Read Tzeltal Apocalipsis 12 Bible Online

Apocalipsis 12 - Tzeltal bible

Apocalipsis 12

¹Chicnaj ta ch'ulchan muc'ul seña: jtuhl ants sc'u'inej te c'ahc'al, ay ta ye'tal yoc te u soc scoronahinej lahchayeb (12) ec' ta sjol.

²Swoloj yal te antse, xquelet ta aw yu'un sc'uxul yu'un ya x'ayinix yal.

³Ay yan seña chicnaj ta ch'ulchan: jun tsajal dragón te ay huqueb sjol soc lajuneb xulub, soc jujun corona ta jujun sjol.

⁴Jun ta yoxeht'el te eq'uetic ta ch'ulchan la swes cohel ta sne, la sch'oj cohel ta bahlumilal. Te dragón la stehc'an sba ta sit te ants ya x'ayinix yal, yu'un te c'alal ya x'ayin nax a te yale, ya sbic'be.

⁵Ayin squerem-al te antse, ha te mach'a tulan ya xpasawan ta mandar spisil ta chahp nacionetic ta sbaston-taq'uin. Te yal te antse toj ic'ot mohel ta stojol Dios soc ta stojol te smuc'ul-huctajib.

⁶Te ants ahn bahel ta jochol taquin q'uinal ta banti chahpambil yawil yu'un Dios, yu'un tey ya yich' mac'linel oxbahc' soc oxwinic (1,260) c'ahc'al a.

⁷Hahch guerra ta ch'ulchan: te Miguel soc te ch'ul a'batetic yu'un la stsal sbahic soc te dragón. Te dragón soc te a'batetic yu'un la ya'beyic guerra,

⁸pero ma ba hu' yu'unic, soc mayuquix lugar yu'unic ta ch'ulchan.

⁹La yich' ch'ojel cohel te muc'ul dragón, ha te antiguo chan, te Pucuj soc Satanás sbihil, ha te ya slo'loy spisil te bahlumilale. Ch'ojot cohel ta bahlumilal soc te a'batetic yu'une.

¹⁰Patil la jca'iy ay mach'a tulan c'opoj ta ch'ulchan, hich la yal: Yorahilix te colel, te yu'el soc te cuentahinel yu'un te Dios cu'untic, soc te ya yich' ya'tel te Cristo yu'une. Como ch'ojotix loq'uel te mach'a yac slehbebel smul te quermanotactic, te c'ahc'al ahc'abal yac ta slehbeyel smul ta stojol te Dios cu'untique.

¹¹Ha'ic la stsalic ta scuenta sch'ich'el te Jcolel Tuminchij soc ta scuenta te testigo-c'op la yalique. La sloq'ues sbahic ta yo'tanic, ma ba la xi'ic lajel.

¹²Ha yu'un tse'eluc me awo'tan, ha'at ch'ulchan, soc ha'ex te nahinemex tey a. ¡Pero ay me swocolic te mach'atic nahinemic ta bahlumilal soc ta mar! Como te pucuje, soc bayel yilimba cohemix tal ta atojolic, yu'un ya sna' te nopol ya xlaj ora yu'un, xchi.

¹³C'alal la yil te dragón te ch'ojotix cohel ta bahlumilal, hahch snuts te ants te la yayintes te squerem-al.

¹⁴Te ants a'bot cheb xic' muc'ul jxic scuenta yu'un hich ya xwihl loq'uel ta stojol te chan, ya xbaht ta jochol taquin q'uinal ta banti ya yich' mac'linel jun shalalil, cheb shalalil, soc j'ohlil shalalil.[6]

¹⁵Te chan la smal loq'uel ha' ta ye hich te bin ut'il muc'ul-ha', ta banti baht te ants, yu'un yacuc xbaht ta ehanel ta ha'.

¹⁶Pero ha coltayot yu'un te q'uinal te antse; la sjam sba te q'uinal, la yuch' te ha' te la smal loq'uel ta ye te dragón.

¹⁷Te dragón bayel ilin yu'un ta stojol te antse, hich baht ya'be guerra te jayeb xan sts'umbal te antse, ha te mach'atic ya sch'uhumbeyic te smandar Dios soc te yich'ojic te testigo-c'op yu'un te Jesucristo.