gidom, tey la smilic a ho'bahc' (2,000) winiquetic.

⁴⁶Ta spisil te snich'nab Benjamín te lajic ta hich ora, ha oxpic soc j'ohlil yoxbahc' (25,000) winiquetic te chapalic ta espada, spisilic ha winiquetic yu'un guerra.

⁴⁷Pero ay j'ohlil scha'bahc' (600) winiquetic te suht ta spatic soc ahnic bahel ta jochol taquin q'uinal, ta muc'ul ton yu'un Rimón, tey halajic a chaneb u.

⁴⁸Te winiquetic yu'un Israel suht ta spatic ta ya'beyel guerra te yantic snich'nab Benjamín, la smilticlanic hilel ta espada spisil te ants-winiquetic yu'un jujun pueblo soc chambahlametic soc spisil te bintic la stahic. Soc la schiq'uic spisil te pueblohetic te la stahique.