Read Tzeltal Apocalipsis 11 Bible Online

Apocalipsis 11 - Tzeltal bible

Apocalipsis 11

¹A'boton jch'ix jalal scuenta p'is, soc hich halboton: Hahchan, p'isa te templo yu'un Dios, te scajtahib ta chiq'uel mahtanil soc te mach'atic yac sch'uhuntaybelic Dios tey a.

²Yan te yamaq'uil te templo ma me xap'is stuquel, como a'bibilix ta sc'ab te jyanlumetique. Cheb yoxwinic (42) u ya me sts'o'ts'o'teq'uic te ch'ul pueblo.

³Ya calbe te cheb testigohetic cu'un te ya me xc'opojic ta sc'op-jalwanej oxbahc' soc oxwinic (1,260) c'ahc'al, slapojic pac' yu'un mel-o'tan a, xchi.

⁴Te cheb testigohetic ha te cheb olivo-te' soc te cheb yawil c'ahc' te tec'ajtic ta stojol te Ajwalil yu'un te bahlumilale.

⁵Teme ay mach'a ya sc'an ya yuts'inlan, ya xloc' c'ahc' ta yehic, hich ya slajinic a te scontrahique. Hich me ya xlaj a te mach'a ya sc'an ya yuts'inlan.

⁶Te cheb testigohetic ini ay yu'elic yu'un ya smaquic te ch'ulchan scuenta yu'un ma xtal ha'al te jayeb c'ahc'al yacalic ta yalel te sc'op-jalwanej; soc ay yu'elic yu'un sc'atp'unel ta ch'ich' te ha'etic, soc yu'un ya yac' spisil ta chahp jlajinwanej ta bahlumilal, ha chican jayeb buelta ya sc'anic.

⁷Te c'alal ya xlaj yo'tanic ta yalel te testigo-c'op yu'unic, te chambahlam te xiweltic sba te ya xmo tal ta xahab ya me ya'be guerra, ya stsal soc ya smilticlan.

⁸Pujul ya xhil sbaq'uetalic ta calle yu'un te muc'ul pueblo, ha te Sodoma soc Egipto sbihil, tey nix ta banti laj ta milel ta cruz te Cajwaltique.

⁹Te mach'atic talemic ta spisil ta chahp pueblohetic, ts'umbaliletic, c'opiletic soc nacionetic ya me yilbeyic sbaq'uetalic ohlil schaneb c'ahc'al, soc ma xyaq'uic ta mucbeyel te sbaq'uetalique.

¹⁰Te mach'atic nahinemic ta bahlumilal tse'el yo'tanic yu'un, ya spasic q'uin soc ya smahtantes sbahic yu'un, como te cheb jalwanejetic bayel la yuts'inic te mach'atic nahinemic ta bahlumilale.

¹¹Pero ta ohlil schanebal c'ahc'al slajelic a, a'bot xan yich'ic ic' scuenta cuxlejal te talem ta stojol Dios, hich la stehc'an hahchel sbahic, soc tojic xiwel yu'un te mach'atic la yilique.

¹²Patil la ya'iyic ay mach'a tulan c'opoj ta ch'ulchan: La', mohanic tal li'i, xchi sc'oblalic. Hich q'uelel sit spisilic a te scontrahic, mohic bahel ta ch'ulchan ta tocal.

¹³Ta hich ora tal tulan nihquel, hemts'uj cohel jun ta slajunxeht'el te muc'ul pueblo. Lajic j'ohlil swaxaclajunbahc' (7,000) ta tuhl yu'un te nihquele. Te jayeb xan hilic bayel xiw yo'tanic yu'un soc la yalbeyic yutsil sc'oblal te Dios yu'un te ch'ulchane.

¹⁴C'axix te schebal wocol; ora ya xtal te yoxebal wocole.

¹⁵Te shuquebal ch'ul a'bat la yoq'uesin te scorneta, ay mach'atic tulan c'opojic ta ch'ulchan, hich yacalic ta yalel: Te cuentahinel yu'un te bahlumilal, ha yu'unix te Cajwaltic Dios soc te Cristo yu'une, ha ya xcuentahinwan sbahtel q'uinal, xchihic.

¹⁶Hich te chaneb scha'winic (24) ta tuhl mamaletic huhcajtic ta shuctajibic ta stojol te Dios la spahcan sbahic soc la sch'uhuntayic te Diose,

¹⁷hich la yalic: Ya calbatcotic wocol, Cajwaltic Dios te spisil ya xhu' awu'un, te atalel ayat soc te ayat ta namey, como la awich'ix te bayel awu'el soc hahchatix ta cuentahinwanej.

¹⁸Ilin yo'tanic te nacionetic, pero hulemix te awilimba; ha yorahilix te ya x'ochic ta ich'el ta c'op te mach'atic chamenic, yorahilix te ya x'a'bot stojol sc'abic te a'batetic awu'un, ha te jalwanejetic, te mach'atic ch'uhltesbilic, te ya yich'ic ta muc' te abihile, muc' biq'uit, soc yorahilix te yac ajinticlan te mach'atic ya sjinic te bahlumilale, xchihic.

¹⁹Jahm te templo yu'un Dios te ay ta ch'ulchan, chican ta yutil te templo te scaxahul te chapbil-c'op. Xliplajan tsantsehwaletic, xjuyet hahchel c'opetic, stsanlajan ta t'ohmel chahwuc, xyuq'uinaj nihquel, soc co tal niwac bat.