Read Tzeltal Apocalipsis 10 Bible Online

Apocalipsis 10 - Tzeltal bible

Apocalipsis 10

¹La jquil co tal ta ch'ulchan yan ch'ul a'bat te bayel yip, potsol ta tocal, soc ay xojob ta yahc'olal te sjole. Hich sit yelaw te bin ut'il c'ahc'al, soc hich yacan te bin ut'il bahlal c'ahc'.

²Ay tut libro jamal slechoj ta sc'ab; la stec' te mar ta swa'el-oc soc la stec' te q'uinal ta sq'uexam-oc,

³tulan awon hich te bin ut'il choj. C'alal tulan awon, t'ohm talel huqueb chahwuc.

⁴C'alal t'ohm te huqueb chahwuc, c'an jts'ihbay; pero la jca'iy te ay mach'a c'opoj ta ch'ulchan te hich la yalbon: Maca te bin la yalic te huqueb chahwuquetic, ma me xats'ihbay, xchi.

⁵Te ch'ul a'bat te la jquil te jun yoc stec'oj mar soc jun yoc stec'oj q'uinal la stoy mohel sc'ab ta ch'ulchan,

⁶jc'axel la yal ta jamal ta scuenta te mach'a stalel cuxul sbahtel q'uinal, te la spas te ch'ulchan soc spisil bintic ay tey a, te bahlumilal soc spisil bintic ay tey a, soc te mar soc spisil bintic ay tey a, la yal te mayuquix yorahil,

⁷pero te bin ora ya yoq'uesin te corneta te shuquebal ch'ul a'bat, ya xc'oht ta pasel te bin muquen ay yu'un Dios, hich te bin ut'il la yalbe ya'iyic te a'batetic yu'un, ha te jalwanejetique.

⁸Te mach'a c'opoj ta ch'ulchan te la jca'iye, la sc'oponon xan: Bahan, tsaca te tut libro jamal slechoj ta sc'ab te ch'ul a'bat te stec'oj te mar soc te q'uinale, xchi.

⁹Hich baht jc'ambe te ch'ul a'bat te yacuc ya'bon te tut libro. Hich la yalbon: Ich'a, we'an. Ya xch'ahub ach'uht yu'un, pero chi' yac awa'iy ta awe hich te bin ut'il chab, xchi.

¹⁰Hich la jtsac te tut libro ay ta sc'ab te ch'ul a'bat, la jwe'. Chi' la jca'iy ta que hich te bin ut'il chab, pero c'alal la jwe', ch'ahub jch'uht yu'un.

¹¹Hich la yalbon: Ya sc'an te yac awal xan te sc'op-jalwanej ta stojol bayel pueblohetic, nacionetic, c'opiletic, soc muc'ul ajwaliletic, xchi jc'oblal.